Act 23 | KaaIBT22L | STEP | Pavel joqarǵı keńes aǵzalarına dıqqat penen názer salıp: – Tuwısqanlarım! Men búgingi kúnge deyin Qudaydıń aldında pák hújdan menen jasadım,

‏ Acts 23

1 Pavel joqarǵı keńes aǵzalarına dıqqat penen názer salıp:

– Tuwısqanlarım! Men búgingi kúnge deyin Qudaydıń aldında pák hújdan menen jasadım, – degende, 2 bas ruwxaniy Xananiya Paveldiń janında turǵanlarǵa onıń awzına urıwdı buyırdı. 3 Sonda Pavel oǵan:

– Háy, eki júzli! Seni Quday uradı! Sen meni Muxaddes Nızam boyınsha húkim etiw ushın otırsań, biraq Muxaddes Nızamdı buzıp, meni urıwdı buyırıp atırsań, – dedi.

4 Paveldiń qasında turǵanlar:

– Qudaydıń bas ruwxaniyin de mazaq etiwge bola ma? – dedi.

5 Pavel bılay dedi:

– Tuwısqanlarım, onıń bas ruwxaniy ekenin bilmeytuǵın edim. Sebebi: «Óz xalqıńnıń basshısına jaman sóz aytpa» ^{▼▼ Shıǵ 22:28.}, – dep Muxaddes Jazıwda aytılǵan-ǵo.

6 Sonda olardıń bir bóleginiń saddukeyler, basqa bóleginiń pariseyler ekenin bilgen Pavel joqarǵı keńeste bálent dawıs penen:

– Tuwısqanlarım! Men pariseymen hám pariseydiń ulıman. Men ólilerdiń qayta tiriliwinen úmit etkenim ushın húkim etilip atırman, – dedi.

7 Pavel bunı aytqanda, pariseyler menen saddukeyler arasında jánjel payda bolıp, jıynalǵanlar ekige bólindi. 8 Óytkeni saddukeyler ólimnen qayta tiriliw de, perishte de, ruwx ta joq, deydi. Al pariseyler bulardıń hámmesin tán aladı. 9 Solay etip, jıynalısta kúshli shawqım baslandı. Pariseyler toparınan ayırım diniy muǵallimler orınlarınan turıp:

– Bizler bul adamnan hesh qanday ayıp tappay turmız. Eger oǵan ruwx yamasa perishte sóylegen bolsa she? ^{▼▼ Bazı qoljazbalarda mına sózler de bar: «Qudayǵa qarsı urısıwshı bolmayıq».} – dep qızıp sóyledi.

10 Jánjel kem-kemnen kúsheyip baratırǵanlıqtan, olardıń Paveldi tilkimlep taslawınan qorqqan mıńbası áskerlerge tómenge túsiwdi hám olardıń arasınan onı kúsh penen alıp ketip, áskeriy bólimge aparıwdı buyırdı. 11 Sol túni Iyemiz Pavelge kórinip: «Márt bol! Men tuwralı Erusalimde qalay gúwalıq bergen bolsań, Rimde de solay gúwalıq beriwiń tiyis», – dedi.

Paveldi óltiriw ushın til biriktiriw

12 Erteńine yahudiyler til biriktirip: «Paveldi óltirmegenimizshe iship-jesek, bizlerge nálet bolsın», – dep óz ara ant ishti. 13 Bul til biriktiriwge qatnasqanlardıń sanı qırıqtan aslam edi. 14 Olar bas ruwxaniyler menen aqsaqallarǵa barıp bılay dedi:

– «Paveldi óltirmegenimizshe awzımızǵa bir túyir nárse alsaq, bizlerge nálet bolsın», – dep qatal túrde ant ishtik. 15 Endi sizler joqarǵı keńes penen birlikte mıńbasıǵa barıń da, ózlerińizdi Paveldiń máselesin ele de anıǵıraq tekseretuǵın qılıp kórsetip, onı sizlerge alıp keliwin ótinish etińler. Ol keńeske kelmesten burın bizler onı óltiriwge tayar turamız.

