Act 10 | KaaIBT22L | STEP | Kesariyada «Italiyalı» degen áskeriy bólimniń júzbasısı bolǵan Korneliy atlı bir adam bar edi.

‏ Acts 10

Rimli júzbası Korneliy

1 Kesariyada «Italiyalı» degen áskeriy bólimniń júzbasısı bolǵan Korneliy atlı bir adam bar edi. 2 Ol pútkil shańaraǵı menen Qudaydan qorqatuǵın, dinshil adam edi. Xalıqqa kóp járdem berip, Qudayǵa bárqulla duwa etetuǵın edi. 3 Bir kúni tústen keyin saat úshler shamasında Qudaydıń bir perishtesiniń oǵan kelip: «Korneliy!» dep aytqanın ol bir ayanda anıq kórdi.

4 Korneliydi qorqınısh biylep, ol kózlerin perishtege tikti de:

– Newe, Iyem? – dedi.

Perishte oǵan juwap berip:

– Etken duwalarıń menen bergen qayır-sadaqalarıń Qudayǵa jetip bardı. Quday olardı este saqladı. 5 Endi Ioppaǵa adamlardı jiberip, Petr dep atalatuǵın Shimon degen bir adamdı shaqırt. 6 Ol úyi teńiz jaǵasında jaylasqan Shimon atlı bir teri iylewshiniń úyinde qonaqta ^{▼▼ Bazı qoljazbalarda mına sózler de bar: «Ol saǵan seni hám pútkil xojalıǵıńdı qutqaratuǵın sózlerdi aytadı».}, – dedi.

7 Ózi menen sóylesken perishte ketkende, Korneliy xızmetshilerinen ekewin hám óz járdemshileriniń ishinen dinshil bir áskerdi shaqırdı. 8 Olarǵa hámmesin túsindirip, Ioppaǵa jiberdi.

Petr kórgen ayan

9 Erteńine saat on ekiler shamasında olar jol júrip qalaǵa jaqınlasqanda, Petr duwa etiw ushın tamnıń tóbesine shıqtı. 10 Ol ash bolıp, awqat jegisi keldi. Awqat tayarlanıp atırǵanda, ayrıqsha jaǵdayǵa tústi. 11 Sonda ol aspannıń ashılǵanın hám dasturxan sıyaqlı bir nárseniń tórt múyeshi asılǵan halında jerge túsip kiyatırǵanın kórdi. 12 Onıń ishinde hár túrli tórt ayaqlı janıwarlar, jer bawırlawshılar hám aspan qusları bar edi. 13 Bir dawıs oǵan:

– Petr, tur. Soyıp je, – dedi.

14 – Yaq, Iyem. Men hesh qashan haram yamasa mákiriw zat jegen emespen, ^{▼▼ Leb 11:1-47.} – dedi Petr.

15 Dawıs jáne ekinshi ret esitilip, Petrge:

– Qudaydıń hadallaǵanın sen haram deme! – dedi.

16 Bul úsh márte tákirarlanıp, dasturxan dárhal aspanǵa kóterilip ketti.

17 Kórgen ayanınıń neni ańlatatuǵının oylap, Petr hayran bolıp turǵanda, Korneliy jibergen adamlar Shimonnıń úyin sorap, qapınıń aldında toqtap qaldı. 18 Olar dawıslap:

– Petr dep atalatuǵın Shimon usı jerde turıp atır ma? – dep soradı.

19 Petr ele ayan haqqında oylanıp turǵanda, Muxaddes Ruwx oǵan:

– Áne, úsh adam seni izlep júr. 20 Qáne, ornıńnan turıp, tómenge tús. Hesh ekilenbesten, olar menen birge ket. Sebebi olardı Men jiberdim, – dedi.

21 Petr tómenge túsip, adamlarǵa:

– Sizler izlep júrgen adam men bolaman. Qanday jumıs penen keldińler? – dedi.

22 Olar Petrge:

– Korneliy degen haq hám Qudaydan qorqatuǵın, pútkil yahudiyler húrmet etetuǵın bir júzbası bar. Oǵan bir muxaddes perishte seni úyine shaqırtıp, sózlerińdi tıńlawdı buyırıptı, – dedi.

23 Sonda Petr olardı ishke mirát etip, miyman qıldı.

Petr Korneliydiń úyinde

Erteńine Petr turıp, olar menen birge jolǵa shıqtı. Ioppadaǵı tuwısqanlardıń ayırımları da onıń menen birge ketti. 24 Olar kelesi kúni Kesariyaǵa keldi. Korneliy aǵayin-tuwǵanların hám jaqın dosların jıynap, olardı kútip otırǵan edi. 25 Petr úyge kirgende, Korneliy onı qarsı aldı da, ayaqlarına jıǵılıp, oǵan tabındı. 26 Biraq Petr onı turǵızıp:

– Tur, men de adamman-ǵo, – dedi.

