2Ti 3 | KaaIBT22L | STEP | Mınanı bilip qoy: dúnyanıń aqırǵı kúnlerinde awır waqıtlar keledi.

‏ 2 Timothy 3

Aqırzaman haqqında

1 Mınanı bilip qoy: dúnyanıń aqırǵı kúnlerinde awır waqıtlar keledi. 2 Adamlar ózin jaqsı kóretuǵın, dúnyaparaz, maqtanshaq, menmen, Qudayǵa til tiygizetuǵın, ata-anasına boysınbaytuǵın, jaqsılıqtı bilmeytuǵın, qudaysız, 3 miyrimsiz, kekshil, jalaxor, ózin tutıp bilmeytuǵın, jawız, jaqsılıqtıń dushpanı, 4 satqın, qızba hám shırrıq boladı. Olar Qudaydan góre, káyip-sapanı kóbirek jaqsı kóredi. 5 Ózlerin Qudaydıń jolı menen júrgen qılıp kórsetedi, biraq Onıń jolınıń kúshin tán almaydı. Bundaylardan awlaq bol. 6 Óytkeni olardıń geybirewleri úylerge jasırın kirip, gúnalarǵa batqan hám hár túrli jaman háweslerge berilgen sada hayallardı duzaqqa túsiredi. 7 Bul hayallar haqıyqatlıqtı bárqulla úyrenip, onı hesh qashan túsinip jete almaydı. 8 Yannis hám Yambris ^{▼▼ Yannis hám Yambris – Shıǵıw dáwirinde Muwsaǵa qarsı shıqqan faraonnıń eki sıyqırshısınıń atı (Shıǵ 7:10-12, 20-22; 8:16-19; 9:10-11 qarań).} Muwsaǵa qarsı shıqqanday, bul adamlar da haqıyqatqa qarsı turadı. Bundaylar – aqıl-oyları buzılǵan hám haqıyqıy isenimge iye emes adamlar. 9 Degen menen, olar uzaqqa barmaydı. Sebebi Yannis hám Yambris sıyaqlı, olardıń aqılsızlıǵı hámmege áshkara boladı.

Paveldiń sońǵı aqıl-násiyatları

10 Al sen meniń tálimatımdı, ómir tárizimdi, maqsetimdi, isenimimdi, sabırlılıǵımdı, súyispenshiligimdi hám turaqlılıǵımdı órnek tuttıń. 11 Basımnan keshken quwdalanıwlarımda hám Antioxiya, Ikoniya, Listra qalalarında shekken azaplarıma ^{▼▼ Elsh 14:1-7, 19-20.} sherik boldıń. Men qanshama azaplarǵa shıdam berdim! Iyemiz meni hámmesinen qutqardı. 12 Haqıyqatında, Masiyx Iysaǵa tiyisli bolıp, Qudaydıń jolı menen jasawdı qálewshilerdiń hámmesi de quwdalanadı. 13 Biraq, jaman hám jalatay adamlar aldap hám aldanıp, bunnan da beter jaman bolıp bara beredi.

14 Al sen óziń úyrengen hám isengen haqıyqatqa sadıq qal. Óytkeni bunı kimlerden úyrengenińdi bileseń. 15 Jáne de, sen Muxaddes Jazıwlardı balalıǵıńnan beri bileseń. Bul Jazıwlar saǵan Masiyx Iysaǵa degen isenim arqalı qutqarılıw ushın danalıq bere aladı. 16 Muxaddes Jazıwlardıń hámmesi Qudaydıń Muxaddes Ruwxınıń ilhamı menen jazılǵan bolıp, tálim beriw, áshkaralaw, dúzetiw hám haqıyqatlıq boyınsha tárbiyalaw ushın paydalı. 17 Olar tiykarında Qudaydıń adamı hár bir jaqsı iske tayar bolıw ushın jetilisip baradı.