16 Biraq Paveldiń jiyeni olardıń til biriktirgenin esitip qalıp, áskeriy bólimge bardı da, bul xabardı Pavelge jetkizdi. 17 Pavel júzbasılardıń birin janına shaqırıp:

– Bul jigitti mıńbasıǵa alıp barıń, aytatuǵın gápi bar eken, – dedi.

18 Júzbası jigitti mıńbasıǵa alıp keldi de:

– Tutqın Pavel meni shaqırıp, mına jigitti sizge aparıwımdı ótinish etken edi. Onıń sizge aytajaq gápi bar eken, – dedi.

19 Mıńbası jigittiń qolınan usladı da, onı shetke shıǵarıp:

– Maǵan ne aytpaqshı ediń? – dep soradı.

20 Jigit bılay dep juwap berdi:

– Yahudiyler óz ara til biriktirip, Paveldiń máselesin anıǵıraq tekseriw sıltawı menen, onı erteń joqarǵı keńeske alıp keliwińizdi sizden ótinish etpekshi. 21 Biraq siz olarǵa qulaq salmań! Sebebi olardıń qırıqtan aslamı onı tasada kútpekte. Olar: «Paveldi óltirmegenimizshe iship-jesek, bizlerge nálet bolsın!» – dep ant ishti. Endi olar siziń qayılshılıǵıńızdı kútip, tayar bolıp turıptı.

22 Mıńbası jigitke:

– Bulardı maǵan xabarlaǵanıńdı hesh kimge aytpa! – dep tapsırdı da, onı qaytarıp jiberdi.

Paveldiń Kesariyaǵa alıp barılıwı

23 Sońınan mıńbası júzbasılardıń ekewin janına shaqırıp alıp bılay dedi:

– Túnde, saat toǵızda Kesariyaǵa ketiw ushın, eki júz piyada ásker, jetpis atlı hám eki júz nayzalı ásker tayarlańlar. 24 Paveldi mindirip, onı aman-esen hákim Felikske jetkiziw ushın, atlar menen támiyinleńler.

25 Sońınan mıńbası tómendegi xattı jazdı:

26 «Húrmetli hákim Felikske Klavdiy Lisyastan sálem!

27 Yahudiyler bul adamdı uslap alıp óltireyin dep atır edi. Biraq men onıń Rim puqarası ekenin bilgenimnen soń, áskerlerim menen jetip barıp, qutqarıp qaldım. 28 Onı ne ushın ayıplap atırǵanın bilmekshi bolıp, yahudiylerdiń joqarǵı keńesine alıp bardım. 29 Sonda onıń yahudiylerdiń nızamına baylanıslı tartıslı nárseler sebepli ayıplanıp atırǵanın anıqladım. Biraq onda ólimge yamasa qamalıwǵa ılayıq hesh qanday ayıp joq. 30 Bul adamǵa qarsı qastıyanshılıq islenejaq ekenligi maǵan xabar etilgende, onı dárhal sizge jolladım. Onıń ayıplawshılarına da oǵan qarsı shaǵımların siziń aldıńızda aytıwdı buyırdım».

31 Solay etip, áskerler ózlerine berilgen buyrıq boyınsha Paveldi alıp, túnde Antipatris degen qalashaǵa bardı. 32 Erteńine olar atlı áskerlerdi Pavel menen joldı dawam etiw ushın qaldırıp, ózleri áskeriy bólimge qaytıp keldi. 33 Atlı áskerler Kesariyaǵa barıp, xattı hákimge berdi de, Paveldi onıń qolına tapsırdı. 34 Hákim xattı oqıp, Pavelden qaysı úlkeden ekenin soradı. Kilikiyalı ekenin bilgende, oǵan: 35 «Seni ayıplawshılarıń kelgende tıńlayman», – dedi de, onıń Hirodtıń sarayında qarawıllanıwın buyırdı.