2Sa 15 | KaaIBT22L | STEP | Bunnan soń, Abshalom ózine bir sawash arbasın, atlar hám aldında juwırıp júretuǵın eliw saqshı tayarladı.

‏ 2 Samuel 15

Abshalomnıń Dawıtqa qarsı bas kóteriwi

1 Bunnan soń, Abshalom ózine bir sawash arbasın, atlar hám aldında juwırıp júretuǵın eliw saqshı tayarladı. 2 Ol azanda erte turıp, qala dárwazasına baratuǵın jol boyında turatuǵın edi. Óz arzın tıńlatıp, húkim shıǵartıw ushın patshaǵa kelgen hár bir adamdı shaqırıp alıp, onnan: «Qaysı qaladansań?» – dep soraytuǵın edi. Sol adam Izraildıń qaysı urıwınan kelgenin aytatuǵın edi.

3 Sonda Abshalom sol adamǵa: «Qara, seniń dawa isiń tuwrı hám ádil. Biraq patshanıń janında seni tıńlaw ushın tayınlanǵan hesh kim joq», – deytuǵın edi. 4 Sońınan: «Qánekey, endi meni elge qazı qılıp qoysa, dawa-arzı menen kelgen hár bir adamnıń isin ádalatlıq penen shesher edim», – dep qosıp qoyatuǵın edi. 5 Eger birew Abshalomǵa tájim etiw ushın jaqınlassa, ol sol adamǵa qolın sozatuǵın hám onı qushaqlap, súyetuǵın edi. 6 Abshalom patshaǵa arız qılıp kelgen izraillılardıń hár birine usılay qatnas jasaytuǵın edi. Solay etip, ol izraillılardıń kewlin ózine awdırıp aldı.

7 Aradan tórt jıl ^{▼▼ tórt jıl – Áyyemgi grek hám suriya tilindegi awdarmalardan. Evreyshe qoljazbalarda «qırıq jıl».} ótkennen soń, Abshalom patshaǵa bılay dedi:

– Meniń Xebronǵa barıp, Jaratqan Iyege bergen wádemdi orınlap keliwime ruxsat berseńiz. 8 Sebebi qulıńız bolǵan men Aram úlkesindegi Geshurda jasap atırǵanımda: «Eger Jaratqan Iye meni Erusalimge qaytarsa, onda men Xebronǵa barıp, Oǵan sıyınaman», – dep wáde bergen edim.

9 Patsha oǵan:

– Aman-esen kete ber, – dedi.

Ol ornınan turıp, Xebronǵa ketti. 10 Abshalom Izraildıń pútkil urıwlarına jasırın túrde xabarshılar jiberip, olarǵa: «Kárnay dawısın esitiwden-aq: „Abshalom Xebronda patsha boldı“, – dep aytıńlar», – dedi. 11 Erusalimnen mirát etilgen eki júz adam bolıp ótken waqıyalardan biyxabar halda, jaqsı niyet penen Abshalomǵa erip ketti. 12 Abshalom qurbanlıq shalıp atırıp, Dawıttıń másláhátshisi gilolı Axitofeldi de Gilo qalasınan aldırttı. Usılayınsha qozǵalań kúsheye berdi. Óytkeni Abshalomnıń izine ergenlerdiń sanı kóbeyip atırǵan edi.

Dawıttıń Erusalimnen qashıwı

13 Bir xabarshı Dawıtqa kelip:

– Izraillılardıń kewli Abshalomǵa awıp ketti, – dedi. 14 Sonda Dawıt Erusalimde ózi menen birge bolǵan barlıq xızmetshilerine:

– Turıńlar, qashayıq! Bolmasa, Abshalomnan qashıp qutıla almaysız. Dárhal ketip qalmasaq, Abshalom izimizden tez jetip alıp, bálege duwshar eter, qalanı da qılıshtan ótkerer, – dedi.

15 Patshanıń xızmetshileri:

– Taqsır, siz qanday qararǵa kelseńiz, bizler orınlawǵa tayarmız, – dep juwap berdi.

16 Solay etip, patsha pútkil saray xalqın izine ertip, jolǵa shıqtı. Al sarayǵa qarap turıwı ushın, on toqalın sol jerde qaldırdı. 17 Patsha hám onıń izine ergen pútkil xalıq qalanıń eń shetindegi úydiń janına kelip, toqtadı. 18 Sol jerden baslap, barlıq xızmetshileri, keretler menen peletlerden alınǵan tán saqshılar hám Gattan ózine erip kelgen gatlı altı júz ásker patshanıń aldınan júrip ótti.

