Act 14 | KaaIBT22L | STEP | Ikoniyada Pavel menen Barnaba ádettegidey yahudiylerdiń májilisxanasına barıp, sonday tásirli waz aytqanlıqtan, yahudiylerden de, greklerden de kóp adam isendi.

‏ Acts 14

Ikoniyada

1 Ikoniyada Pavel menen Barnaba ádettegidey yahudiylerdiń májilisxanasına barıp, sonday tásirli waz aytqanlıqtan, yahudiylerden de, greklerden de kóp adam isendi. 2 Biraq, isenbeytuǵın yahudiyler basqa millet adamların tuwısqanlarǵa qarsı óshegistirip, olardıń aqıl-oyın uwladı. 3 Pavel menen Barnaba ol jerde uzaq waqıt qaldı hám Iyemizge súyenip, Qudaydıń sózin batırlıq penen aytıp júrdi. Iyemiz olar arqalı káramatlı belgiler hám tań qalarlıq nárselerdi kórsetip, Óz miyrimi haqqında sózlerdi tastıyıqladı. 4 Qala xalqı ekige bólinip, geybirewleri yahudiylerdiń, geybirewleri elshilerdiń tárepine ótti. 5 Yahudiyler menen basqa millet adamları óz basshıları menen birlikte elshilerge jábir berip, olardı tas boran qılmaqshı boldı. 6 Biraq bunı bilip qoyǵan Pavel menen Barnaba Likaoniyanıń Listra hám Derbe qalalarına hám sol átiraplarǵa qashıp barıp, 7 sol jerlerde de Xosh Xabardı járiyalawdı dawam etti.

Listra hám Derbede

8 Listrada eki ayaǵı láń bir adam bar edi. Ol ishten láń bolıp tuwılıp, hesh qashan júrmegen edi. 9 Bul adam Paveldiń sózlerin tıńlap otırǵanda, Pavel oǵan tigilip qarap, shıpa tabatuǵınına isenimi bar ekenin kórdi de, 10 qattı dawıslap:

– Ayaqlarıńda tik tur ^{▼▼ Ayaqlarıńda tik tur – Bazı qoljazbalarda: «Iysa Masiyxtıń atı menen saǵan aytaman: ayaqlarıńda tik tur».}, – dedi.

Sol adam ornınan ushıp turdı da, júre basladı.

11 Xalıq Paveldiń islegen isin kórgende, likaoniya tilinde:

– Qudaylar adam pishinine enip, bizlerge kelipti, – dep baqırıstı.

12 Olar Barnabanı Zevs, Paveldi sóz sóylegeni ushın Hermes dep atadı. 13 Qalanıń sırtında jaylasqan Zevs ibadatxanasınıń ruwxaniyi qala dárwazasına ógizlerdi hám gúl sheńberlerin alıp keldi de, xalıq penen birlikte elshilerge qurbanlıq bermekshi boldı.

14 Biraq elshiler – Barnaba menen Pavel bunı esitkende kiyimlerin jırtıp, kópshiliktiń arasına ózlerin urdı da, bılay dep baqırdı:

15 – Adamlar! Nege bunday islep atırsızlar? Bizler de sizler sıyaqlı adamlarmız! Sizlerdiń bul mánissiz nárselerdi taslap, aspandı, jerdi, teńizdi hám olardıń ishindegilerdiń hámmesin jaratqan tiri Qudayǵa júz burıwıńız ushın Xosh Xabardı járiyalap atırmız. 16 Quday ótken áwladlardıń waqtında barlıq milletlerdi óz ómir jolları menen júriwge qaldırdı. 17 Soǵan qaramastan, Ózi haqqında gúwalıq beriwdi toqtatpay, sizlerge jaqsılıq islep kelmekte: Ol aspannan jawın jawdırıp, jemislerge bay máwsimlerdi beredi. Sizlerdi azıq penen toydırıp, júregińizdi quwanıshqa toltıradı.

18 Usı sózler menen, olar ózlerine qurbanlıq bermewge xalıqtı zorǵa degende kóndirdi ^{▼▼ Bazı qoljazbalarda mına sózler de bar: «Olardı úylerine qaytardı. Ózleri bolsa jáne sol jerde tálim beriwdi dawam etti».}.

19 Biraq Pisidiyanıń Antioxiya hám Ikoniya qalalarınan kelgen ayırım yahudiyler xalıqtı óz tárepine awdırıp ^{▼▼ ayırım yahudiyler xalıqtı óz tárepine awdırıp – Bazı qoljazbalarda «ayırım yahudiyler xalıqtı óz tárepine awdırdı. Elshiler batıllıq penen waz etip turǵanda, sol yahudiyler: „Olar hesh qanday shınlıqtı aytqanı joq, hámme sózleri jalǵan“, – dep, xalıqtı elshilerden júz burıwǵa shaqırıp» degen sózler de bar.}, Paveldi tas boran qıldı. Onı óldi dep oylap, qalanıń sırtına súyrep shıǵarıp tasladı. 20 Degen menen, shákirtler átirapına jıynalǵanda, Pavel ózine kelip ornınan turdı da, qalaǵa qayttı. Erteńine ol Barnaba menen birge Derbege ketti.

Siriya Antioxiyasına qaytıw

21 Olar Xosh Xabardı Derbe qalasında járiyalap, kóp shákirt arttırǵannan soń, Pisidiyadaǵı Listra, Ikoniya hám Antioxiya qalalarına qaytıp keldi. 22 Jol-jónekey shákirtlerdiń janlarına kúsh-quwat berip, isenimde bekkem turıwdı úgit-násiyat etti de: «Qudaydıń Patshalıǵına kiriwimiz ushın, kóp qıyınshılıqlardan ótiwimiz tiyis», – dedi. 23 Pavel menen Barnaba hár bir iseniwshi jámáátte aqsaqallardı tayınladı. Oraza tutıp, duwa etkennen soń, olardı ózleri isenetuǵın Iyemizdiń qolına tapsırdı.

24 Sońınan olar Pisidiya úlkesi arqalı ótip, Pamfiliya úlkesine keldi. 25 Pergiyada Qudaydıń sózin járiyalaǵannan soń, Antaliyaǵa ketti. 26 Sol jerden keme menen Antioxiyaǵa qayttı. Bul qalada Pavel menen Barnaba ózlerine tapsırılǵan xızmetti islew ushın ózlerin Qudaydıń miyrimine baǵıshlaǵan edi. Olar sol isti endi orınladı. 27 Ol jerge jetkende, olar iseniwshiler jámáátin bir jerge jıynap, Qudaydıń ózleri arqalı neler islegenin, basqa milletlerge isenim qapısın qalay ashqanın bildirdi. 28 Olar sol jerdegi shákirtler menen birge uzaq waqıt qaldı.