Act 19 | KaaIBT22L | STEP | Apollos Korinfte bolǵanda, Pavel tawlı úlkelerden ótip, Efeske keldi. Ol jerde ayırım shákirtler menen ushırasıp,

‏ Acts 19

Pavel Efes qalasında

1 Apollos Korinfte bolǵanda, Pavel tawlı úlkelerden ótip, Efeske keldi. Ol jerde ayırım shákirtler menen ushırasıp, 2 olardan:

– Isengen waqtıńızda Muxaddes Ruwxtı aldıńız ba? – dep soradı.

– Muxaddes Ruwxtıń bar ekenin bizler hesh esitpedik te, – dep juwap berdi olar.

3 – Olay bolsa, qanday shomıldırıw menen shomıldırıldıńlar? – dep soradı Pavel.

– Yaqıyanıń tálimine tiykarlanıp, suwǵa shomıldırıldıq ^{▼▼ Mat 3:5-6.}, – dedi olar.

4 Pavel bılay dedi:

– Yaqıya xalıqtı táwbe ettirip hám suwǵa shomıldırıp, olarǵa ózinen soń Keletuǵınǵa, yaǵnıy Iysaǵa iseniwdi aytqan edi.

5 Olar bunı esitkende, Iyemiz Iysanıń atı menen suwǵa shomıldırıldı. 6 Pavel olardıń ústilerine qolların qoyıp duwa etkende, olarǵa Muxaddes Ruwx tústi hám olar ruwxıy tillerde sóylep, payǵambarshılıq ete basladı. 7 Olar barlıǵı bolıp shama menen on eki adam edi.

8 Pavel májilisxanaǵa bardı. Ol sol jerde úsh ay dawamında Qudaydıń Patshalıǵı tuwralı tálim berdi hám olardı isendiriwge tırısıp, batıllıq penen sóyledi. 9 Biraq, geybirewleri qasarısıp isenbedi hám Iysanıń jolın xalıq aldında jamanlay basladı. Sonlıqtan Pavel olardı qaldırıp, shákirtlerdi ózi menen birge aldı da, hár kúni Tiranustıń mektebinde tálim beriwin dawam etti. 10 Bul awhal eki jılǵa sozıldı. Solay etip, yahudiy bolsın, grek bolsın, Aziya úlkesinde jasaǵan hár bir adam Iyemizdiń sózin esitti.

Skevanıń jeti ulı

11 Quday Pavel arqalı tań qalarlıq káramatlar isledi. 12 Hátte, Paveldiń denesine tiygen bet oramallar yamasa aljapqıshlar nawqaslarǵa qoyılǵanda, olar dártlerinen azat bolıp, ishlerinen jawız ruwxlar shıǵatuǵın edi.

13 El aralap, jawız ruwxlardı quwıp júrgen geybir yahudiy duwaxanlar da jawız ruwx urǵan adamlarǵa Iyemiz Iysanıń atın qollana basladı. Olar: «Pavel járiyalap júrgen Iysanıń atı menen buyıramız, shıǵıp ket!» – deytuǵın edi. 14 Bas ruwxaniy Skeva atlı bir yahudiydiń jeti ulı da usılay islep júrgen edi. 15 Biraq jawız ruwx olarǵa:

– Iysanı bilemen, Paveldi tanıyman, al sizler kimsiz? – dep juwap berdi de, 16 jawız ruwx urǵan adam olarǵa táp berip jıǵıp, olardan ústin shıqtı. Olar úyden jaradar hám jalańash bolıp qashıp ketti.

17 Bul xabar Efeste jasaytuǵın barlıq yahudiyler menen greklerge jetip bardı. Hámmesin qorqınısh biylep, Iyemiz Iysanıń atı úlken húrmetke eristi. 18 Isengenlerdiń kóbisi kelip, islegen jaman islerin ashıq moyınladı. 19 Sıyqırshılıq penen shuǵıllanatuǵın kóp adamlar da kitapların jıynap, hámmeniń kóz aldında jaǵıp jiberdi. Kitaplardıń bahasın esaplaǵanda, eliw mıń gúmis teńge boldı. 20 Solay etip, Iyemizdiń sózi qúdiret penen jayılıp, tásiri artıp bardı.

