‏ Acts 12

Yaqıptıń ólimi, Petrdiń qamalıwı

1Sol waqıtta patsha Hirod iseniwshiler jámáátiniń geybir adamların quwdalay basladı. 2Ol Yuxannıń tuwısqanı Yaqıptı qılısh penen óltirtti. 3Bunıń yahudiy basshılarına jaqqanın kórip, izinen Petrdi de uslatpaqshı boldı. Ashıtqısız nan bayramı ▼

▼ Ashıtqısız nan bayramı – sózlikke qarań.

kúnleri edi. 4Hirod Petrdi uslatıp, qamaqqa saldırdı. Onı qarawıllawdı hár biri tórt áskerden ibarat bolǵan tórt áskeriy toparǵa tapsırdı. Sebebi Qutqarılıw bayramı ▼

▼ Qutqarılıw bayramı – sózlikke qarań.

nan soń, onı xalıqtıń aldına shıǵarıw niyetinde edi.

5Solay etip, Petr qamaqqa alındı. Biraq iseniwshiler jámááti ol ushın Qudayǵa bar jigeri menen duwa etti.

Petrdiń qamaqtan azat bolıwı

6Hirodtıń Petrdi xalıqtıń aldına shıǵarmaqshı bolǵan kúninen aldınǵı kúni túnde, ol eki áskerdiń ortasında qos shınjır menen baylawlı halında uyıqlap atır edi. Qapınıń awzında turǵan qarawıllar da qamaqtı qarawıllap tur edi. 7Tosattan Iyemizdiń bir perishtesi payda bolıp, qamaqtıń ishi jarqırap ketti.

Perishte Petrdiń búyirinen túrtip, onı oyattı da:

– Tez ornıńnan tur, – degende, Petrdiń qollarındaǵı shınjırlar sheshilip, túsip ketti. 8Perishte oǵan:

– Belińdi buwıp, ayaq kiyimińdi kiy, – dedi. Petr usılay isledi. Perishte oǵan:

– Shapanıńdı kiyip, meniń izime er, – dedi.

9Petr qamaqxanadan shıǵıp, onıń izine erdi. Biraq, perishteniń qılıp atırǵan isleriniń ońında bolıp atırǵanın bilmey, ayan kórip turman, dep oyladı. 10Olar birinshi hám ekinshi qarawıllardan ótip, qalaǵa shıǵatuǵın temir dárwazaǵa keldi. Dárwaza olarǵa óz-ózinen ashıldı. Olar sırtqa shıǵıp bir kóshe ótkende, perishte birden Petrdiń janınan ǵayıp boldı.

11Sonda ózine kelgen Petr: «Iyemizdiń Óz perishtesin jiberip, meni Hirodtıń qolınan hám yahudiy xalqınıń meniń basıma túsiwin, dep kútken barlıq bálelerden qutqarǵanın endi haqıyqattan túsinip turman», – dedi.

12Petr bunı túsingennen soń, Mark dep atalatuǵın Yuxannıń anası Máriyamnıń úyine ketti. Ol jerde kóp adamlar jıynalıp, duwa etip otırǵan edi. 13Petr sırtqı qapını qaqqanda, Roda atlı bir xızmetshi qız kim ekenin biliw ushın qapıǵa keldi. 14Ol Petrdiń dawısın tanıp, qattı quwanǵanınan qapını ashpay, qaytadan ishke juwırıp: «Petr qapınıń aldında tur», – dep xabar berdi.

15«Esiń durıs pa?» – desti oǵan. Al qız sózinde turıp alǵanlıqtan, olar: «Bul onıń perishtesi», – dedi.

16Biraq Petr qapını qaǵıwdı dawam etti. Olar qapını ashıp, onı kórgende hayran qaldı. 17Petr olarǵa úndemewlerin qolı menen ımlap kórsetti de, Iyemizdiń onı qamaqtan qalay shıǵarǵanın aytıp berdi. Sońınan: «Bul xabarlardı Yaqıpqa hám basqa tuwısqanlarımızǵa jetkizińler», – dep, sol jerden shıǵıp, basqa jaqqa ketti.

18Tań atqanda, Petrge ne bolǵanın túsinbey, áskerler qattı albırastı. 19Hirod Petrdi izletti. Taba almaǵannan soń, qarawıllardı sorawǵa tutıp, olardı óltiriwdi buyırdı.

Hirod patshanıń ólimi

Bunnan soń, Hirod Yahudiyadan Kesariyaǵa ketip, bir qansha waqıt sol jerde qaldı. 20Ol Tir hám Sidon turǵınlarına qáhárli edi. Sonda olar óz ara kelisip, Hirodqa keldi. Patshanıń isenimli xızmetshisi Blastustı óz táreplerine awdarıp, jarastırıwdı soradı. Óytkeni olardıń úlkesiniń azıq-awqatı patshanıń úlkesinen ǵárezli edi.

21Belgilengen kúnde patshalıq lipasların kiygen Hirod taxtına otırdı da, xalıqqa sóz sóyledi. 22Sonda xalıq: «Bul adamnıń dawısı emes, qudaydıń dawısı», – dep baqırıstı. 23Sol waqıtta-aq Iyemizdiń bir perishtesi Hirodtı urıp jiberdi. Sebebi ol Qudayǵa beriw kerek bolǵan dańqtı ózi alǵan edi. Sonda onıń denesin qurtlar kemirip, ol jan tapsırdı.

24Al Qudaydıń sózi jayılıp, iseniwshilerdiń sanı arta berdi.

25Tapsırmanı orınlaǵan Barnaba menen Shaul Mark dep atalatuǵın Yuxandı ózleri menen birge alıp, Erusalimnen qaytıp keldi.