27 Petr Korneliy menen sóylesip ishke kirgende, kóp adamlardıń jıynalıp otırǵanın kórip, 28 olarǵa bılay dedi:

– Yahudiydiń basqa millet adamı menen qarım-qatnasta bolıp, oǵan barıwı qadaǵan ekenin bilesizler. Biraq Quday maǵan hesh adamdı haram hám iplas demew kerekligin kórsetken edi. 29 Sonlıqtan shaqırılǵanımda bas tartpay usı jerge keldim. Endi meni ne sebepten shaqırǵanıńızdı sorawıma bola ma?

30 Korneliy bılay dedi:

– Tórt kún aldın usınday waqıtta, tústen keyin saat úshte úyde duwa etip otır edim ^{▼▼ usınday waqıtta, tústen keyin saat úshte úyde duwa etip otır edim – Bazı qoljazbalarda: «usınday waqıtqa deyin men oraza uslap, saat úshlerde duwa etip atırǵan edim».}. Tosattan jarqıraǵan kiyimli bir adam aldımda payda bolıp, 31 maǵan: «Korneliy! Quday seniń duwańdı esitip, bergen qayır-sadaqalarıńdı este saqladı. 32 Ioppaǵa adam jiberip, Petr dep atalatuǵın Shimondı shaqırt. Ol teńiz jaǵasında jasaytuǵın teri iylewshi Shimonnıń úyinde turıp atır ^{▼▼ Bazı qoljazbalarda mına sózler de bar: «Ol kelip, saǵan sóz aytadı».}», – dedi. 33 Sonlıqtan men sizge dárriw adam jolladım. Siz de kelip, jaqsı qıldıńız. Endi bizler hámmemiz Iyemizdiń sizge buyırǵan hár bir nársesin tıńlaw ushın Quday aldında otırmız.

34 – 35 Sonda Petr bılay dep sózin basladı:

– Qudaydıń adamlardı ayırmaytuǵının, biraq Ózinen qorqqan hám haq is islewshi adamdı milletine qaramay qabıl etetuǵının haqıyqattan túsinip turman. 36 Quday Izrail xalqına Iysa Masiyx arqalı tınıshlıq Xosh Xabarın járiyalaǵanın bilesizler. Iysa Masiyx – hár bir adamnıń Iyesi. 37 Yaqıya suwǵa shomıldırılıwdı járiyalaǵannan soń, Galiladan baslap pútkil Yahudiyada bolǵan mına waqıyalardan da xabarıńız bar: 38 Quday nasıralı Iysaǵa Muxaddes Ruwx hám qúdiret berip, xızmetke tayınladı. Iysa hámme jerdi aylanıp jaqsılıq isledi, shaytannıń qol astında bolǵanlardıń hámmesine shıpa berdi. Óytkeni Quday Onıń menen birge edi. 39 Iysanıń yahudiylerdiń úlkesinde hám Erusalimde islegen isleriniń hámmesine bizler gúwamız. Adamlar Onı atanaq aǵashqa shegelep óltirgen edi. 40 Biraq Quday Iysanı úshinshi kúni ólimnen tiriltti hám Onıń adamlarǵa kóriniwine jol qoydı. 41 Ol adamlardıń hámmesine emes, al Qudaydıń aldın ala tańlaǵan gúwalarına, yaǵnıy bizlerge, ólimnen qayta tirilgennen keyin Ózi menen birge iship-jegenlerge kórindi. 42 Ol Óziniń Quday tárepinen tirilerdi hám ólilerdi húkim etiwshi bolıp tayınlanǵanın xalıqqa járiyalawımızdı hám bul haqqında gúwalıq beriwimizdi buyırdı. 43 Payǵambarlardıń hámmesi Iysa haqqında gúwalıq berip, Oǵan isengen hár bir adamnıń gúnaları Onıń atı menen keshiriletuǵının aytqan edi.

44 Petr ele usı sózlerdi sóylep turǵanda, Qudaydıń sózlerin esitken hár bir adamnıń ústine Muxaddes Ruwx tústi. 45 Petr menen birge kelgen súnnetli iseniwshiler Muxaddes Ruwxtıń sıyı basqa millet adamlarınıń ústilerine de jawǵanına tań qalıstı. 46 Sebebi olardıń ruwxıy tillerde sóylep, Qudaydı alǵıslap turǵanın esitti.

Sonda Petr:

47 – Bular da anıq bizler sıyaqlı Muxaddes Ruwxtı aldı. Olardıń suwǵa shomıldırılıwın kim qadaǵan ete aladı? – dedi.

48 Solay etip, Petr olardıń Iysa Masiyxtıń atı menen suwǵa shomıldırılıwın buyırdı. Sońınan olar Petrden bir neshe kún qalıwın ótinish etti.