‏ 2 Samuel 7

Qudaydıń Dawıtqa bergen sózi

1Dawıt patsha óz sarayında jasay berdi. Sebebi Jaratqan Iye onı átirapındaǵı barlıq dushpanlarınan qorǵap, tınıshlıq berdi.

2Sol waqıtları patsha payǵambar Natanǵa:

– Qara, men kedr aǵashınan qurılǵan sarayda jasap atırman, al Qudaydıń sandıǵı bolsa, shatırda turıptı, – dedi.

3Natan patshaǵa:

– Júregińiz neni qálese, sonı isleń. Sebebi Jaratqan Iye siz benen birge, – dep juwap berdi.

4Biraq sol kúni túnde Natanǵa Jaratqan Iyeden mınaday sóz tústi:

5– Barıp, qulım Dawıtqa bılay dep ayt: «Jaratqan Iye bılay deydi: Mákan basıwım ushın, Maǵan arnap úydi sen qurmaqshımısań? 6Izrail xalqın Mısırdan alıp shıqqan kúnimnen baslap búginge deyin, Men úyde jasadım ba, ózi? Shatırda ol jaqtan bul jaqqa kóship júrgen joqpan ba? 7Pútkil izraillılar menen birge kóship júrgen jerlerde xalqımdı basqarıwdı buyırǵan Izrail biyleriniń qaysı birine: Nege Maǵan kedr aǵashınan úy qurıp bermedińiz? – degen edim?»

8Endi qulım Dawıtqa bılay dep ayt: «Álemniń Jaratqan Iyesi bılay deydi: Men seni jaylawda qoy baǵıp júrgen jerińnen alıp, xalqım Izrailǵa húkimdar etip qoydım. 9Qay jerge barsań da, seniń menen birge bolıp, aldıńdaǵı hámme dushpanlarıńdı joq qıldım. Atıńdı dúnyadaǵı ullı adamlardıń atları sıyaqlı ullı qılaman. 10Xalqım Izrail ushın orın tayarlap, olardı sol jerge ornalastıraman. Olardıń óz jurtı boladı hám hesh kim tınıshın buzbaydı. Zalımlar olarǵa burınǵıday zorlıq qılmaydı. 11Xalqım Izrailǵa biyler qoyǵan waqıttan beri zalımlar olardı ezip kelmekte. Al seni pútkil dushpanlarıńnan qutqarıp, ráhátke eristiremen.

Jaratqan Iye jáne bılay dep bildiredi: Men seniń ushın bir shańaraq – patshalar áwladın jarataman. 12Sen ólip, ata-babalarıńa qosılǵanıńda, zúryadıńnan birin taxtqa otırǵızıp, onıń patshalıǵın bekkemleymen. 13Maǵan atap úydi ol quradı. Men de onıń patshalıq taxtın máńgilik qılıp ornataman. 14Men oǵan áke bolaman, ol Maǵan ul boladı. Eger ol gúna islese, áke ulın tayaq penen jazalaǵanday, onı basqa milletler arqalı jazalayman. 15Biraq seniń kóz aldıńda Shauldan Óz miyrimimdi tartıp alǵanım sıyaqlı, onnan Óz miyrimimdi hesh qashan tartıp almayman. 16Seniń urpaǵıń hám patshalıǵıń Meniń aldımda máńgige turadı hám taxtıń máńgi bekkem boladı».

17Solay etip, Natan ayan arqalı berilgen bul sózlerdiń hámmesin Dawıtqa aytıp berdi.

Dawıttıń minnetdarshılıq duwası

18Sońınan Dawıt patsha kelip, Jaratqan Iyeniń aldında otırdı da, bılay dedi:

– Quday Iye! Sen meni bunshelli mártebeli qılǵanday, men kim bolıppan, meniń úy-ishim de ne bolıptı? 19Quday Iye! Seniń názerińde bul da az bolǵanday, qulıńnıń urpaǵınıń keleshegi tuwralı da aytıp berdiń. Quday Iye, Seniń adamzatqa degen qatnasıń usınday ma?! 20Men Saǵan basqa ne ayta alaman? Óytkeni Quday Iye, Sen Óz qulıńdı bileseń. 21Sen Óz sózińe hám júregińe muwapıq bolǵan bul ullı isti islediń hám onı qulıńa bildirdiń. 22Qanday ullısań, Quday Iye! Óz qulaqlarımız benen esitken barlıq xabarımız boyınsha, Saǵan teń keletuǵını joq, Sennen basqa Quday da joq. 23Dúnyada xalqıń Izrailǵa uqsaǵan birde bir xalıq joq. Olardı Óz xalqıń qılıw ushın, azat qılıwǵa bardıń hám xalqıń ushın da, eliń ushın da ullı hám tań qalarlıq isler islep, Óz dańqıńdı shıǵardıń. Mısırdan Óziń ushın azat qılǵan xalqıńnıń aldınan xalıqlardı hám qudaylardı quwıp jiberdiń. 24Xalqıń Izraildı máńgige Óz xalqım boladı dep, olardı bekkemlediń hám Óziń, Jaratqan Iye, olardıń Qudayı boldıń. 25Endi, Quday, Jaratqan Iye! Qulıńa hám onıń urpaǵına bergen wádeńde máńgige turıp, sózińdi orınlay gór. 26Adamlar: «Álemniń Jaratqan Iyesi – Izraildıń Qudayı», – dep atıńdı máńgige ullılasın hám qulıń Dawıttıń urpaǵı da Seniń aldıńda bekkem tursın. 27Álemniń Jaratqan Iyesi, Izraildıń Qudayı! Sen qulıńa: «Seniń ushın bir shańaraq – patshalıq jarataman», – dep ayan ettiń. Sonlıqtan qulıń usılay duwa etiwge júrek etti. 28Quday Iye, Sen Qudaysań, Seniń sózleriń haq. Sen qulıńa bul iygilikli wádeni berdiń. 29Endi aldıńda máńgige dawam etiwi ushın, qulıńnıń patshalıǵın jarılqawıńdı sorayman. Sebebi Quday Iye, Sen solay sóz berdiń hám qulıńnıń patshalıǵı Seniń jarılqawıń arqalı máńgige jarılqanatuǵın boladı.