Act 22 | KaaIBT22L | STEP | – Tuwısqanlarım hám aǵalarım! Endi sizlerge aytajaq, ózimdi aqlawshı sózlerimdi tıńlańlar!

‏ Acts 22

1 – Tuwısqanlarım hám aǵalarım! Endi sizlerge aytajaq, ózimdi aqlawshı sózlerimdi tıńlańlar!

2 Paveldiń ózlerine evreyshe sóylegenin esitkende, olar burınǵıdan beter tım-tırıs boldı. Pavel bılay dep dawam etti:

3 – Men yahudiymen. Kilikiyanıń Tarsus qalasında tuwılıp, usı Erusalim qalasında óstim. Gamalieldiń qolı astında ata-babalarımızdıń nızamı boyınsha muqıyatlı túrde tárbiyalandım. Házir sizlerdiń hámmeńiz sıyaqlı, men de Qudayǵa intalı xızmet ettim. 4 Iysanıń jolı menen júriwshilerdi ólgenshe quwdalap, erkek pe, hayal ma demesten, olardı baylap qamaqqa saldım. 5 Bas ruwxaniy menen barlıq aqsaqallar keńesi de sózlerimdi tastıyıqlay aladı. Men olardan Damasktegi yahudiylerge jazılǵan xat alıp, jolǵa shıqqan edim. Meniń maqsetim Iysaǵa isenetuǵın sol jerdegi adamlardı da baylap, jazalaw ushın Erusalimge ákeliw edi.

6 Men jolǵa shıǵıp, Damaskke jaqınlaǵanımda, túsler shamasında tosattan aspannan túsken bir jarıq nur átirapımdı jarqıratıp jiberdi. 7 Men jerge jıǵıldım hám bir dawıstıń maǵan: «Shaul, Shaul! Sen nege Meni quwdalap atırsań?» – degenin esittim.

8 «Sen kimseń, Iyem?» – dep soradım men. Ol maǵan: «Men – sen quwdalap atırǵan nasıralı Iysaman» – dedi. 9 Meniń janımdaǵılar nurdı kórse de ^{▼▼ …nurdı kórse de – Bazı qoljazbalarda «…nurdı kórip, qorqınıshqa tústi».}, meniń menen sóyleskenniń sózlerin túsinbedi.

10 «Iyem, ne islewim kerek?» – dep soradım men. Iyemiz maǵan: «Ornıńnan turıp, Damaskke bar. Saǵan bekitilgen islerdiń hámmesi sol jerde aytıladı», – dedi. 11 Jańaǵı nurdıń saltanatlı jaqtısınan kózlerim kórmey qalǵanlıqtan, janımdaǵılar qolımnan uslap, meni Damaskke jeteklep apardı.

12 Sol jerde Xananiya atlı bir dinshil adam bar edi. Xananiya sol jerdegi barlıq yahudiyler arasında jaqsı atı shıqqan adam bolıp, Muxaddes Nızam boyınsha jasaytuǵın edi. 13 Ol janıma kelip turdı da: «Tuwısqanım, Shaul! Kózleriń kórip ketsin!» – dedi. Meniń sol waqıtta-aq kózlerim ashılıp, onı kórdim.

14 Xananiya bılay dedi: «Ata-babalarımızdıń Qudayı Óziniń erkin biliwiń ushın hám haq Adamdı kórip, Onıń awzınan shıqqan sesti esitiwiń ushın, seni tańladı. 15 Sebebi sen kórgenlerińdi hám esitkenlerińdi barlıq adamlarǵa járiyalap, Onıń gúwası bolasań. 16 Endi neni kútip otırsań? Ornıńnan turıp, suwǵa shomıldırıl hám Onıń atın aytıp shaqırıp, gúnalarıńnan tazalan!»

17 Men Erusalimge qaytıp kelip, Ibadatxanada duwa etip otırǵanımda, ayrıqsha jaǵdayǵa túsip, Iyemizdi kórdim. 18 Ol maǵan: «Tezirek Erusalimnen ket! Óytkeni bul jerdegi adamlar seniń Men tuwralı bergen gúwalıǵıńdı qabıl etpeydi», – dedi.

19 Men Oǵan bılay dedim: «Iyem! Olar meniń májilisxanama-májilisxana júrip, Saǵan isenetuǵınlardı qamap, sabaǵanımdı biledi. 20 Jáne de, Seniń gúwań Stepannıń qanı tógilgende, men de sol jerde edim. Men onı óltirgenlerdiń kiyimlerin qarawıllap, olardıń isin maqullap turdım».

21 Iyemiz maǵan: «Bar! Men seni uzaqqa, basqa milletlerge jiberemen», – dedi.

Rim puqarası Pavel

22 Adamlar Paveldi usı sózlerine deyin tıńladı. Biraq sońǵı sózlerdi esitkende:

– Bunday adamdı jer betinen qurtıw kerek, ol jasawǵa ılayıqlı emes! – dep dawıslarınıń barınsha baqıra basladı.

23 Olar usılay baqırısıp, ashıw menen kiyimlerin ılaqtırıp, aspanǵa shań-tozań kóterip turǵanda, 24 mıńbası Paveldi áskeriy bólimniń ishine aparıwdı buyırdı. Xalıqtıń Pavelge qarsı ne ushın usılay baqırıp atırǵanın biliw ushın, onı qamshılap, tergewdi tapsırdı. 25 Qolların kerip, qayıs penen baylap atırǵanda, Pavel sol jerde turǵan júzbasıǵa:

– Rim puqarasın húkim etpey turıp qamshılaw nızamǵa tuwrı kele me? – dedi.

26 Júzbası bunı esitkende, mıńbasıǵa barıp xabar berdi de:

– Ne isleyin dep atırsızlar? Bul adam – Rim puqarası eken-ǵo, – dedi.

27 Sonda mıńbası Paveldiń janına kelip:

– Maǵan aytshı, sen Rim puqarasımısań? – dep soradı.

– Awa, – dedi Pavel.

28 – Men bul puqaralıqqa kóp aqsha menen eristim, – dedi mıńbası.

– Al men Rim puqarası bolıp tuwıldım, – dedi Pavel.

29 Sonda Paveldi tergemekshi bolǵanlar dárhal janınan shegindi. Paveldi baylatqan mıńbası da onıń Rim puqarası ekenin bilgende qorqıp ketti.

Pavel joqarǵı keńes aldında

30 Erteńine mıńbası yahudiylerdiń Paveldi ne ushın ayıplap atırǵanın anıq bilmekshi bolǵanlıqtan, onı kisenlerden bosattı da, bas ruwxaniyler menen pútkil joqarǵı keńestiń jıynalıwın buyırdı. Sońınan Paveldi alıp kelip, olardıń aldında turǵızıp qoydı.