Act 17 | KaaIBT22L | STEP | Olar Amfipolis hám Apolloniyadan ótip, Salonikaǵa keldi. Bul jerde yahudiylerdiń bir májilisxanası bar edi.

‏ Acts 17

Salonikada

1 Olar Amfipolis hám Apolloniyadan ótip, Salonikaǵa keldi. Bul jerde yahudiylerdiń bir májilisxanası bar edi. 2 Pavel óz ádeti boyınsha májilisxanaǵa bardı. Úsh hápte olar menen Muxaddes Jazıwlardı talqıladı. 3 Masiyxtıń azap shegip, ólimnen qayta tiriliwi tiyis ekenin túsindirip, dáliller keltirdi de:

– Men sizlerge járiyalap atırǵan bul Iysa – Masiyx, – dedi ol.

4 Yahudiylerdiń bazıları maqullap, Pavel menen Silaǵa qosıldı. Sonday-aq, Qudayǵa sıyınatuǵın greklerdiń úlken toparı hám kóplegen abıraylı hayallar da solay isledi.

5 Biraq yahudiyler kúnshillik etip, bazarda bos júrgen ayırım jaramas adamlardı jıynadı da, qalada topalań kóterdi. Pavel menen Silanı tawıp, olardı xalıqtıń aldına shıǵarıw ushın, Yasonnıń úyine topılıp kirdi. 6 Biraq olardı taba almay, Yason menen basqa geybir tuwısqanlardı qala basshılarınıń aldına súyrep aparıp:

– Pútkil dúnyanı astan-kesten etken bul adamlar usı jerge de kelipti. 7 Yason olardı qabıl qıldı. Olardıń hámmesi Iysa degen basqa bir patsha bar ekenin aytıp, Rim imperatorınıń pármanlarına qarsı háreket etip júr, – dep baqırdı.

8 Bul sózlerdi esitken xalıq hám qala basshıları qattı tınıshsızlandı. 9 Biraq olar Yasonnan hám basqalardan kepillikke aqsha alıp, bosatıp jiberdi.

Beriyada

10 Tuwısqanlar dárriw sol túni Pavel menen Silanı Beriyaǵa jiberdi. Olar Beriyaǵa kelip, yahudiylerdiń májilisxanasına kirdi. 11 Beriyadaǵı yahudiylerdiń Salonikadaǵı yahudiylerge qaraǵanda pikiri keńirek edi. Olar Qudaydıń sózin úlken qızıǵıwshılıq penen qabıl etip, Pavel menen Silanıń aytqan sózleriniń durıs ekenin biliw ushın, hár kúni Muxaddes Jazıwlardı izertleytuǵın edi. 12 Solay etip, yahudiylerdiń kóbisi hám kóplegen abıraylı grek hayalları menen er adamları isendi.

13 Biraq Salonikadaǵı yahudiyler Paveldiń Beriyada da Qudaydıń sózin járiyalaǵanın bilgende, sol jerge de keldi hám xalıqtı úgitlep, qozǵalań saldı. 14 Sonda tuwısqanlar Paveldi dárhal teńiz tárepke jiberdi. Al Sila menen Timofey Beriyada qaldı. 15 Paveldi shıǵarıp salıwshılar onı Afinaǵa deyin apardı. Olar Pavelden: «Sila menen Timofey, múmkin bolsa, tez maǵan jetsin», – degen tapsırmanı alıp, izlerine qayttı.

