‏ Acts 25

Pavel Festtiń aldında

1Fest úlkege hákimlik wazıypasına kelgennen soń úsh kún ótkende, ol Kesariyadan Erusalimge bardı. 2Sonda bas ruwxaniyler menen yahudiylerdiń basshıları oǵan Paveldiń ústinen shaǵım jasadı. 3Miyrimlilik kórsetip, Paveldi Erusalimge jiberiwin onnan jalınıp soradı. Al ózleri Paveldi jolda óltirmekshi bolıp, til biriktirgen edi. 4Fest olarǵa juwap berip, Paveldiń Kesariyadaǵı qamaqta ekenin hám óziniń de jaqında sol jerge baratuǵının ayttı da:

5– Arańızda biyligi barlar meniń menen birge barıp, sol adam bir qılmıs islegen bolsa, onı ayıplasın, – dedi.

6Fest olardıń janında segiz yamasa on kúnnen artıq qalmay, Kesariyaǵa qayttı. Erteńine ol húkim gúrsisine otırıp, Paveldi alıp keliwdi buyırdı. 7Pavel kelgende, Erusalimnen barǵan yahudiyler onıń átirapın qorshap aldı da, oǵan ózleri dálillep bere almaytuǵın kóp awır ayıplar taqtı.

8Pavel ózin aqlap:

– Men ya yahudiylerdiń nızamına, ya Ibadatxanaǵa, ya Rim imperatorına qarsı hesh qanday jınayat islegenim joq, – dedi.

9Biraq yahudiylerge jaǵınǵısı kelgen Fest Pavelge:

– Erusalimge barıp, sol jerde usılar boyınsha meniń aldımda húkim etiliwdi qáleyseń be? – dedi.

10Pavel bılay dedi:

– Men Rim imperatorınıń húkim gúrsisi aldında turman. Men usı jerde húkim etiliwim tiyis. Meniń yahudiylerge hesh qanday jamanlıq islemegenimdi ózińiz júdá jaqsı bilesiz. 11Eger men ayıplı bolsam hám ólimge ılayıqlı bir nárse islegen bolsam, ólimnen bas tartpas edim. Al eger bulardıń maǵan taǵıp atırǵan ayıpları tiykarsız bolsa, onda hesh bir adamnıń meni olardıń qolına uslap beriwge haqısı joq. Men imperatordıń húkimin talap etemen.

12Sonda Fest keńesgóyleri menen másláhátleskennen soń:

– Sen Rim imperatorınıń húkimin talap ettiń, endi imperatorǵa barasań, – dep juwap berdi.

Pavel Agrippa patshanıń aldında

13Bir qansha kúnnen soń, Agrippa patsha menen Bernika ▼

▼ Bernika – Agrippanıń qarındası.

Festti qutlıqlaw ushın Kesariyaǵa keldi. 14Olar sol jerde kóp kún qalǵanlıqtan, Fest Paveldiń isin patshaǵa bildirip bılay dedi:

– Bul jerde Feliks qamaqta qaldırıp ketken bir adam bar. 15Men Erusalimde bolǵanımda, yahudiylerdiń bas ruwxaniyleri menen aqsaqalları oǵan ayıp taǵıp, onı jazalawımdı talap qılǵan edi.

16Men olarǵa: «Ayıplanıwshı óz ayıplawshıları menen júzlespey turıp, oǵan taǵılıp atırǵan ayıplardan ózin qorǵawǵa múmkinshilik bermesten, onı uslap beriw – rimlilerdiń ádetine qayshı keledi», – dep juwap berdim. 17Sonlıqtan olar meniń menen bul jerge kelgende, men waqıttı bosqa jibermey, erteńine-aq húkim gúrsisine otırdım da, sol adamnıń alıp keliniwin buyırdım. 18Biraq ayıplawshılar orınlarınan turǵanda, oǵan men kútken ayıplardıń hesh birin taqpadı. 19Tek olardıń óz dini hám bir Iysa atlı ólgen, biraq Pavel tiri dep tastıyıqlaǵan adam haqqında ayırım tartısları bar eken. 20Men bul máseleni qalay sheshiwdi bilmey basım qatıp, Pavelden: «Erusalimge barıp, usılar boyınsha sol jerde húkim etiliwdi qáleyseń be?» – dep soradım. 21Biraq ol óz isin Rim imperatorınıń qarawın hám oǵan deyin qamaqta qaldırılıwın talap etti. Sonlıqtan men onı imperatorǵa jollawıma deyin qamaqta bolıwın buyırdım.

22Sonda Agrippa Festke:

– Bul adamdı men de tıńlaǵım keledi, – dedi.

– Onı erteń-aq tıńlaysız, – dedi Fest.

23Erteńine Agrippa menen Bernika ullı sán-saltanat penen kelip, mıńbasılar hám qalanıń abıraylı adamları menen birlikte rásmiy zalǵa kirdi. Festtiń buyrıǵı boyınsha Pavel alıp kelindi. 24Fest bılay dedi:

– Patsha Agrippa hám usı jerdegi hámme adamlar! Sizler mına adamdı kórip tursızlar. Erusalimde de, bul jerde de, pútkil yahudiy xalqı onıń ústinen maǵan shaǵım jasap: «Ol bunnan bılay jasamawı tiyis» – dep baqırısqan edi. 25Biraq men onıń ólim jazasına ılayıq hesh qanday is islemegenin anıqladım. Onıń ózi imperatordıń húkimin talap etkenlikten, onı Rimge jiberiwge qarar ettim. 26Al mende bolsa, ol haqqında húkimdarǵa jazǵanday, belgili hesh nárse joq. Sonlıqtan bul tergewdiń nátiyjesinde maǵan jazıwǵa bir nárse tabılıp qalar dep, onı sizlerdiń aldıńızǵa, ásirese, patsha Agrippa, siziń aldıńızǵa shıǵardım. 27Óytkeni tutqındı imperatorǵa jollap, oǵan qoyılǵan ayıplardı bildirmew nadurıs bolar, dep oylayman.