2Sa 8 | KaaIBT22L | STEP | Aradan biraz waqıt ótkennen keyin, Dawıt filistlerdi jeńip, olardı boysındırdı hám filistlerdiń qolınan Meteg-Amma qalasın tartıp aldı.

‏ 2 Samuel 8

Dawıttıń jeńisleri

1 Aradan biraz waqıt ótkennen keyin, Dawıt filistlerdi jeńip, olardı boysındırdı hám filistlerdiń qolınan Meteg-Amma qalasın tartıp aldı.

2 Sońınan moab xalqın da jeńiliske ushırattı. Olardı jerge qatara jatqızıp, arqan menen ólshedi hám eki ólshemdi óltirip, úshinshi ólshemdi tiri qaldırdı. Solay etip, moablılar Dawıtqa baǵınıshlı bolıp, oǵan salıq tóleytuǵın boldı.

3 Soba patshası Rexob ulı Hadadezer Evfrat dáryası boylap óz patshalıǵın qayta tiklemekshi bolıp barǵanda, Dawıt oǵan shabıwıl jasap, jeńip shıqtı. 4 Dawıt onıń bir mıń jeti júz arbalı hám jigirma mıń piyada áskerin qolǵa túsirdi. Ol sawash arbasına jegiletuǵın barlıq atlardıń tirseklerin kesip mayırıp, onnan tek júz attı ǵana alıp qaldı.

5 Dawıt Soba patshası Hadadezerge járdemge kelgen Damaskte jasaytuǵın aramlardan jigirma eki mıń adamdı óltirdi. 6 Sońınan ol Damasktegi aramlardıń jerine óziniń saqshılar toparın ornalastırdı. Aramlar da Dawıtqa qul bolıp, salıq tóleytuǵın boldı. Dawıt qay jerge barsa da, Jaratqan Iye onı jeńiske eristirdi.

7 Dawıt Hadadezerdiń sárkárdaları alıp júrgen altın qalqanlardı alıp, Erusalimge ákeldi. 8 Jáne de, ol Hadadezerdiń qol astındaǵı Betax hám Berotay qalalarınan kóp muǵdarda qola aldı.

9 Xamat patshası Toy Dawıttıń Hadadezerdiń pútkil áskerlerin jeńip shıqqanınan xabar taptı. 10 Sonda Toy óz ulı Ioramdı sálem beriw hám Hadadezer ústinen erisken jeńisi menen qutlıqlaw ushın, Dawıt patshaǵa jiberdi. Sebebi Toy Hadadezer menen uzaq waqıttan beri urısıp kiyatırǵan edi. Ioram Dawıtqa gúmis, altın hám qoladan islengen zatlardı sawǵaǵa alıp keldi. 11 Dawıt patsha bul sawǵalardı basıp alǵan ellerinen alıp kelgen gúmis hám altınlar menen birge Jaratqan Iyege baǵıshladı. 12 Bular aram, moab, ammon, filist hám amalek xalıqlarınan alıp kelingen, jáne de, Soba patshası Rexob ulı Hadadezerden tartıp alınǵan gúmis hám altınlar edi.

13 Dawıt Duz oypatlıǵında edom xalqınan on segiz mıń adamdı óltirip qaytqannan soń, onıń dańqı astı.

14 Dawıt Edom aymaǵınıń hámme jerine óz saqshılar toparın ornalastırdı. Pútkil edom xalqı Dawıtqa baǵınıshlı boldı. Dawıt qayda barsa da, Jaratqan Iye onı jeńiske eristirdi.

Dawıttıń hámeldarları

15 Dawıt pútkil Izrailda patshalıq etip, xalqına tuwrı hám ádillik penen húkimdarlıq etti. 16 Seruya ulı Ioab sárkárda, Axilud ulı Ehoshafat diywanbegi boldı. 17 Axitub ulı Sadoq penen Abiyatar ulı Aximelex ruwxaniy, Seraya xatker edi. 18 Ehoyada ulı Benaya keretler menen peletlerden alınǵan tán saqshılardıń ^{▼▼ Keretler menen peletlerden alınǵan tán saqshılar – shet elden jallap alınǵan tán saqshılar bolıwı múmkin.} sárkárdası edi. Al Dawıttıń ulları ruwxaniyler edi.