Act 16 | KaaIBT22L | STEP | Pavel Derbege, sońınan Listraǵa keldi. Sol jerde anası iseniwshi yahudiy, al ákesi grek bolǵan Timofey atlı shákirt bar edi.

‏ Acts 16

Timofeydiń Pavel menen Silaǵa qosılıwı

1 Pavel Derbege, sońınan Listraǵa keldi. Sol jerde anası iseniwshi yahudiy, al ákesi grek bolǵan Timofey atlı shákirt bar edi. 2 Listra hám Ikoniyadaǵı tuwısqanlar ol haqqında jaqsı pikirde edi. 3 Timofeydi ózi menen birge alıp júriwdi qálegen Pavel sol jerdegi yahudiyler sebepli, onı súnnet ettirdi. Óytkeni hámme Timofeydiń ákesiniń grek ekenin biletuǵın edi. 4 Olar qaladan-qalaǵa ótip, Erusalimdegi elshiler menen aqsaqallar belgilegen qaǵıydalardı iseniwshilerge orınlaw ushın tapsırdı. 5 Solay etip, iseniwshi jámáátlerdiń isenimi bekkemlenip, sanı kúnnen-kúnge arta berdi.

Paveldiń Makedoniyaǵa shaqırılıwı

6 Qudaydıń sózin Aziya úlkesinde ^{▼▼ Aziya úlkesi – házirgi Turkiya eliniń qubla-batıs bóleginde bolǵan bir úlke.} jayıwǵa Muxaddes Ruwx tıyım salǵanlıqtan, Pavel menen onıń joldasları Frikiya hám Galatiya úlkelerin aralap júrdi. 7 Olar Misiyanıń shegarasına kelgende, Bitiniyaǵa kirmekshi boldı, biraq Iysanıń Ruwxı olarǵa ruxsat bermedi. 8 Sonlıqtan olar Misiyadan ótip, Troas qalasına keldi. 9 Sol kúni túnde Pavel ayan kórdi. Makedoniyalı bir adam onıń aldında turıp: «Makedoniyaǵa kelip, bizlerge járdem ber», – dep ótindi. 10 Pavel bul ayandı kórgennen soń, bizler dárriw Makedoniyaǵa barıwdıń háreketin isledik. Sebebi Quday bizlerdi olarǵa Xosh Xabardı járiyalawǵa shaqırıp atır, degen juwmaqqa keldik.

Pavel Filip qalasında

11 Bizler Troastan keme menen shıǵıp, tuwrı Samotrakiyaǵa, erteńine Neapoliske júzip bardıq. 12 Ol jerden Makedoniya úlkesiniń eń baslı qalası, Rimniń qol astında bolǵan Filipke jetip keldik. Bul qalada bir neshe kún qaldıq.

13 Bizler Shabbat kúni qala dárwazasınan sırtqa, dáryanıń jaǵasına shıqtıq. Ol jerde yahudiyler duwa etetuǵın orın bar dep oylaǵan edik. Bizler otırıp, sol jerge jıynalǵan hayallarǵa sóyley basladıq. 14 Tıńlawshılar arasında Tiatira qalasınan kelgen, shım qızıl qımbat gezlemelerdi satıwshı Lidiya atlı bir hayal bar edi. Ol Qudayǵa sıyınatuǵın edi. Paveldiń sózlerine qulaq salıwı ushın, Iyemiz onıń kewlin ashtı. 15 Lidiya úy-ishi menen birge suwǵa shomıldırılǵannan soń, bizlerdi úyine mirát etip: «Meni Iyemizge isenedi, dep esaplaytuǵın bolsańlar, kelińler, úyimde bolıńlar», – dep bizlerdi kóndirdi.

Pavel menen Sila qamaqta

16 Bir kúni bizler duwa etetuǵın jerge baratırǵanımızda, palkerlik penen shuǵıllanatuǵın jawız ruwxlı bir shorıǵa duslastıq. Bul qız palkerlik penen xojayınlarına kóp payda keltiretuǵın edi. 17 Ol Pavel menen bizlerdiń izimizge túsip:

– Bul adamlar – Quday Taalanıń xızmetshileri, olar sizlerge qutqarılıw jolın járiyalap atır! – dep baqırıp júrdi.

