2Sa 9 | KaaIBT22L | STEP | Bir kúni Dawıt: «Shauldıń xojalıǵınan tiri qalǵan bar ma? Men Ionatannıń húrmeti ushın oǵan jaqsılıq qılar edim»,

‏ 2 Samuel 9

Dawıttıń Mefiboshetke jaqsılıq islewi

1 Bir kúni Dawıt: «Shauldıń xojalıǵınan tiri qalǵan bar ma? Men Ionatannıń húrmeti ushın oǵan jaqsılıq qılar edim», – dedi.

2 Shauldıń xojalıǵında Siba degen bir xızmetshi kisi bar edi. Onı Dawıttıń aldına shaqırıp keldi. Patsha onnan:

– Siba degen senbiseń? – dep soradı.

Siba oǵan:

– Awa, Siba degen qulıńız men bolaman, – dep juwap berdi.

3 Patsha oǵan:

– Shauldıń xojalıǵınan aman qalǵan adam bar ma? Men oǵan Quday ushın jaqsılıq qılayın, – dedi.

Siba patshaǵa:

– Ionatannıń eki ayaǵı da mayıp bolıp qalǵan bir ulı bar, – dep juwap berdi.

4 Patsha onnan:

– Ol qay jerde? – dep soradı.

Siba patshaǵa:

– Ol Lo-Debardaǵı Ammiel ulı Maxirdiń úyinde, – dep juwap berdi.

5 Solay etip, Dawıt patsha onı Lo-Debardan, Ammiel ulı Maxirdiń úyinen aldırdı.

6 Shauldıń aqlıǵı, Ionatannıń ulı bolǵan Mefiboshet Dawıtqa keldi hám et betinen jıǵılıp, oǵan tájim etti.

Dawıt:

– Mefiboshet! – dedi.

– Lábbáy, qulıńız usı jerde, – dep juwap berdi Mefiboshet.

7 Dawıt oǵan:

– Qorqpa, men ákeń Ionatannıń húrmeti ushın saǵan jaqsılıq qılaman. Atań Shauldıń barlıq jerlerin saǵan qaytarıp beremen. Al sen bárqulla meniń dasturxanımnan awqatlanatuǵın bolasań, – dedi.

8 Mefiboshet tájim qılıp:

– Óli iytke uqsaǵan mendey qulıńızǵa jaqsılıq qılatuǵınday, men kim bolıppan? – dedi.

9 Sońınan patsha Shauldıń xızmetshisi Sibanı shaqırtıp alıp, oǵan bılay dedi:

– Burın mırzań Shaulǵa hám onıń xojalıǵına tiyisli bolǵan nárseniń hámmesin onıń aqlıǵı Mefiboshetke berdim. 10 Endi mırzańnıń aqlıǵı kerekli azıq-awqat penen támiyinleniwi ushın, sen hám seniń ullarıń menen qullarıń onıń ushın jerdi tárbiyalap, ónim alıńlar. Al mırzańnıń aqlıǵı Mefiboshet bolsa, bárqulla meniń dasturxanımnan awqat jeydi.

Sibanıń on bes ulı hám jigirma qulı bar edi.

11 Siba patshaǵa:

– Taqsırım, qulıńız bolǵan men buyırǵanlarıńızdıń hámmesin orınlayman, – dedi.

Mefiboshet patshanıń ullarınıń biri sıyaqlı, patshanıń dasturxanınan awqat jeytuǵın boldı. 12 Mefiboshettiń Mixa degen kishkene bir ulı bar edi. Sol waqıttan baslap, Sibanıń úyinde jasaytuǵın hár bir adam Mefiboshetke xızmet etetuǵın boldı. 13 Mefiboshet bárqulla patshanıń dasturxanınan awqat jeytuǵın bolǵanlıqtan, Erusalimde jasadı. Onıń eki ayaǵı da mayıp edi.