Act 15 | KaaIBT22L | STEP | Yahudiyadan Antioxiyaǵa geybir iseniwshiler kelip, tuwısqanlarǵa: «Eger Muwsanıń úrp-ádeti boyınsha súnnet etilmeseńler, qutqarıla almaysızlar»,

‏ Acts 15

Erusalimdegi qurıltay

1 Yahudiyadan Antioxiyaǵa geybir iseniwshiler kelip, tuwısqanlarǵa: «Eger Muwsanıń úrp-ádeti boyınsha súnnet etilmeseńler, qutqarıla almaysızlar», – dep tálim bere basladı. 2 Pavel hám Barnaba olar menen aytısıp, qattı tartısıp qaldı. Aqırında Pavel hám Barnabaǵa, jáne de olar menen birge basqa bir neshe tuwısqanǵa Erusalimdegi elshiler menen aqsaqallarǵa barıp, usı máseleni sheshiw tapsırıldı. 3 Solay etip, olar iseniwshiler jámááti tárepinen jiberilip, Fenikiya hám Samariya úlkelerinen ótti. Jol-jónekey basqa milletlerdiń táwbe etkenin aytıp, sol jerdegi tuwısqanlarǵa úlken quwanısh baǵıshladı. 4 Erusalimge kelgende, olar iseniwshiler jámááti, elshiler hám aqsaqallar tárepinen jaqsı qabıl etildi. Qudaydıń ózleri arqalı islegen hámme nársesin ^{▼▼ Bazı qoljazbalarda «…hám basqa milletlerge isenim qapısın qalay ashqanın» degen sózler de bar.} olarǵa bildirdi.

5 Biraq, pariseyler ^{▼▼ Pariseyler – yahudiy xalqınıń kúshli diniy toparı.} arasınan shıqqan ayırım iseniwshiler orınlarınan turıp:

– Iseniwshi bolǵan basqa millet adamları da súnnet etilip, olarǵa Muwsanıń Nızamın orınlawdı buyırıw tiyis, – dedi.

6 Elshiler menen aqsaqallar bul másele boyınsha másláhátlesiw ushın jıynaldı. 7 Uzaq talqılawdan soń Petr ornınan turıp, olarǵa bılay dedi:

– Tuwısqanlar! Basqa milletlerdiń Xosh Xabardı meniń awzımnan esitip iseniwi ushın, Quday kóp waqıt burın arańızdan meni tańlaǵanın bilesizler. 8 Adamnıń kewlin biletuǵın Quday Muxaddes Ruwxtı bizlerge bergeni sıyaqlı, basqa milletlerge de berip, olardı qabıl etkenin kórsetti. 9 Quday olardıń kewillerin isenimleri arqalı tazalap, bizler menen olardıń arasına ayırmashılıq qoymadı. 10 Olay bolsa, endi ne ushın ata-babalarımız da, ózlerimiz de kóterip júre almaǵan moyıntırıqtı shákirtlerdiń moynına salıp, Qudaydı sınap atırsızlar? 11 Olardıń Iyemiz Iysanıń miyrimi menen qutqarılatuǵınınday, bizler de ózlerimizdiń solay qutqarılatuǵınımızǵa isenemiz.

12 Sonda jıynalǵanlardıń hámmesi tınıshlanıp, Barnaba menen Paveldi tıńlay basladı. Olar ózleri arqalı Qudaydıń basqa milletler arasında kórsetken káramatlı belgileri menen tań qalarlıq nárseleri haqqında aytıp berdi. 13 Olar sózlerin tawısqannan soń, Yaqıp sóz baslap bılay dedi:

– Tuwısqanlar, maǵan qulaq salıńlar! 14 Basqa milletlerden Ózine tiyisli bir xalıq shıǵarıw ushın, Quday olarǵa dáslep qalay miyrimlilik kórsetkenin Shimon Petr bayan etken edi. 15 Payǵambarlardıń jazıp qaldırǵan mına sózleri de usıǵan tuwrı keledi: 16 «Bunnan keyin Men qaytıp kelip,
Dawıttıń qulaǵan úyin qayta quraman.
Buzılǵan jerlerin ońlap, qayta tikleymen.
17 – 18 Solay etip, qalǵan adamlar,
Meniń atım menen atalıwshı barlıq milletler,
Iyesin – Meni izlep tapsın.
Bulardı áyyemnen bildirgen Jaratqan Iye usılay deydi» ^{▼▼ Amo 9:11-12.}.

19 Sonlıqtan, meniń pikirimshe, Qudaydıń jolına túsken basqa millet adamların qıynamawımız kerek. 20 Biraq, butlarǵa shalınıp haramlanǵan qurbanlıq góshinen, buzıqshılıqtan, buwındırılıp óltirilgen haywanlardıń góshinen hám qannan awlaq bolıwların ^{▼▼ Bazı qoljazbalarda «…ózlerińiz ushın qálemegen nárseni, ózgege islemew kerekligin» degen sózler de bar.} jazıp jiberiwimiz tiyis. 21 Óytkeni áyyemgi waqıtlardan beri Muwsanıń Nızamı hár bir qalada járiyalanıp kiyatır hám hár Shabbat kúni májilisxanalarda oqılmaqta.

