Act 20 | KaaIBT22L | STEP | Efestegi topalań basılǵannan keyin, Pavel shákirtlerdi shaqırtıp jigerlendirdi. Sońınan olar menen xoshlasıp, Makedoniyaǵa ketiw ushın jolǵa shıqtı.

‏ Acts 20

Pavel Makedoniya menen Greciyada

1 Efestegi topalań basılǵannan keyin, Pavel shákirtlerdi shaqırtıp jigerlendirdi. Sońınan olar menen xoshlasıp, Makedoniyaǵa ketiw ushın jolǵa shıqtı. 2 Ol jol-jónekey úlkelerdi aralaǵanda, iseniwshilerdi kóp sózler menen jigerlendirip, Greciyaǵa keldi. 3 Ol jerde úsh ay qaldı. Keme menen Siriyaǵa ketpekshi bolǵanda, yahudiyler ózine qarsı til biriktirgenlikten, Makedoniya arqalı izine qaytıwǵa qarar etti. 4 Pir ulı beriyalı Sopater, salonikalılardan Aristarx penen Sekundus, derbeli Gayus hám Timofey, Aziya úlkesinen Tixik penen Trofim onıń menen birge ketti. 5 Bular burın ketip, bizlerdi Troas qalasında kútip turdı. 6 Al bizler Ashıtqısız nan bayramınan soń, Filipten keme menen jolǵa shıǵıp, bes kúnde olarǵa, Troasqa jetip keldik. Ol jerde jeti kún boldıq.

Paveldiń Evtixtı tiriltiwi

7 Ekshembi kúni nan sındırıw ushın bir jerge jıynalǵanımızda, Pavel iseniwshilerge sóz sóyledi. Erteńine ketetuǵın bolǵanlıqtan, onıń wazı yarım aqshamǵa deyin sozıldı. 8 Bizler jıynalǵan joqarǵı qabattaǵı bólmede kóp shıralar janıp turǵan edi. 9 Evtix atlı bir jas jigit áynekke minip otır edi. Paveldiń sózi sozılıp ketkenlikten, Evtixtı uyqı bastı. Ol uyıqlap ketip, úshinshi qabattan qulap tústi. Onı jerden kóterip alǵanda, ol ólip qalǵan edi. 10 Pavel tómenge túsip, jigittiń ústine eńkeydi de, onı qushaqlap: «Uwayımlamay-aq qoyıń, onıń janı bar!» – dedi. 11 Sońınan joqarıǵa kóterilip, nan sındırıp jedi. Olar menen tań atqansha kóp sóyleskennen soń, jolǵa shıqtı. 12 Jigitti úyine tiri aparıp, iseniwshiler úlken jubanısh aldı.

Troastan Militke sapar

13 Bizler burınıraq keme menen ketip, Assos qalasına bardıq. Ol jerden Paveldi mingizip alıwımız kerek edi. Óytkeni onıń ózi piyada júrgisi kelgenlikten, bizlerge usılay tapsırǵan edi. 14 Pavel menen Assosta ushırasıp, onı kemege mingizdik te, Mitilina qalasına bardıq. 15 Ol jerden keme menen jolǵa shıǵıp, erteńine Xios atawınıń qarsısına keldik. Bir kúnnen soń Samos atawına ^{▼▼ Bazı qoljazbalarda «Trogillionda toqtaǵannan keyin» degen sózler de bar.}, onıń erteńine Milit qalasına bardıq. 16 Aziya úlkesinde waqıttı bosqa jibermew ushın, Pavel Efeske barmay ótiwdi uyǵardı. Eger múmkin bolsa, ol Eliwinshi kúni bayramında Erusalimde bolıwǵa asıqpaqta edi.

