‏ 2 Timothy 2

Iysa Masiyxtıń jaqsı áskeri

1Ulım, al sen Iysa Masiyx arqalı beriletuǵın miyrim menen kúshke tolıp bar. 2Kóplegen gúwalar aldında mennen óziń esitken sózlerdi isenimli adamlarǵa jetkiz. Sonda olar da basqalarǵa úyrete aladı. 3Masiyx Iysanıń jaqsı áskeri bolıp, meniń menen birge qıyınshılıqqa shıda. 4Xızmettegi ásker ózin áskerlikke shaqırǵan áskerbasınıń kewlinen shıǵıw ushın, turmıs isleri menen baylanbaydı. 5Jarısqa túsken adam da qaǵıyda boyınsha jarıspasa, jeńis tajın kiymeydi. 6Awır miynet etken diyxan zúráátten birinshi bolıp úles alıwı tiyis. 7Aytqanlarım haqqında jaqsılap oylap kór. Iyemizdiń Ózi saǵan hámmesin túsindiredi.

8Dawıttıń urpaǵınan shıqqan hám ólimnen qayta tirilgen Iysa Masiyxtı yadıńda saqla! Men járiyalap atırǵan Xosh Xabar – usı. 9Men usı Xosh Xabar ushın azap shegip, hátte, jınayatshı sıyaqlı tutqın bolıp baylandım. Biraq, Qudaydıń sózi baylawlı emes. 10Sonlıqtan men tańlap alınǵanlardıń da Masiyx Iysa arqalı qutqarılıwdı máńgilik saltanat penen alıwı ushın, hámme nársege shıdap atırman. 11Bul sóz isenimli: «Eger Onıń menen birge ólgen bolsaq,
Onıń menen birge jasaymız da.
12Eger sabırlılıq qılsaq,
Onıń menen birge patshalıq etemiz.
Eger Onnan waz keshsek,
Ol da bizden waz keshedi.
13Biz sadıq bolıp qalmasaq ta,
Ol sadıq bolıp qaladı.
Sebebi Ol Ózinen Ózi waz keshe almaydı».

Qudaydıń jaqsı xızmetshisi

14Usılardı iseniwshilerge esletip tur. Sózler tuwralı tartıspawdı olarǵa Quday aldında eskertip qoy. Tartıslar tıńlawshılardı aynıtıwdan basqa hesh nársege jaramaydı. 15Haqıyqat sózlerin durıs úyretetuǵın hám óz isi ushın uyatqa qalmaytuǵın, Qudayǵa unamlı, jaqsı xızmetshi bolıwǵa jan-tániń menen tırıs. 16Jaramas hám bos sózlerden awlaq bol. Óytkeni bunday sózler Qudaydan barǵan sayın uzaqlastıradı 17hám juqpalı jara sıyaqlı tarqaladı. Usınday sózlerdi aytıwshılar arasında Himeney hám Filit te bar. 18Olar haqıyqat jolınan adastı hám ólimnen qayta tiriliw álle qashan boldı dep, ayırım adamlardıń isenimin joq qılmaqta. 19Biraq Quday salǵan kúshli negiz bekkem turıptı. Sol negiz «Jaratqan Iye Ózine tiyisli bolǵanlardı biledi» ▼

▼ San 16:5.

hám «Jaratqan Iyege tiyislimen, degen hár bir adam jamanlıqtan awlaq júrsin», ▼

▼ San 16:26.

– degen sózler menen tastıyıqlanǵan.

20Úlken bir úyde tek altın hám gúmis ıdıslar emes, al aǵash hám ılay ıdıslar da bar. Olardıń birewleri sıylı, al birewleri sıysız is ushın qollanıladı. 21Solay etip, eger kim de kim ózin jamanlıqlardan tazalasa, onda ol sıylı, muxaddes qılınǵan, xojayınına paydalı hám hár bir jaqsı iske tayın ıdıs boladı.

22Al sen jaslıqtıń jaman háweslerinen awlaq bol. Iyemizge taza kewil menen sıyınatuǵınlar menen birlikte haqıyqatlıq, isenim, súyispenshilik hám tınıshlıqqa umtılıp jasa. 23Aqılsız hám mánissiz tartıslardan qash. Sebebi bulardıń jánjel tuwdıratuǵının bileseń. 24Iyemizdiń xızmetshisi jánjelpaz bolmawı kerek. Kerisinshe, ol hámme menen múláyim, tálim beriwge qábiletli hám sabırlı bolıwı tiyis. 25Jáne ol ózine qarsı bolǵanlarǵa álpayımlılıq penen jol-jorıq beriwi lazım. Sonda, múmkin, Quday sol adamlardıń da táwbege kelip, haqıyqatlıqtı biliwi ushın jol ashar. 26Solay etip, olardıń aqılı kiredi hám qálegenin isletiw ushın ózlerin tutqın qılǵan shaytannıń duzaǵınan qutıladı.