2Th 2 | KaaIBT22L | STEP | Tuwısqanlar! Endi Iyemiz Iysa Masiyxtıń qayta keliwine hám bizlerdiń Onıń aldına jıynalıwımızǵa baylanıslı sizlerden mınalardı ótinemiz:

‏ 2 Thessalonians 2

Nızamdı buzıwshınıń payda bolıwı

1 Tuwısqanlar! Endi Iyemiz Iysa Masiyxtıń qayta keliwine hám bizlerdiń Onıń aldına jıynalıwımızǵa baylanıslı sizlerden mınalardı ótinemiz: 2 Iyemizdiń kúniniń álle qashan kelgenin aytqan hár qanday payǵambarshılıq, sóz yamasa bizler jibergendey etip kórsetilgen xat sebepli aqıldan dárhal azıp, táshiwishlenbeńler. 3 Ózlerińizdi hesh kimge hesh qanday jol menen aldatpańlar. Sebebi sol kún keliwge deyin dáslep isenimnen qaytıw baslanıp, nızamdı buzıwshı, yaǵnıy táǵdirine nabıt bolıw jazılǵan adam payda boladı. 4 Sol adam – Qudayǵa yamasa adamlar «quday» dep sıyınatuǵın hár bir nársege qarsı shıǵıp, ózin hámmeden joqarı qoyadı, hátte, ol Qudaydıń Ibadatxanasındaǵı Muxaddesxanada otırıp, ózin «qudayman» dep járiyalaydı.

5 Sizler menen birge bolǵanımda usılardı aytqanım eslerińizde joq pa? 6 Sol adamdı házir ne uslap turǵanın bilesizler. Ol óz waqtında payda boladı. 7 Awa, nızamsızlıqtıń sırlı kúshleri álle qashan háreket etpekte. Biraq usı kúshti uslap turıwshı joldan alıp taslanbaǵansha, ol óz isin dawam ete beredi. 8 Bunnan soń, nızamdı buzıwshı payda boladı. Biraq Iyemiz Iysa onı awzınan shıqqan demi menen óltiredi hám Óziniń ullı saltanatı menen kelgende joq qıladı. 9 Sol adam shaytannıń kúshi menen kelip, hár túrli qúdiret, jalǵan belgiler menen tań qalarlıq nárselerdi 10 hám nabıt bolatuǵınlardı aldawshı hár túrli jamanlıqlardı kórsetedi. Óytkeni olar ózlerin qutqara alatuǵın haqıyqattı súyiwden bas tartqanlıqtan, nabıt boladı. 11 Sonlıqtan jalǵanǵa isensin dep, Quday olarǵa aldawshı bir kúsh jiberedi. 12 Solay etip, haqıyqatqa isenbey, jamanlıqtan ráhátlenetuǵınlardıń hámmesi húkim etiledi.

Bekkem turıńlar!

13 Biraq bizler Iyemiz súygen tuwısqanlarımız bolǵan sizler ushın hámme waqıt Qudayǵa shúkirlik etiwge parızlımız. Sebebi Quday Muxaddes Ruwx tárepinen muxaddes qılınıwıńız arqalı hám haqıyqatqa iseniwińiz arqalı qutqarılıwıńız ushın, sizlerdi áwel bastan tańlap alǵan edi. 14 Iyemiz Iysa Masiyxtıń ullılıǵına erisiwińiz ushın, bizler járiyalaǵan Xosh Xabar arqalı Quday sizlerdi usı qutqarılıwǵa shaqırdı. 15 Sol sebepli, tuwısqanlarım, bekkem turıńlar! Bizlerdiń sóz yamasa xat arqalı sizlerge úyretken tálimatımız boyınsha is tutıńlar.

16 Iyemiz Iysa Masiyxtıń Ózi hám bizlerdi súyip, miyrim-shápááti menen bizlerge sheksiz jubanısh hám jaqsı úmit bergen Ákemiz Quday 17 sizlerdiń kewillerińizdi jigerlendirip, hár qanday jaqsı iste hám sózde de kúsh-quwat bersin.