Afinada

16 Afinada Sila menen Timofeydi kútip júrgen Pavel qalanıń butlarǵa tolı ekenin kórgende, qattı qapa bolıp ashıwlandı. 17 Sonlıqtan ol májilisxanadaǵı yahudiyler hám Qudayǵa sıyınatuǵın grekler menen aytısıp, hár kúni bazar maydanında ushırasqanlar menen tartısıp júrdi. 18 Epikurshılardıń hám stoik oyshıllarınıń ^{▼▼ Epikurshılar hám stoik oyshılları – eski grek elindegi oyshıllardıń toparları.} geybirewleri de onıń menen tartısa basladı. Birewleri: «Mına mıljıń ne demekshi», – dese, ayırımları: «Ol jat qudaylardıń xabarshısı bolsa kerek», – dedi. Óytkeni Pavel Iysa hám Onıń qayta tiriliwi tuwralı Xosh Xabardı járiyalap júr edi. 19 Olar Paveldi Areopag keńesine ^{▼▼ Areopag keńesi – Ares tóbesi degen jerde jaylasqan afinalılardıń rásmiy keńesi yamasa qazıxanası. Bul jerde on eki qazı jıynalatuǵın edi.} alıp kelip, oǵan:

– Sen járiyalap júrgen bul jańa tálimattıń ne ekenin biliwimizge bola ma? 20 Sebebi sen qulaǵımızǵa jat nárselerdi aytıp atırsań, bulardıń ne ekenin bilgimiz keledi, – dedi.

21 Pútkil afinalılar hám sol jerde jasaytuǵın shet elliler waqıtların tek jańalıqlar aytıw hám tıńlaw menen ótkizetuǵın edi.

22 Pavel Areopag keńesiniń ortasında turıp, bılay dedi:

– Háy, afinalılar! Sizlerdiń hár tárepleme júdá dinshil ekenińizdi kórip turman. 23 Men aylanıp júrip, sizler tabınatuǵın orınlardı kózden keshirgenimde, «Biytanıs qudayǵa» degen jazıwı bar, bir qurbanlıq orındı da kórdim. Endi ózlerińiz bilmey sıyınıp júrgen usı Quday haqqında sizlerge járiyalayjaqpan.

24 Dúnyanı hám onıń ishindegilerdiń hámmesin jaratqan Quday aspan hám jerdiń Iyesi bolǵanlıqtan, adamnıń qolı menen salınǵan ibadatxanalarda jasamaydı. 25 Ol bir nársege mútájdey, Oǵan adamnıń qolları menen xızmet etip bolmaydı. Óytkeni hámme adamlarǵa ómir, dem hám barlıqtı Onıń Ózi beredi. 26 Quday hámme milletlerdi bir adamnan jaratıp, olardı pútkil jer júzine ornalastırdı. Olardıń jasaytuǵın dáwirleri menen mákanlarınıń shegaraların aldın ala belgilep bergen. 27 Bunı Quday Ózin izlesin hám qarmalanıp bolsa da tapsın, dep isledi. Degen menen, Ol hesh birimizden alıs emes. 28 Sebebi sizlerdiń shayırlarıńızdıń geybirewleri: «Bizler Onıń urpaǵımız», – dep aytqanınday, bizler Ol arqalı jasaymız, háreket etemiz hám barmız.

29 Bizler endi Qudaydıń urpaǵı bolǵanımız sebepli, Quday adamnıń óneri hám aqıl-oyı menen dóretilgen altın, gúmis yamasa tas músinge uqsas dep oylamańlar. 30 Ótken dáwirlerde Quday nadanlıqqa dıqqat awdarmaǵan bolsa da, endi hár bir jerde hár bir adamnıń táwbe etiwin buyırmaqta. 31 Óytkeni Ol bul dúnyanı Ózi tańlaǵan Adamı arqalı ádillik penen húkim etetuǵın kúndi belgilep qoyıptı. Bunı sol Adamdı ólimnen qayta tiriltip, hár bir adamǵa dálilledi.

32 Ólimnen qayta tiriliw haqqında esitkende, kimisi mazaq etip kúldi, kimisi: «Bul haqqında seni basqa sapar tıńlaǵımız keledi», – dedi. 33 Sońınan Pavel olardıń arasınan shıǵıp ketti. 34 Al geybir adamlar oǵan qosılıp, isendi. Olardıń arasında Areopag keńesiniń aǵzası bolǵan Dionisiy, Damaris atlı bir hayal hám jáne basqalar bar edi.