2Th 3 | KaaIBT22L | STEP | Qullası, tuwısqanlar, Iyemizdiń sózi sizlerdiń arańızdaǵı sıyaqlı erkin jayılıp, húrmetke bólene bersin dep, bizler ushın duwa etińler.

‏ 2 Thessalonians 3

Bizler ushın duwa etiń

1 Qullası, tuwısqanlar, Iyemizdiń sózi sizlerdiń arańızdaǵı sıyaqlı erkin jayılıp, húrmetke bólene bersin dep, bizler ushın duwa etińler. 2 Jaman hám jawız adamlardan qutılıwımız ushın da duwa etińler. Óytkeni adamlardıń hámmesi iseniwshi emes. 3 Biraq, Iyemiz sadıq. Ol sizlerge kúsh-quwat berip, shaytannan saqlaydı. 4 Iyemiz sizler menen qarım-qatnasta bolǵanlıqtan, buyırǵanlarımızdı islep atırǵanıńızǵa hám isleytuǵınıńızǵa isenemiz. 5 Iyemiz júreklerińizdi Qudaydı súyiwge hám Masiyxqa sadıq bolıwǵa baǵdarlasın.

Óz miynetińiz benen jasańlar!

6 Tuwısqanlar! Iyemiz Iysa Masiyxtıń atı menen buyıramız: bizlerden alǵan tálimattı tıńlamay, isjaqpaslıq etip júrgen barlıq tuwısqanlardan awlaq júrińler! 7 Bizlerden qalay órnek alıwıńız kerek ekenligin ózlerińiz bilesizler. Sebebi bizler arańızda bolǵanımızda, talapsız júrgen joqpız. 8 Hesh kimniń nanın biypul jemedik. Kerisinshe, hesh birińizge awırmanlıǵımız túspesin dep, kúni-túni awır miynet ettik. 9 Járdemińizdi qabıl etiwge haqımız bolmaǵanı sebepli emes, al sizler bizlerge eliklesin dep, órnek bolıwımız ushın usılay isledik. 10 Hátte, bizler sizler menen birge bolǵanımızda: «Kim de kim miynet etiwdi qálemese, awqat ta jemesin», – degen buyrıqtı bergen edik.

11 Óytkeni arańızdaǵı ayırımlardıń talapsız bolıp, hesh jumıs islemey, basqalardıń isine aralasıp júrgenin esitip atırmız. 12 Bunday adamlarǵa Iyemiz Iysa Masiyxtıń atı menen jalbarınamız hám mınanı buyıramız: tınısh miynet etip, óz nanın ózi tawıp jesin. 13 Al sizler, tuwısqanlar, jaqsı is islewden jalıqpańlar.

14 Eger bul xattaǵı sózlerimizge qulaq aspaǵanlar bolsa, onı ayırıp qoyıńlar. Onı uyaltıw ushın, baylanıstı úzińler. 15 Biraq, onı dushpan dep sanamay, tuwısqan sıpatında eskertińler.

Sońǵı sálemnama

16 Tınıshlıq beriwshi Iyemizdiń Ózi sizlerge hámme waqıtta, hár qanday jaǵdayda tınıshlıq bersin. Iyemiz hámmeńizge yar bolsın!

17 Men, Pavel, bul sálemdi óz qolım menen jazıp atırman. Meniń hár bir xatımda bul belgi bar. Men usılay jazaman.

18 Iyemiz Iysa Masiyxtıń miyrimi hámmeńizge yar bolsın!