Basqa milletlerden bolǵan iseniwshilerge xat

22 Solay etip, pútkil iseniwshiler jámááti menen elshiler hám aqsaqallar ózleriniń arasınan adamlardı saylap, olardı Pavel hám Barnaba menen birge Antioxiyaǵa jiberiwge qarar etti. Saylanǵanlar: tuwısqanlar arasında basshılıq etip júrgen Barsabba dep atalatuǵın Yahuda menen Sila edi. 23 Olar arqalı mına xattı jazıp jiberdi:

«Húrmetli tuwısqanlarımız!

Tuwısqanlarıńız bolǵan biz, elshiler hám aqsaqallardan, Antioxiya, Siriya hám Kilikiyadaǵı basqa millet adamları bolǵan siz, tuwısqanlarǵa sálem!

24 Aramızdaǵı ayırım adamlardıń sizlerge barǵanın hám óz sózleri menen sizlerdi táshiwishke salıp ^{▼▼ Bazı qoljazbalarda «…súnnet etilip, nızamǵa ámel qılıw kerek, dep» degen sózler de bar.}, aqılıńızdı hayran qılǵanın esittik. Bizler olarǵa hesh qanday jol-jorıq bermegen edik. 25 Sonlıqtan aramızdan bir neshe adamdı saylap, súyikli tuwısqanlarımız Barnaba hám Pavel menen birge sizlerge jiberiwdi bir awızdan maqul taptıq. 26 Bular ekewi Iyemiz Iysa Masiyxtıń atı ushın ómirlerin baǵıshlaǵan adamlar. 27 Sizlerge jáne de Yahuda menen Silanı jiberip atırmız. Olar bul jazǵanlarımızdı awızsha aytıp beredi. 28 Sebebi Muxaddes Ruwx hám bizler áhmiyetli bolǵan mına qaǵıydalardan tısqarı sizlerge hesh nárseni júklemewdi maqul taptıq: 29 sizler butlarǵa shalınǵan qurbanlıqtıń góshinen, qannan, buwındırılıp óltirilgen haywanlardıń góshinen hám buzıqshılıqtan awlaq bolıńlar ^{▼▼ Bazı qoljazbalarda mınaday sózler de bar: «Ózlerińiz ushın qálemegen nárseni ózgege islemeńler».}. Usılardan saqlansańlar, jaqsı is qılǵan bolasızlar. Aman bolıńlar!»

30 Solay etip, jiberilgenler jolǵa shıǵıp, Antioxiyaǵa keldi. Jámáátti bir jerge jıynap, olarǵa xattı tapsırdı. 31 Iseniwshiler xattı oqıp, ondaǵı kewil kóteriwshi sózlerge quwandı. 32 Payǵambarshılıq sıyın alǵan Yahuda menen Sila tuwısqanlarǵa kóp sózler menen aqıl-násiyat aytıp, ruwxıy kúsh-quwat berdi. 33 Bir qansha waqıt sol jerde bolǵannan soń, tuwısqanlar olardı aman-esen shıǵarıp salıp, jollaǵanlarǵa qaytardı. [ 34 ^{▼▼ Bazı qoljazbalarda 34-ayat ta bar: «Biraq Sila sol jerde qalıwǵa qarar etti». Basqa bir qoljazbada: «Biraq Sila, sol jerde qalamız dep sheshti hám Yahuda Erusalimge qayttı».}]

35 Al Pavel menen Barnaba Antioxiyada qaldı. Olar kóplegen adamlar menen birlikte Iyemizdiń sózin úyretip, járiyalap júrdi.

Paveldiń ekinshi saparı

36 Bir qansha waqıttan soń, Pavel Barnabaǵa:

– Endi izimizge qaytıp, bizler Iyemizdiń sózin járiyalaǵan hár bir qaladaǵı tuwısqanlarımızǵa barayıq, olardıń hal-jaǵdayın kóreyik, – dedi.

37 Barnaba Mark dep atalatuǵın Yuxandı birge alıp júrmekshi boldı. 38 Biraq Pavel Pamfiliyada ózlerin taslap ketip, birlikte baslaǵan isti dawam etpegen Marktı ózleri menen birge alıp júriwdi maqul kórmedi. 39 Solay etip, olardıń arasında keskin túsinbewshilik bolıp, bir-birinen bólindi. Barnaba Marktı alıp, keme menen Kiprge ketti. 40 Al Pavel Silanı tańladı hám tuwısqanlar tárepinen Iyemizdiń miyrimine tapsırılǵannan soń, jolǵa shıqtı. 41 Ol Siriya hám Kilikiya úlkelerin aralap, iseniwshi jámáátlerdi bekkemlep júrdi.