Act 24 | KaaIBT22L | STEP | Aradan bes kún ótkennen soń, bas ruwxaniy Xananiya ayırım aqsaqallar hám Tertulus atlı sheshen bir nızam qániygesi menen Kesariyaǵa kelip, hákimge Paveldiń ústinen shaǵım jasadı.

‏ Acts 24

Pavel hákim Feliks aldında

1 Aradan bes kún ótkennen soń, bas ruwxaniy Xananiya ayırım aqsaqallar hám Tertulus atlı sheshen bir nızam qániygesi menen Kesariyaǵa kelip, hákimge Paveldiń ústinen shaǵım jasadı. 2 Pavel shaqırılǵanda, Tertulus onı ayıplay basladı:

– Ullı mártebeli Feliks! Siziń arqańızda uzaq waqıtlardan beri tınıshlıqta jasap atırmız. Siziń keleshekti kóre biletuǵınıńız arqalı bul millettiń abadanshılıǵı rawajlanıp barmaqta. 3 Bizler bunı hámme waqıtta, hámme jerde úlken minnetdarshılıq penen moyınlaymız. 4 Biraq siziń waqtıńızdı almaw ushın, bizlerdiń aytajaq bir awız sózimizdi dıqqat penen tıńlawıńızdı ótinish etemen.

5 Bizler bul adamdı dúnya júzindegi pútkil yahudiyler arasında qozǵalań kótergen illettey qáwipli bir adam dep taptıq. Ol «Nasıralılar» ^{▼▼ Nasıralılar – Iysa Nasıra qalasınan bolǵanlıqtan, Oǵan iseniwshi adamlardı «Nasıralılar» dep ataǵan.} dep atalǵan topardıń jetekshileriniń biri. 6 Hátte, ol Ibadatxanamızdı da haramlamaqshı bolǵanda, bizler onı qolǵa aldıq. [ 7 ^{▼▼ Bazı qoljazbalarda 6-ayattıń aqırında, 7-ayat hám 8-ayattıń basında mına sózler bar: 6 «Bizler onı nızamımız boyınsha húkim etpekshi boldıq. 7 Biraq mıńbası Lisyas kelip, onı bizlerdiń qolımızdan tartıp aldı da, 8 onıń ayıplawshılarına siziń aldıńızǵa barıwdı buyırdı».}] 8 Siz de onı tergegenińizde, bizlerdiń onı ne ushın ayıplap atırǵanımızdıń hámmesin ózinen bilip alasız.

9 Yahudiyler de Paveldi ayıplap, aytılǵanlardıń durıs ekenin maqulladı.

10 Hákim Paveldiń sóylewi ushın isharat etkende, Pavel bılay dep juwap berdi:

– Siziń kóp jıllardan beri bul milletke qazılıq etip kiyatırǵanıńızdı bilip, ózimdi siziń aldıńızda aqlaytuǵınıma quwanıshlıman. 11 Meniń Erusalimge sıyınıw ushın kelgenime on eki kúnnen kóp bolmaǵanın ózińiz bilip alıwıńızǵa boladı. 12 Olar meniń ya Ibadatxanada, ya májilisxanalarda, ya qalanıń basqa bir jerinde birew menen tartısıp turǵanımdı yamasa xalıqqa qozǵalań salıp júrgenimdi kórmedi. 13 Házir de maǵan taǵıp atırǵan ayıpların sizge dálillep bere almaydı. 14 Biraq, sizge mınanı moyınlayman: olar «azǵın topar» dep ataytuǵın jol boyınsha men ata-babalarımnıń Qudayına sıyınıp, Muxaddes Nızamda hám payǵambarlardıń Jazıwlarında aytılǵan hár bir nársege isenemen. 15 Bul adamlar sıyaqlı men de haq adamlardıń da, gúnakarlardıń da qayta tiriliwine Qudaydan úmit etemen. 16 Sonlıqtan da, men Qudaydıń hám adamlardıń aldında pák hújdanlı bolıwǵa hámme waqıt tırısaman.

17 Milletime qayır-sadaqa, Qudayǵa qurbanlıqlar beriw ushın, kóp jıldan soń Erusalimge qaytıp keldim. 18 Men tazalanıw rásiminen ótip, usılardı islep atırǵanımda, olar meni Ibadatxanada kórdi. Sonda meniń qasımda kóp adam da, shawqım da bolǵan joq. 19 Biraq ol jerde Aziya úlkesinen kelgen ayırım yahudiyler bar edi. Siziń aldıńızda áne solar turıp, maǵan taǵatuǵın ayıpları bar bolsa, aytıwları kerek. 20 Ya bolmasa, joqarǵı keńestiń aldında turǵanımda, mennen qanday ayıp tapqanın bul jerdegi adamlar aytsın. 21 Men tek olardıń aldında turǵanımda: «Ólilerdiń qayta tiriletuǵınına isengenim ushın, búgin men húkim etilip atırman», – dep baqırǵan edim.

22 Sonda Feliks Iysanıń jolı tuwralı jaqsı bilgenlikten:

– Dawıńızdı mıńbası Lisyas kelgende sheshemen, – dedi de, istiń qaralıwın keyinge qaldırdı.

23 Sońınan ol júzbasıǵa Paveldi qarawıllawdı, biraq erkinlik berip, doslarınıń oǵan járdemlesiwine tıyım salmawdı buyırdı.

Paveldiń Kesariyada tutqın bolıwı

24 Bir qansha kúnnen soń, Feliks óziniń Druzilla atlı yahudiy hayalı menen birge keldi. Ol Paveldi shaqırtıp alıp, onıń Masiyx Iysaǵa iseniw haqqında aytqanların tıńladı. 25 Pavel haqlıq, ózin tıyıw hám keleshektegi húkim haqqında aytqanda Feliks qorqıp ketip:

– Házirshe bara ber. Waqıt tapsam, seni jáne shaqırtıp alaman, – dedi. 26 Sonıń menen birge, bosatılıwı ushın Paveldiń ózine para beriwinen úmit etetuǵın edi. Sonlıqtan onı tez-tez shaqırtıp, onıń menen gúrrińlesetuǵın edi.

27 Biraq aradan eki jıl ótkende, Felikstiń ornına Porkiy Fest keldi. Feliks yahudiylerge jaǵınǵısı kelgenlikten, Paveldi qamaqta qaldırıp ketti.