18 Bul kóp kún tákirarlandı. Aqırında Pavel biyzar bolıp ketip, arqasına burıldı da, qızdıń ishindegi jawız ruwxqa:

– Iysa Masiyxtıń atı menen buyıraman: onnan shıǵıp ket! – dedi.

Jawız ruwx qızdıń ishinen dárhal shıǵıp ketti.

19 Shorınıń xojayınları payda kóriwden úmitleriniń úzilgenin bilip, Pavel menen Silanı uslap aldı da, bazar maydanındaǵı basshılarǵa súyrep apardı. 20 Olardı Rim basshılarınıń aldına alıp kelip:

– Mına yahudiyler qalamızdı astan-kesten etpekte. 21 Biz rimlilerge qabıl etiwge de, orınlawǵa da bolmaytuǵın úrp-ádetlerdi járiyalap júr, – desti.

22 Xalıq ta olarǵa qosılıp, elshilerge qarsı shıqtı. Basshılar Pavel menen Silanıń kiyimlerin jırtıp sheshtirdi de, tayaq penen sabawǵa buyrıq berdi. 23 Olardı kóp sabatqannan soń, qamaqqa saldırdı hám qamaqxana xızmetkerine olardı jaqsılap qarawıllawdı buyırdı. 24 Usınday buyrıq alǵan qamaqxana xızmetkeri olardı qamaqxananıń ishki bólmesine qamap, ayaqların buǵaw menen qısıp tasladı.

25 Túnniń ortalarında Pavel menen Sila duwa etip, Qudaydı alǵıslaytuǵın qosıq aytıp otırǵan edi. Basqa tutqınlar da olardı tıńladı. 26 Birden jer qattı qozǵalıp, qamaqxananıń tırnaǵı silkindi hám sol waqıtta-aq barlıq qapılar ashılıp, hámmeniń shınjırları sheshilip ketti. 27 Uyqıdan oyanǵan qamaqxana xızmetkeri qamaqxananıń qapılarınıń ashıq ekenin kórdi. Tutqınlar qashıp ketti, dep oylaǵan ol ózin óltirmekshi bolıp, qılıshın suwırıp aldı. 28 Biraq Pavel bálent dawıs penen baqırıp:

– Óz janıńa qastıyanlıq etpe, hámmemiz usı jerdemiz, – dedi.

29 Qamaqxana xızmetkeri shıra ákeldirip, ishke juwırıp kirdi de, qaltırap, Pavel menen Silanıń aldına jıǵıldı. 30 Olardı sırtqa shıǵarıp:

– Mırzalar, qutqarılıwım ushın ne islewim kerek? – dep soradı.

31 Olar:

– Iyemiz Iysaǵa isen, sonda sen de, úy-ishiń de qutqarılasız, – dedi.

32 Sońınan olar onıń ózine hám úyindegilerdiń hámmesine Iyemizdiń sózin ayttı. 33 Qamaqxana xızmetkeri túnniń sol sátinde olardı alıp ketip, jaraqatların juwdı da, dárriw ózi hám pútkil úy-ishi suwǵa shomıldırıldı. 34 Ol Pavel menen Silanı úyine ákelip, aldılarına dasturxan jaydı. Qudayǵa isengenine pútkil úy-ishi menen quwandı.

35 Tań atqanda, basshılar: «Sol adamlardı bosatıńlar», – degen buyrıq penen saqshılardı jolladı. 36 Qamaqxana xızmetkeri bul sózlerdi Pavelge xabarlap:

– Basshılar sizlerdi bosatıw ushın adam jollaptı. Endi shıǵıp, aman-esen kete berińler, – dedi.

37 Biraq Pavel saqshılarǵa bılay dedi:

– Rim puqaraları bolǵan bizlerdi xalıq aldında húkimsiz sabap, qamaqqa saldı. Endi bizlerdi jasırın quwıp jibermekshi me? Bul bolmaydı! Bizlerdi ózleri kelip shıǵarsın!

38 Saqshılar bul sózlerdi basshılarǵa jetkerdi. Basshılar Pavel menen Silanıń Rim puqaraları ekenin esitkende qorqıp ketti. 39 Kelip, keshirim soradı. Sońınan olardı sırtqa shıǵarıp, qaladan ketiwlerin ótindi. 40 Pavel menen Sila qamaqtan shıǵıp, Lidiyanıń úyine bardı. Sol jerde tuwısqanlardı kórip, olardı jigerlendirgennen soń, jolǵa shıqtı.