2Sa 5 | KaaIBT22L | STEP | Izraildıń barlıq urıwları Xebronǵa, Dawıtqa kelip, bılay dedi: «Bizler siziń óz súyegińiz hám óz etińizbiz.

‏ 2 Samuel 5

Dawıttıń Izrailǵa patsha bolıwı

1 Izraildıń barlıq urıwları Xebronǵa, Dawıtqa kelip, bılay dedi: «Bizler siziń óz súyegińiz hám óz etińizbiz. 2 Burın Shaul patshamız bolǵan waqıtta sawashta Izraildı ózińiz baslap júretuǵın edińiz. Jaratqan Iye sizge: „Xalqım Izrailǵa sen shopanlıq etip, Izrail ústinen húkimdar bolasań“, – dep wáde bergen edi». 3 Solay etip, Izraildıń barlıq aqsaqalları Xebronǵa, patsha Dawıttıń aldına kelgende, Dawıt Xebronda Jaratqan Iyeniń aldında olar menen kelisim dúzdi. Olar da Dawıttı maylap, Izrailǵa patsha etip qoydı.

4 Dawıt otız jasında patsha bolıp, qırıq jıl patshalıq etti. 5 Ol Xebronda jeti jıl altı ay Yahuda ústinen, Erusalimde otız úsh jıl pútkil Izrail hám Yahuda ústinen patshalıq etti.

6 Patsha hám onıń adamları Erusalimde jasap atırǵan ebus xalqına shabıwıl jasaw ushın jolǵa shıqqanda, ebus xalqı: «Dawıt bul jerge kire almaydı», – dep oylap, Dawıtqa:

– Sen bul jerge kire almaysań. Soqırlar menen sholaqlar-aq seni quwıp saladı, – dep baqırdı. 7 Degen menen, Dawıt Sion qorǵanın qolǵa kirgizdi. Keyin ala bul qorǵan Dawıttıń qalası dep ataldı.

8 Sol kúni Dawıt adamlarına bılay dedi:

– Ebus xalqın jeńbekshi bolǵan hár bir adam suw tarmaqları arqalı barıp, Dawıttı jek kóretuǵın sol sholaq hám soqır ebuslardı joq qılsın.

Sonlıqtan: «Soqırlar menen sholaqlar sarayǵa kirmeydi», – degen gáp qalǵan eken.

9 Bunnan keyin, Dawıt qorǵan qalaǵa ornalasıp aldı hám onı Dawıttıń qalası dep atadı. Ol qorǵannıń aynala dógeregine Millo degen jerden baslap qosımsha qorǵan qurdı. 10 Dawıt kúshke tolıp bara berdi. Óytkeni Álemniń Qudayı Jaratqan Iye onıń menen birge edi.

11 Tir patshası Xiram Dawıtqa elshiler, sonıń menen birge kedr aǵashların, aǵash ustaların hám tas qalawshılardı jiberdi. Bul adamlar Dawıt ushın bir saray qurdı. 12 Sonda Dawıt Jaratqan Iyeniń ózin Izrailǵa patsha etip tayınlaǵanın hám Óz xalqı Izrail ushın onıń patshalıǵın dańqqa eristirgenin túsindi.

13 Dawıt Xebronnan Erusalimge kelgennen keyin de ózine jáne toqallar hám hayallar alıp, olardan da ul hám qızlar kórdi. 14 Dawıttıń Erusalimde tuwılǵan ul-qızlarınıń atları mınalar: Shammua, Shobab, Natan, Sulayman, 15 Ibxar, Elishua, Nefeg, Yafia, 16 Elishama, Elyada hám Elifelet.

Filistlerdiń jeńiliske ushırawı

17 Filistler Dawıttıń maylanıp, Izrailǵa patsha etip qoyılǵanın esitkende, pútkil filist áskerleri Dawıttı qolǵa túsiriw ushın izlep ketti. Bunı esitken Dawıt qorǵanǵa ketti. 18 Filistler kelip, Refaim oypatlıǵına jaylastı. 19 Dawıt Jaratqan Iyeden:

– Filistlerge qarsı júris qılayın ba? Olardı maǵan táslim eteseń be? – dep soradı.

Jaratqan Iye Dawıtqa:

– Awa, júris qıl. Olardı saǵan sózsiz táslim etemen, – dedi.

20 Sonda Dawıt áskerleri menen birge Baal-Perasimge ketti hám ol jerde filistlerdi qıyrattı. Keyin ol: «Hár bir bógetti jaypap ótetuǵın suw tasqını sıyaqlı, Jaratqan Iye dushpanlarımdı aldımda qıyratıp tasladı», – dedi. Sol sebepli sol jerge Baal-Perasim ^{▼▼ Baal-Perasim – «Qıyratıw Mırzası» degendi bildiredi.} degen at berildi. 21 Filistler butların sol jerge taslap qashqan edi. Dawıt hám onıń adamları sol butlardı alıp ketti.

22 Kóp ótpey, filistler qaytadan kelip, Refaim oypatlıǵına jaylastı. 23 Dawıt Jaratqan Iyeden qayta soraǵanda, Jaratqan Iye oǵan bılay dep juwap berdi:

– Olarǵa bul jerden hújim qılma. Olardıń artınan aylanıp bar da, tut aǵashları tárepten hújim qıl. 24 Sen tut aǵashlarınıń joqarısınan ayaq sesleri sıyaqlı dawıstı esitiwden-aq, háreketke kiris. Sebebi sol waqıtta Men seniń aldıńda filist ordasın qıyratıw ushın baratırǵan bolaman.

25 Dawıt Jaratqan Iyeniń buyırǵanınday qıldı hám filist ordasın Gebadan Gezerge deyin qıyratıp bardı.