2Ti 4 | KaaIBT22L | STEP | Qudaydıń aldında hám tiriler menen ólilerdi húkim etetuǵın Masiyx Iysanıń aldında Onıń qayta keliwi hám Patshalıǵı haqı qatań buyıraman:

‏ 2 Timothy 4

1 Qudaydıń aldında hám tiriler menen ólilerdi húkim etetuǵın Masiyx Iysanıń aldında Onıń qayta keliwi hám Patshalıǵı haqı qatań buyıraman: 2 Qudaydıń sózin járiyala. Zamannıń qolaylı yamasa qolaysız bolıwına qaramay, bul xızmetti dawam et. Adamlarǵa tolıq sabırlılıq penen tálim berip, áshkarala, jolǵa sal hám aqıl-násiyat et. 3 Sebebi adamlar durıs tálimattı tıńlamaytuǵın waqıtlar keledi. Olar jaman qálewlerine berilip, qulaqlarına jaǵatuǵın sózlerdi sóyleytuǵın kóp muǵallimlerdi átiraplarına jıynaydı. 4 Olar haqıyqatlıqtı esitpew ushın qulaqların jawıp, ańızlarǵa qulaq asatuǵın boladı. 5 Biraq sen hár qanday jaǵdayda sergek bol. Qıyınshılıqlarǵa shıdam ber, Xosh Xabar ushın miynet etip, óz xızmetińdi orınla.

6 Óytkeni meniń qanım tógilip, ishimlik sadaqası bolmaqtaman hám dúnyadan ótetuǵın waqtım da jaqınlastı. 7 Men ullı sawashta gúrestim, jarıstı juwmaqladım hám isenimimdi saqlap qaldım. 8 Endi bolsa, men ushın haqıyqatlıq tajı tayın tur. Ádil húkim etiwshi bolǵan Iyemiz sol kúni usı tajdı maǵan, tek ǵana maǵan emes, al Onıń qayta keliwin intizarlıq penen kútkenlerdiń hámmesine de beredi.

Jeke tilekler hám sálemnama

9 Janıma tezirek keliwge bar kúshiń menen tırıs. 10 Sebebi Dimas bul dúnyanı súygenlikten meni taslap, Salonikaǵa ketti. Al Kriskiy Galatiyaǵa, Titus Dalmatiyaǵa ketti. 11 Janımda tek Luka ǵana bar. Sen Marktı tawıp, óziń menen birge alıp kel. Ol meniń xızmetime járdem beredi. 12 Men Tixikti Efeske jiberdim. 13 Kelerińde, meniń Troasta, Karptıń qasında qaldırıp ketken shapanımdı alıp kel. Jáne de kitaplarımdı, ásirese oralǵan teri kitaplardı alıp kel. 14 Temir ustası Iskender maǵan kóp jamanlıq isledi. Iyemiz oǵan islegenlerine qaray qaytarsın. 15 Sen de onnan abaylı bol. Óytkeni ol bizlerdiń sózlerimizge qattı qarsı boldı.

16 Birinshi márte ózimdi aqlamaqshı bolıp juwap bergenimde, meni hesh kim jaqlamadı. Kerisinshe, hámme meni taslap ketti. Bunıń ushın Quday olardı keshirsin. 17 Biraq, Qudaydıń Xosh Xabarı men arqalı tolıq járiyalanıwı ushın hám pútkil milletler bunı esitiwi ushın, Iyemiz maǵan járdemge kelip, kúsh-quwat berdi. Ol meni arıslannıń awzınan qutqarıp qaldı. 18 Iyemiz meni hár qanday jamanlıqtan qutqaradı hám Óziniń Aspan Patshalıǵına aman-esen aparadı. Oǵan máńgi-baqıy alǵıs-maqtawlar bolsın! Awmiyin.

19 Priskilla menen Akilaǵa hám Onisifordıń úy-ishine sálem ayt. 20 Erastus Korinfte qaldı. Trofimdi awırıw halında Militte qaldırdım. 21 Qıstan burın keliwge bar kúshiń menen tırıs. Evbul, Pud, Lin, Klavdiya hám barlıq iseniwshi tuwısqanlar saǵan sálem aytıp atır. 22 Iyemiz seniń ruwxıń menen birge bolsın! Qudaydıń miyrimi sizlerge yar bolǵay!