2Sa 6 | KaaIBT22L | STEP | Dawıt jáne Izraildaǵı pútkil saylandı áskerlerdi topladı. Olar otız mıń adam edi.

‏ 2 Samuel 6

Kelisim sandıǵınıń Erusalimge alıp keliniwi

1 Dawıt jáne Izraildaǵı pútkil saylandı áskerlerdi topladı. Olar otız mıń adam edi. 2 Sońınan Dawıt hám onıń menen birge bolǵan sol adamlardıń hámmesi sandıqtıń ústindegi kerublar ^{▼▼ Kerub – qanatlı ruwxıy barlıq.} arasında taxtta otırǵan Álemniń Jaratqan Iyesiniń atı menen atalǵan Qudaydıń sandıǵın alıp keliw ushın Baale-Yahudaǵa ^{▼▼ Baale-Yahuda – Kiryat-Yarimniń basqa atı, 1Jln 13:6 qarań.} ketti. 3 Olar Qudaydıń sandıǵın tóbeshiktegi Abinadabtıń úyinen alıp, taza bir arbaǵa qoydı. Abinadabtıń ulları Uzza menen Axyo taza arbanı jeteklep júrdi. 4 Olar Qudaydıń sandıǵın alıp ketip baratırǵanda, Axyo sandıqtıń aldında júrdi. 5 Sol waqıtta Dawıt hám pútkil Izrail xalqı Jaratqan Iyeniń aldında bar kúshi menen qosıq aytıp, lira ^{▼▼ Lira – barmaq penen shertiletuǵın tarlı saz ásbabı.} hám arfa shertip, dáp qaǵıp, sistranı shıńǵırlatıp, kimbaldı dańǵırlatıp, oyınǵa túsip kiyatırǵan edi.

6 Olar Naxon degen adamnıń qırmanına jetip barǵanda, ógizler súrnigip ketti. Sonda Uzza qolın sozıp, Qudaydıń sandıǵın uslap qaldı. 7 Húrmetsizligi ushın Jaratqan Iyeniń Uzzaǵa ǵázebi lawladı hám sol jerde-aq onıń janın aldı. Uzza Qudaydıń sandıǵınıń qasında jan tapsırdı.

8 Jaratqan Iyeniń Uzzanı jazalaǵanı ushın, Dawıt qattı ashıwlandı. Sol kúnnen baslap, házirge deyin bul orın Peres-Uzza ^{▼▼ Peres-Uzza – «Uzzanıń qıyralıwı» degendi bildiredi.} dep ataladı.

9 Dawıt sol kúni Jaratqan Iyeden qorqıp: «Endi qalay Jaratqan Iyeniń sandıǵın ákelip, janıma qoya alaman?» – dedi. 10 Sol kúni Dawıt sandıqtı óziniń atı menen atalǵan qalaǵa alıp barıwdıń ornına, gatlı Obed-Edomnıń úyine apardı. 11 Jaratqan Iyeniń sandıǵı gatlı Obed-Edomnıń úyinde úsh ay turdı. Jaratqan Iye Obed-Edomdı hám onıń pútkil shańaraǵın jarılqadı. 12 Dawıtqa: «Qudaydıń sandıǵı sebepli, Jaratqan Iye Obed-Edomnıń shańaraǵın hám oǵan tiyisli hámme nárseni jarılqadı», – degen xabar jetti. Sonda Dawıt barıp, Qudaydıń sandıǵın Obed-Edomnıń úyinen Dawıttıń qalasına quwanıshlı túrde alıp keldi. 13 Jaratqan Iyeniń sandıǵın kótergenler altı adım atqanda, Dawıt bir buǵa menen bir semirtilgen tananı qurbanlıqqa shaldı. 14 Zıǵır efod ^{▼▼ Efod – ádette ruwxaniyler kiygen kiyim.} kiyip alǵan Dawıt Jaratqan Iyeniń aldında bar kúshi menen oyınǵa tústi. 15 Usılayınsha Dawıt hám pútkil Izrail xalqı quwanıshlı dawıslar hám kárnay sesleri astında sandıqtı alıp kiyatırǵan edi. 16 Sandıq Dawıttıń qalasına kirip kiyatırǵanda, Shauldıń qızı Mixal terezeden qarap turǵan edi. Ol Jaratqan Iyeniń aldında sekirip oyınǵa túsip kiyatırǵan Dawıt patshanı kórgende, onı óz kewlinde pás kórip ketti.

17 Jaratqan Iyeniń sandıǵı alıp kelinip, Dawıttıń arnawlı túrde qurdırǵan shatırınıń ishindegi óz ornına qoyıldı. Sońınan Dawıt Jaratqan Iyege arnap jandırılatuǵın qurbanlıqlar hám tatıwlıq qurbanlıqların berdi. 18 Jandırılatuǵın hám tatıwlıq qurbanlıqların berip bolǵannan keyin, Dawıt Álemniń Jaratqan Iyesiniń atı menen xalıqqa pátiya berdi. 19 Keyin ol pútkil xalıqqa, Izrail jámiyetindegi hár bir erkek hám hayalǵa bir shórek nan, bir uwıs xurma hám bir uwıs keptirip nıǵızlanǵan kishmishten tarqattı. Bunnan soń, pútkil xalıq úylerine qayttı.

20 Dawıt óz xojalıǵına pátiya beriw ushın úyine qaytıp kelgende, Shauldıń qızı Mixal onı qarsı alıwǵa shıqtı hám oǵan:

– Izrail patshası búgin qanday abırayǵa eristi?! Óz qullarınıń shorıları aldında jaramsız adam sıyaqlı jalańashlanıp, ózin kórsetti-ǵo, – dedi.

21 Dawıt Mixalǵa bılay dep juwap berdi:

– Meni ákeńniń hám onıń pútkil násiliniń ornına tańlap, Óz xalqı Izrailǵa húkimdar etip qoyǵan Jaratqan Iyeniń aldında oyınǵa tústim. Awa, men Jaratqan Iyeniń aldında oynay beremen. 22 Endi ózimdi bunnan da tómen tutıp, jáne de pásirek sanayman. Biraq sen aytqan sol shorılar meni húrmetke bóleydi.

23 Shauldıń qızı Mixal ómiriniń aqırına shekem biyperzent ótti.