21 Bul waqıyalardan soń, Pavel Makedoniya hám Axaya úlkelerinen ótip, Erusalimge barıwǵa qarar etti. «Ol jerge barǵanımnan soń, Rimdi de kóriwim kerek», – dedi ol. 22 Sonlıqtan ózi bir neshe waqıt Aziya úlkesinde qalıp, járdemshilerinen ekewin – Timofey menen Erastustı Makedoniyaǵa jiberdi.

Efestegi kóterilis

23 Sol waqıtları Iyemiz Iysanıń jolına qarsı kúshli kóterilis payda boldı. 24 Dimitriy atlı bir zerger gúmisten Artemida ibadatxanasınıń kishkene úlgilerin soǵıp, óz ónermentshilerine kóp payda keltiretuǵın edi. 25 Dimitriy óz ónermentshileri menen ózindey zergerlerdi bir jerge jıynap, olarǵa bılay dedi:

– Doslar, usı kásibimiz arqalı kóp payda alatuǵınımızdı bilesizler. 26 Biraq Pavel degen mına bir adamnıń qoldan soǵılǵan qudaylardıń haqıyqıy qudaylar emes ekenin aytıp, tek Efeste emes, al pútkil Aziyada kóp sanlı adamlardı úgitlep azǵırǵanın kórip hám esitip atırsızlar. 27 Bul bizlerdiń ónerimizdiń qádirine qáwip tuwdırıp ǵana qoymay, al ullı hayal quday Artemidanıń ibadatxanasınıń arzımaytuǵın nársege aylanıp, pútkil Aziya úlkesi menen pútkil dúnya sıyınatuǵın hayal qudaydı ullılıǵınan ayırıw qáwpi bar.

28 Olar bunı esitkende, qattı ǵázeplenip: «Efeslilerdiń Artemidası ullı!» – dep baqıra basladı. 29 Pútkil qala tártipsizlikke tolıp ketti. Adamlar Paveldiń joldasları makedoniyalı Gayus penen Aristarxtı uslap alıp, tamasha maydanına qaray súyredi. 30 Pavel xalıqtıń arasına barmaqshı boldı, biraq shákirtler oǵan jol qoymadı. 31 Paveldiń dosları bolǵan Aziya úlkesiniń ayırım basshıları da oǵan xabar jollap, tamasha maydanında kórinbewin ótindi.

32 Jıynalǵanlardıń birewi anaw, birewi mınaw dep baqırıp, jıynalıs biytártip boldı. Kóbisi ne ushın jıynalǵanın da bilmeytuǵın edi. 33 Yahudiyler Iskender atlı bir adamdı iyterip ortaǵa shıǵarǵanlıqtan, ayırım adamlar bolǵan waqıya ushın onı ayıpker dep sheshti. Iskender qolı menen isharat etip, ózin xalıq aldında qorǵamaqshı boldı. 34 Biraq xalıq onıń yahudiy ekenin bilgende, hámmesi bir awızdan shama menen eki saattay: «Efeslilerdiń Artemidası ullı!» – dep baqırıp turdı.

35 Qala xatkeri xalıqtı tınıshlandırıp bılay dedi:

– Efesliler! Ullı Artemidanıń aspannan túsken músininiń hám onıń ibadatxanasınıń qorǵawshısı – Efes qalası ekenin kim bilmeydi? 36 Bulardı hesh kim biykarlay almaydı. Sonıń ushın tınıshlanıp, oylanıp is tutıwıńız kerek. 37 Sizlerdiń bul jerge ákelgen adamlarıńız ibadatxananı da tonamaǵan, hayal qudayımızǵa da til tiygizbegen. 38 Sonlıqtan Dimitriydiń hám onıń ónermentshi joldaslarınıń birewge qarsı qanday da bir shaǵımı bar bolsa, qazıxanalar ashıq, qazılar da bar. Bir-biriniń ústinen sol jerde shaǵım etsin. 39 Al eger taǵı basqa másele bolsa, ol rásmiy jıynalısta sheshiliwi tiyis. 40 Búgingi bolǵan waqıyalar sebepli ayıplanıw qáwpindemiz. Bunday topalańdı aqlay alıwǵa bizlerde sebep te joq.

Ol usı sózlerdi aytıp, jıynalǵanlardı tarqatıp jiberdi.