Act 18 | KaaIBT22L | STEP | Bunnan soń, Pavel Afinadan shıǵıp, Korinfke keldi.

‏ Acts 18

Korinf qalasında

1 Bunnan soń, Pavel Afinadan shıǵıp, Korinfke keldi. 2 Sol jerde Akila atlı, pontlı bir yahudiyge duslastı. Akila hayalı Priskilla menen jaqında Italiyadan kelgen edi. Sebebi imperator Klavdiy barlıq yahudiylerdiń Rimnen shıǵıp ketiwin buyırǵan edi. Pavel olarǵa bardı da, 3 kásiples bolǵanlıqtan olar menen birge qalıp, jumıs isledi. Olardıń kásibi – shatır soǵıw edi. 4 Pavel hár Shabbat kúni májilisxanada aytısıp, yahudiylerdi hám greklerdi isendiriwge háreket etti.

5 Sila menen Timofey Makedoniyadan kelgende, Pavel ózin Qudaydıń sózin járiyalawǵa hám yahudiylerge Iysanıń Masiyx ekeni haqqında gúwalıq beriwge tolıq baǵıshladı. 6 Biraq yahudiyler qarsı shıǵıp, onı masqaralaǵanda, Pavel kiyiminiń shańın qaǵıp ^{▼▼ Kiyiminiń shańın qaǵıp – yahudiylerdiń ádeti boyınsha, baylanıstıń úzilgenligin bildiredi.}, olarǵa bılay dedi:

– Qanıńız óz basıńızda qalsın! Men juwapkershilikten azatpan. Bunnan bılay, basqa milletlerge ketemen.

7 Pavel sol jerden shıǵıp, Qudayǵa sıyınatuǵın Titus Yustus atlı bir adamnıń úyine keldi. Onıń úyi májilisxanaǵa irgeles edi. 8 Májilisxana basshısı bolǵan Krispus pútkil úy-ishi menen Iyemizge isendi. Paveldi tıńlaǵan korinflilerdiń kóbisi de isenip, suwǵa shomıldırıldı.

9 Bir kúni túnde Iyemiz Pavelge ayan kórsetip: «Qorqpa, únsiz qalmay, sóyley ber! 10 Men seniń menen birgemen, jamanlıq islew ushın saǵan hesh kim qol tiygize almaydı. Óytkeni bul qalada Meniń adamlarım kóp», – dedi. 11 Solay etip, Pavel ol jerde bir yarım jıl qaldı hám xalıqqa Qudaydıń sózin úyretiwin dawam etti.

12 Gallio Axaya úlkesiniń hákimi bolǵan waqıtta yahudiyler birigip, Pavelge qarsı shıqtı. Onı qazıxanaǵa alıp barıp:

13 – Mına adam xalıqtı úgitlep, Qudayǵa sıyınıwdı bizlerdiń nızamımızǵa qayshı keletuǵın jol menen úyretip júr, – dedi.

14 Pavel endi sózin baslamaqshı bolǵanda, Gallio yahudiylerge bılay dedi:

– Háy, yahudiyler! Eger bir nızamsızlıq yamasa bir awır jınayat islengen bolsa, men sizlerdi sabırlılıq penen tıńlar edim. 15 Biraq, sózlerge, atlarǵa hám ózlerińizdiń nızamıńızǵa baylanıslı máseleler bolsa, ózlerińiz sheshińler. Men bunday nárselerge qazılıq etkim kelmeydi.

16 Solay etip, Gallio olardı qazıxanadan quwıp jiberdi. 17 Sonda olardıń hámmesi májilisxananıń basshısı Sostenisti uslap alıp, qazıxananıń aldında sabap tasladı. Al Gallio bularǵa kewil de awdarǵan joq.

Paveldiń Antioxiyaǵa qaytıwı

18 Pavel sol jerde jáne bir neshe kún bolǵannan soń, tuwısqanlar menen xoshlastı. Priskilla hám Akila menen birge Siriyaǵa barıw ushın kemege mindi. Qudayǵa ant bergenlikten, Pavel Kenxreyada shashın qıydırıp tasladı. 19 Efeske kelgende, Priskilla menen Akilanı sol jerde qaldırıp, ózi májilisxanaǵa bardı da, yahudiyler menen pikir alısa basladı. 20 Olar kóbirek waqıt qalıwın ótinish etse de, Pavel qayılshılıq bermedi. 21 Biraq olar menen xoshlasıp atırıp:

– Quday qálese, sizlerge jáne qaytıp kelemen ^{▼▼ Quday qálese, sizlerge jáne qaytıp kelemen – Bazı qoljazbalarda: «Jaqınlap qalǵan bayramdı Erusalimde ótkeriwim kerek. Quday qálese, sizlerge jáne qaytıp kelemen».}, – dedi.

Sońınan keme menen Efesten jónep ketti.

22 Ol Kesariyada kemeden túsip, Erusalimge ketti hám sol jerdegi iseniwshiler jámáátine sálem bergennen soń, Antioxiyaǵa bardı. 23 Antioxiyada bir neshe waqıt qalǵannan soń, Pavel jolǵa shıqtı. Tártip boyınsha Galatiya hám Frikiya úlkelerin aralap, hámme shákirtlerge ruwxıy kúsh-quwat berip júrdi.

Apollostıń xızmeti

24 Sol waqıtta negizi iskenderiyalı bolǵan Apollos atlı bir yahudiy Efeske keldi. Ol Muxaddes Jazıwlardı júdá jaqsı biletuǵın, sózge sheshen adam edi. 25 Iyemizdiń jolında tálim alǵan ol jalınlı ruwx penen sóylep, Iysa haqqında durıs úyretetuǵın edi. Biraq ol tek Yaqıyanıń suwǵa shomıldırıwın ǵana biletuǵın edi. 26 Apollos májilisxanada batıllıq penen sóyley basladı. Bunı Priskilla menen Akila esitkende, onı úyine aparıp, Qudaydıń jolın anıǵıraq túsindirip berdi.

27 Apollos Axayaǵa ketpekshi bolǵanda, tuwısqanlarımız onı qollap quwatladı. Sol jerdegi shákirtlerdiń onı qabıl qılıwı ushın xat jazıp berdi. Apollos sol jerge jetip barıp, Qudaydıń miyrimi menen isengenlerge kóp járdem berdi. 28 Sebebi ol Iysanıń Masiyx ekenin Muxaddes Jazıwlar arqalı dálillep, yahudiylerdi xalıq aldında kúshli túrde áshkaraladı.