19 Patsha gatlı Ittayǵa bılay dedi:

– Nege sen de bizler menen kiyatırsań? Izińe qaytıp, jańa patsha menen qal. Óytkeni sen watanıńnan quwılǵan bir jat elliseń. 20 Sen keshe kelgenseń. Búgin qay jerge bararımdı ózim bilmey turıp, seni de sergizdan qılayın ba? Izge qayt, áskerlerińdi de óziń menen alıp qayt. Qudaydıń súyispenshiligi hám sadıqlıǵı saǵan yar bolsın!

21 Biraq Ittay patshaǵa:

– Taqsır, tiri Jaratqan Iye haqı aldıńızda ant iship aytaman: ólim ushın bolsa da, ómir ushın bolsa da, siz qay jerde bolsańız, qulıńız bolǵan men de sol jerde bolaman, – dep juwap berdi.

22 Dawıt Ittayǵa:

– Yaqshı, onda aldıǵa ótip, júre ber, – dedi.

Solay etip, gatlı Ittay hám onıń janındaǵı hámme adamlar bala-shaǵaları menen birge jolın dawam etti. 23 Xalıq ketip baratırǵanda, átiraptaǵı pútkil el zar-zar jılastı. Patsha Kidron sayınan ótti. Pútkil xalıq shólistanlıqqa qaray jol aldı.

24 Ruwxaniy Sadoq penen Qudaydıń Kelisim sandıǵın kótergen lebiyliler de sol jerde edi. Olar Qudaydıń sandıǵın jerge qoydı. Pútkil xalıq qaladan shıǵıp bolǵansha, ruwxaniy Abiyatar tóbeshikke kóterilip, olardı kútip turdı.

25 Sońınan patsha Sadoqqa bılay dedi:

– Qudaydıń sandıǵın qalaǵa qaytarıp alıp bar. Eger Jaratqan Iyeniń maǵan miyrimi túsken bolsa, Ol meni izime qaytarıp, sandıqtı hám sandıq turatuǵın orındı maǵan kórseter. 26 Eger Ol maǵan: «Saǵan kewlim tolmadı», – dese, onda men tayarman. Ol maǵan maqul kórgenin islesin.

27 Patsha sózin dawam etip, ruwxaniy Sadoqqa bılay dedi:

– Jaǵdaydı kórip turǵan joqsań ba? Ulıń Aximaastı hám Abiyatardıń ulı Ionatandı janıńa al da, Abiyatar menen birge aman-esen qalaǵa qayt. 28 Sizlerden anıq bir xabar almaǵanımsha, men Iordan tegisliginde, dáryanıń ótkelinde kútip turaman.

29 Solay etip, Sadoq penen Abiyatar Qudaydıń sandıǵın Erusalimge qaytarıp aparıp, sol jerde qaldı. 30 Al Dawıt bolsa, jılap-eńirep Záytún tawına kóterile berdi. Ol basın orap alıp, jalańayaq ketip baratır edi. Onıń janındaǵı adamlardıń hámmesi de basların orap alıp, jılap-eńirep tawǵa shıǵıp baratır edi.

31 Sol arada birew Dawıtqa:

– Axitofel de Abshalomnıń tárepin alǵan til biriktiriwshiler arasında eken, – dep xabarladı.

Sonda Dawıt: «Jaratqan Iye, Axitofeldiń keńesin joqqa shıǵara gór!» – dep duwa etti.

32 Dawıt Qudayǵa sıyınatuǵın tawdıń tóbesine jetip barǵanda, Ark tiyresinen bolǵan Xushay kiyimi jırtılǵan, basına topıraq shashılǵan halda onı qarsı aldı. 33 Dawıt oǵan bılay dedi:

– Meniń menen birge ketseń, maǵan júk bolasań. 34 Eger qalaǵa qaytıp barsań, Abshalomǵa: «Taqsır, siziń qulıńız bolmaqshıman. Burın ákeńizge qanday xızmet etken bolsam, sizge de solay xızmet etemen», – dep aytarsań. Usılay sen Axitofeldiń másláhátin meniń ushın bosqa shıǵarasań. 35 Ruwxaniyler Sadoq penen Abiyatar sol jerde seniń menen birge boladı. Patshanıń sarayında esitkenlerińniń hámmesinen olardı xabardar etip tur. 36 Sadoqtıń ulı Aximaas penen Abiyatardıń ulı Ionatan da sol jerde. Esitkenlerińniń hámmesin olar arqalı maǵan jetkerip turasań.

37 Solay etip, Dawıttıń dostısı Xushay Erusalimge ketti. Sol waqıtta Abshalom da Erusalimge kirip kiyatırǵan edi.