‏ Acts 21

Paveldiń Erusalimge qaray jolǵa shıǵıwı

1Olar menen xoshlasqanımızdan keyin, keme menen júzip, tuwrı Kos atawına kettik. Erteńine Rodos atawına, ol jerden Patara qalasına keldik. 2Sol jerden Fenikiyaǵa baratuǵın kemeni tawıp mindik te, júzip kettik. 3Kipr kóringende, onıń qubla tárepinen ótip, Siriyaǵa qaray jol aldıq. Keme Tir qalasında júgin túsiriw kerek bolǵanlıqtan, sol jerde toqtadıq. 4Ol jerde shákirtlerdi izlep tawıp, olar menen birge jeti kún qaldıq. Shákirtler Muxaddes Ruwxtıń bildiriwi menen, Pavelden Erusalimge barmawdı ótindi. 5Biraq ketetuǵın waqtımız bolǵanda shıǵıp, jolımızdı dawam ettik. Hámme iseniwshiler hayal hám bala-shaǵaları menen birge bizlerdi qalanıń sırtına deyin shıǵarıp saldı. Teńizdiń jaǵasında dize búgip, duwa ettik. 6Bir-birimiz benen xoshlasqanımızdan soń, kemege mindik. Al olar úylerine qayttı.

7Tirden jolımızdı dawam etip, Ptolemayda qalasına keldik. Ol jerdegi tuwısqanlarımız benen kórisip, olardıń janında bir kún qaldıq. 8Erteńine shıǵıp, Kesariyaǵa keldik. Saylanǵan jeti xızmetshiniń biri bolǵan, Xosh Xabar járiyalawshı Filiptiń úyine barıp, onıń menen qaldıq. 9Bul adamnıń payǵambarshılıq etetuǵın, turmısqa shıqpaǵan tórt qızı bar edi.

10Sol jerde bir talay kún bolǵanımızdan soń, Yahudiyadan Agabus atlı bir payǵambar keldi. 11Ol bizlerge kelip, Paveldiń belbewin aldı da, onıń menen óziniń ayaq-qolların baylap:

– Muxaddes Ruwx bılay deydi: «Yahudiyler bul belbewdiń iyesin Erusalimde usılay etip baylap, basqa millet adamlarına uslap beredi», – dedi.

12Bul sózlerdi esitip, bizler hám sol jerdegi adamlar Pavelden Erusalimge barmawın ótindik. 13Sonda Pavel bılay dep juwap berdi:

– Ne islep atırsızlar? Nege jılasıp, júregimdi ezip atırsızlar? Men Iyemiz Iysanıń atı ushın Erusalimde tek ayaq-qolımdı baylatıwǵa emes, al óliwge de tayarman.

14Paveldi kóndire almaǵanlıqtan: «Iyemizdiń qálegeni bolsın», – dep qaytıp úndemedik.

15Sol kúnlerden soń jolǵa tayarlanıp, Erusalimge keldik. 16Kesariyadaǵı shákirtlerdiń ayırımları da bizler menen birge keldi. Olar bizlerdi jasap turıw ushın dáslepki shákirtlerdiń biri bolǵan, kiprli Minasonnıń úyine alıp bardı. Bizler sol úyde boldıq.

Paveldiń Yaqıp penen ushırasıwı

17Erusalimge kelgenimizde, tuwısqanlarımız bizlerdi quwanıshlı túrde qarsı aldı. 18Erteńine bizler Pavel menen birge Yaqıptı kóriwge bardıq. Aqsaqallardıń hámmesi de sol jerge jıynalǵan edi. 19Pavel olardan hal-awhal soraǵannan keyin, óz xızmeti arqalı Qudaydıń basqa milletler arasında islegen islerin birim-birim aytıp berdi.

