‏

Elshi Yuxan bul úshinshi xatın da I ásirdiń aqırında Gayus degen adamǵa jazǵan. Yuxan Gayusqa el aralap júrgen Qudaydıń xızmetshilerin qabıl alıp, olarǵa súyispenshilik penen járdem beriw kerekligi haqqında aytadı. Yuxan Gayustıń jámáátinen alǵan xabarı boyınsha, Diotref atlı qudaysız bir adam jámáát basqarıwın óz qolına alıp, Yuxan jibergen muǵallimlerdi qabıl qılmaǵan eken. Olarǵa miymandoslıq etken tuwısqanların bolsa jámáátten quwıp shıǵarǵan eken. Yuxan Diotreftiń bul qılmısların qaralaydı.

‏ 3 John

Sálemnama

1Men, aqsaqaldan, shın júregimnen súyetuǵın súyikli tuwısqanım Gayusqa sálem!

2Súyikli tuwısqanım! Ruwxıy ómiriń saw bolǵanday, hámme nársede tabısqa erisip, deniń saw bolıwı ushın duwa etip atırman. 3Ayırım tuwısqanlarımız kelip, seniń haqıyqatqa sadıq ekeniń hám haqıyqat jolı menen júrgeniń haqqında gúwalıq bergende qattı quwandım. 4Meniń ushın balalarımnıń haqıyqat jolı menen júrgenin esitiwden artıq quwanısh joq.

Awızbirshilik hám alawızlıq

5Súyikli tuwısqanım! Biytanıs bolıwına qaramay, sen tuwısqanlarımızǵa shın júrekten járdem berip atırsań. 6Olar iseniwshiler jámááti aldında seniń súyispenshiligiń haqqında gúwalıq berdi. Olardı Qudayǵa minásip túrde jolǵa atlandırıp jiberseń, jaqsı is qılǵan bolar ediń. 7Sebebi olar isenbeytuǵın adamlardan hesh qanday járdem qabıl etpey, Iysanıń atı ushın jolǵa shıqqan edi. 8Sonlıqtan haqıyqatqa sherik bolıwımız ushın bunday adamlardı qollap quwatlawımız kerek.

9Men iseniwshiler jámáátine bazı nárselerdi jazǵan edim, biraq olardıń arasında birinshi bolıwdı jaqsı kóretuǵın Diotref bizlerdi qabıl etpey atır. 10Sonlıqtan eger barsam, onıń islerin áshkara etemen. Ol bizlerdi jaman sózler menen nadurıs ayıplap júr. Bular jetpegendey, ol tuwısqanlardı da qabıl etpey atır, hátte, qabıl qılmaqshı bolǵanlarǵa tosqınlıq jasap, olardı jámáátten quwıp atır.

11Súyikli tuwısqanım, jaman emes, jaqsı órnek al. Jaqsılıq isleytuǵın adam Qudaydan. Jamanlıq isleytuǵın adam Qudaydı kórgen emes. 12Dimitriy haqqında hámme adam, haqıyqattıń ózi de jaqsı gúwalıq berip atır. Bizler de jaqsı gúwalıq berip atırmız. Gúwalıǵımızdıń durıs ekenin sen bileseń.

Sońǵı sálemnama

13Saǵan jazajaq kóp nárselerim bar edi, biraq sıya hám qálem menen jazıwdı qálemeymen. 14Seni tez arada kóriw úmitindemen, sonda júzbe-júz sóylesemiz. Aman bol! Doslar saǵan sálem aytıp atır. Sen de sol jerdegi doslarǵa atpa-at sálem aytıp qoy. 15