Act 11 | KaaIBT22L | STEP | Elshiler menen Yahudiyadaǵı tuwısqanlar basqa milletlerdiń de Qudaydıń sózin qabıl etkenin esitti.

‏ Acts 11

Petrdiń bolǵan waqıyanı túsindiriwi

1 Elshiler menen Yahudiyadaǵı tuwısqanlar basqa milletlerdiń de Qudaydıń sózin qabıl etkenin esitti. 2 Sonlıqtan Petr Erusalimge kelgende, súnnetli iseniwshiler onı ayıplap:

3 – Sen súnnetsiz adamlardıń úyine barıp, olar menen birge awqatlanıpsań! – dedi.

4 Sonda Petr sóz baslap, bolǵan waqıyanı izbe-izlik penen aytıp berdi:

5 – Men Ioppa qalasında duwa etip otırǵan edim. Ayrıqsha jaǵdayǵa túsip, bir ayan kórdim: dasturxanǵa uqsaǵan bir nárse tórt múyeshi asılǵan halında aspannan túsip, meniń janıma deyin keldi. 6 Kózlerimdi tigip, dasturxanǵa dıqqat penen qaradım. Dasturxannıń ishinde jer júzinde jasawshı tórt ayaqlı janıwarlardı, jabayı haywanlardı, jer bawırlawshılardı hám aspan qusların kórdim. 7 Sonda maǵan bir dawıstıń: «Petr, tur. Soyıp je», – degenin esittim. 8 «Yaq, Iyem! Awzıma hesh qashan haram yamasa mákiriw nárse alǵanım joq», – dedim. 9 Dawıs aspannan ekinshi márte esitilip: «Qudaydıń hadallaǵanın sen haram deme!» – dedi.

10 Bul úsh márte tákirarlandı. Sońınan hámmesi jáne aspanǵa alındı. 11 Tap sol waqıtta Kesariyadan maǵan jiberilgen úsh adam men bolıp atırǵan úydiń aldında turǵan edi. 12 Muxaddes Ruwx maǵan hesh ekilenbey olar menen ketiwdi ayttı. Mına altı tuwısqanımız da meniń menen birge shıǵıp, sol adamnıń úyine bardıq. 13 Ol bizlerge qalayınsha bir perishteni kórgenin aytıp berdi. Perishte onıń úyinde payda bolıp, ózine: «Ioppaǵa adam jollap, Petr dep atalatuǵın Shimondı shaqırt. 14 Ol saǵan seni hám pútkil xojalıǵıńdı qutqaratuǵın sózlerdi aytadı», – depti. 15 Men sóyley baslaǵannan-aq, eń basta bizlerdiń ústimizge túskendey, olardıń ústilerine de Muxaddes Ruwx tústi. 16 Sonda Iyemizdiń mına sózleri yadıma tústi: «Yaqıya suw menen shomıldırdı, al sizler Muxaddes Ruwx penen shomıldırılasızlar». 17 Solay etip, Quday Iyemiz Iysa Masiyxqa isenetuǵın bizlerge bergen sıyın olarǵa da berse, Qudayǵa qarsı shıǵatuǵınday men kim bolıppan?

18 Bul sózlerdi esitip, olar tınıshlandı. Qudaydı alǵıslap bılay dedi:

– Demek, Quday basqa milletlerge de táwbe etip, máńgilik ómirge iye bolıw múmkinshiligin beripti.

Antioxiyadaǵı iseniwshilerdiń jámááti

19 Stepan óltirilgen kúnnen baslanǵan quwdalaw sebepli tarqalǵan iseniwshiler Fenikiya, Kipr hám Antioxiyaǵa shekem bardı. Olar Qudaydıń sózin tek yahudiylerge járiyalaytuǵın edi. 20 Biraq, olardıń arasınan kiprli hám kireneli ayırım adamlar Antioxiyaǵa barıp, greklerge de Iyemiz Iysa tuwralı Xosh Xabardı járiyalap júrdi. 21 Iyemizdiń qolı olar menen birge bolǵanlıqtan, kóp adamlar isenip, Iyemizdiń jolına tústi. 22 Bul haqqında xabar Erusalimdegi iseniwshilerdiń jámáátine jetip barǵanda, olar Barnabanı Antioxiyaǵa jiberdi. 23 Barnaba sol jerge kelgende, Qudaydıń miyrimin kórip quwandı. Olardıń hámmesine Iyemizge shın kewilden sadıq bolıńlar, dep aqıl-násiyat berdi. 24 Óytkeni ol Muxaddes Ruwxqa tolǵan, isenimi kúshli, jaqsı adam edi. Solay etip, kóp adamlar Iyemizge alıp kelindi. 25 Sonda Barnaba Shauldı izlew ushın Tarsusqa ketti. 26 Onı tawıp, Antioxiyaǵa ákeldi. Solay etip, Barnaba menen Shaul tolıq bir jıl sol jerdegi iseniwshiler jámááti menen birge jıynalıp, kóp adamlarǵa tálim berdi. Usı Antioxiya qalasındaǵı shákirtler birinshi márte masiyxıylar ^{▼▼ Masiyxıylar – grekshe xristianlar. Yaǵnıy, Iysa Masiyxtı Qutqarıwshım hám Iyem dep qabıl etken iseniwshi adamlar.} dep ataldı. 27 Sol kúnleri Erusalimnen Antioxiyaǵa bir neshe payǵambarlar keldi. 28 Olardan Agabus atlı birewi ornınan turdı hám Muxaddes Ruwxtan ilhamlanıp pútkil jer júzinde ashlıq bolatuǵının ayttı. Bul ashlıq imperator Klavdiydiń ^{▼▼ Imperator Klavdiy – biziń eramızdıń 41–54 jıllarında Rim imperatorı bolǵan adam.} zamanında boldı. 29 Sonda shákirtler Yahudiyada jasaytuǵın tuwısqanlarǵa qollarınan kelgeninshe aqshalay járdem beriwge qarar etti. 30 Olar jıynalǵan aqshalardı iseniwshiler jámáátiniń aqsaqallarına Barnaba hám Shaul arqalı jiberip, usı qarardı orınladı.