20Olar bunı esitip, Qudaydı alǵısladı da, Pavelge bılay dedi:

– Tuwısqanımız Pavel! Óziń kórip tursań, yahudiyler arasında Iyemizge iseniwshi kóp mıńlaǵan adamlar bar. Olardıń hámmesi Muxaddes Nızamǵa júdá intalı. 21Olardıń alǵan xabarına qaraǵanda, sen basqa milletler arasında jasaytuǵın barlıq yahudiylerge balaların súnnet etpewlerin hám úrp-ádetlerimizdi orınlamawın aytıp, Muwsanıń Nızamınan bas tartıw kerekligin úyretip júrgen ekenseń. 22Endi ne qılıw kerek? Olar álbette, seniń usı jerge kelgenińdi esitedi. 23Sonlıqtan mına aytqanımızdı isle. Aramızda Quday aldında ant ishken tórt adam bar. 24Olardı janıńa alıp, tazalanıw rásiminen ót. Olar shashların aldırıwı ushın, kerekli qurbanlıqtıń qunın sen tóle. Solay etip, hámme adam sen haqqında esitkenleriniń tiykarsız ekenin hám seniń Muxaddes Nızam boyınsha jasap atırǵanıńdı bilsin. 25Al basqa millet iseniwshilerine kelsek, bizler olarǵa butlarǵa shalınǵan qurbanlıqtıń góshinen, qannan, buwındırılıp óltirilgen haywanlardıń góshinen hám buzıqshılıqtan awlaq bolıwları tuwralı qararımızdı jazıp jibergen edik.

26Kelesi kúni Pavel janına sol tórt adamdı alıp, olar menen birge tazalanıw rásiminen ótti. Sońınan tazalanıw kúnleriniń qashan tamam bolatuǵının hám hár biri ushın qashan qurbanlıq shalınatuǵının bildiriw ushın, Ibadatxanaǵa kirdi.

Paveldiń qolǵa alınıwı

27Jeti kúnlik múddet tamamlanıwǵa shamalasqanda, Aziya úlkesinen kelgen yahudiyler Paveldi Ibadatxanada kórip, pútkil xalıqqa qozǵalań saldı da, onı uslap alıp:

28– Háy, izraillılar, járdem berińler! Bul adam hámme jerde hámme adamlarǵa biziń xalqımızǵa, Muxaddes Nızamǵa hám Ibadatxanaǵa qarsı tálim berip júr. Onıń ústine, greklerdi de Ibadatxanaǵa alıp kelip, bul muxaddes orındı haramladı, – dep baqırıstı.

29Óytkeni olar bunnan aldın Paveldi qalada efesli Trofim menen birge kórgenlikten, Pavel onı Ibadatxanaǵa alıp kelgen, dep oylaytuǵın edi.

30Pútkil qala ayaqqa turdı. Hár tárepten juwırısıp kelgen xalıq Paveldi uslap, Ibadatxananıń sırtına súyrep shıǵardı. Sol waqıtta-aq Ibadatxananıń dárwazası jabıldı. 31Olar Paveldi óltirmekshi bolıp atırǵanda, Rim mıńbasısına: «Pútkil Erusalim qozǵalań kóterdi!» – degen xabar jetip bardı. 32Mıńbası dárhal áskerler menen júzbasılardı janına alıp, xalıq turǵan jerge juwırıp keldi. Olar mıńbası menen áskerlerdi kórgende, Paveldi urıwdı toqtattı.

33Sonda mıńbası jaqınlap kelip, Paveldi tutqınǵa aldı da, qos shınjır menen baylawdı buyırdı. Sońınan:

– Bul kim? Ol ne isledi? – dep soradı.

34Xalıq ishinen birewi anaw, birewi mınaw, dep baqırdı hám shawqım sebepli jónli juwap ala almaǵanlıqtan, mıńbası Paveldi áskeriy bólimge alıp ketiwdi buyırdı. 35Pavel basqıshqa kelgende, xalıq sonday ǵázepli bolǵanlıqtan, áskerler onı kóterip júriwge májbúr boldı. 36Xalıq onıń izinen:

– Onı joq etińler! – dep baqırıp júrdi.

Paveldiń ózin aqlawı

37Áskeriy bólimge kireyin dep atırǵanda, Pavel mıńbasıǵa:

– Sizge bir nárse aytsam bola ma? – dedi.

Mıńbası:

– Sen grekshe bileseń be? 38Demek, sen bunnan burın qozǵalań kóterip, tórt mıń qozǵalańshını shólge aparǵan mısırlı emes ekenseń-ǵo, – dedi.

39Pavel:

– Men yahudiymen. Kilikiyanıń belgili qalası Tarsustıń puqarasıman. Sizden ótinish, xalıqqa sóz sóylewge ruxsat etiń, – dedi.

40Mıńbası ruxsat etiwden, Pavel basqıshtıń ústinde turıp, xalıqqa qolı menen isharat etti. Tereń tınıshlıq ornaǵannan soń, olarǵa evrey tilinde sóyley basladı.