Paveldiń efesli aqsaqallar menen xoshlasqanda sóylegen sózi

17 Pavel Militten Efeske adam jiberip, iseniwshiler jámáátiniń aqsaqalların janına shaqırttı. 18 Olar janına kelgende, Pavel bılay dedi:

– Aziya úlkesine qádem basqan dáslepki kúnimnen baslap, sizler menen birge bolǵan waqtımnıń hámmesinde qalay jasaǵanımdı bilesizler. 19 Yahudiylerdiń qastıyanshılıqları sebepli basımnan ótken qıyınshılıqlarǵa qaramastan, Iyemizge tolıq kishipeyillik penen, sizler ushın kóz jaslarımdı tógip xızmet ettim. 20 Jáne de, paydalı bolǵan hár qanday nárseni qaldırmay, sizlerge xalıq aldında hám úylerde tálim beriwdi toqtatpadım. 21 Yahudiylerge de, greklerge de táwbe etip Qudayǵa keliwdi hám Iyemiz Iysaǵa iseniwdi járiyaladım.

22 Al endi bolsa, Muxaddes Ruwxtıń jetelewi menen Erusalimge baratırman. Ol jerde maǵan ne bolatuǵının bilmeymen. 23 Biraq Muxaddes Ruwx meni qamaq hám qıyınshılıqlar kútip turǵanın maǵan hár bir qalada bildirip atır. 24 Buǵan qaramastan, men óz janımdı ayamayman. Tek óz báygimdi basıp ótip, Qudaydıń miyriminiń Xosh Xabarı tuwralı gúwalıq beriwdi, yaǵnıy Iyemiz Iysanıń maǵan tapsırǵan isin juwmaqlasam bolǵanı.

25 Men arańızda júrip, Qudaydıń Patshalıǵı haqqında járiyaladım. Endi bolsa, sizlerdiń hesh qaysısıńızdıń meniń júzimdi qaytıp kórmeytuǵınıńızdı bilemen. 26 Sonlıqtan búgin sizlerge mınanı ashıq aytaman, kim de kim arańızda qutqarılmasa, men ol ushın juwapker emespen. 27 Sebebi sizlerge Qudaydıń pútkil erkin tolıq járiyaladım. 28 Ózlerińizge hám Muxaddes Ruwx sizlerdi baǵıwshı qılıp qoyǵan pútkil súriwge kózqulaq bolıńlar! Qudaydıń Óz Ulınıń qanı menen satıp alǵan iseniwshiler jámáátin baǵıńlar! 29 Men ketkennen soń, súriwdi ayamaytuǵın jırtqısh qasqırlardıń arańızǵa kiretuǵının bilemen. 30 Hátte, arańızdan shákirtlerdi joldan azǵırıp, ózleriniń izlerine ertiw ushın, haqıyqattı burmalawshı adamlar shıǵadı. 31 Sonlıqtan sergek bolıńlar! Úsh jıl boyı, kún-tún demey kóz jaslarımdı tógip, hár birińizge úzliksiz aqıl-násiyat bergenimdi eslerińizde saqlańlar!

32 Endi men sizlerdi Qudayǵa hám Onıń miyrimin bildiretuǵın sózge tapsıraman. Bul sóz sizlerdi bekkemlep, Qudaydıń muxaddes bolǵan pútkil adamları menen birge sizlerge de miyras beriwge qúdireti jetedi. 33 Men hesh kimniń gúmisin, altının yamasa kiyimin kúsemedim. 34 Ózimniń hám meniń menen birge bolǵanlardıń mútájlikleri ushın usı qollarım menen miynet etkenimdi bilesizler. 35 Iyemiz Iysanıń: «Alǵan adamnan góre, bergen adam baxıtlıraq», – degen sózin umıtpay, usılay miynet etip, hálsizlerge járdem beriw kerekligin sizlerge islegen hár bir isimde kórsettim.

36 Pavel usı sózlerdi aytıp bolǵannan soń, olardıń hámmesi menen birge dize búgip, duwa etti. 37 Olardıń hámmesi qattı jılastı hám Paveldi qushaqlap súydi. 38 Ásirese olardı qattı qapa qılǵan, Paveldiń: «Meniń júzimdi qaytıp kórmeysiz», – degen sózleri boldı. Sońınan onı kemege deyin shıǵarıp saldı.