Act 27 | KaaIBT22L | STEP | Italiyaǵa keme menen ketiwge qarar etkenimizde, Pavel menen basqa ayırım tutqınlar imperator Avgust atındaǵı áskeriy bóliminen bolǵan Yuliy atlı bir júzbasıǵa tapsırıldı.

‏ Acts 27

Paveldiń Rimge qaray jolǵa shıǵıwı

1 Italiyaǵa keme menen ketiwge qarar etkenimizde, Pavel menen basqa ayırım tutqınlar imperator Avgust atındaǵı áskeriy bóliminen bolǵan Yuliy atlı bir júzbasıǵa tapsırıldı. 2 Aziya úlkesiniń jaǵalarındaǵı jaǵıslarǵa baratuǵın Adramittiń kemesine minip, bizler jolǵa shıqtıq. Janımızda Salonikadan kelgen makedoniyalı Aristarx ta bar edi.

3 Erteńine Sidonǵa jetip keldik. Yuliy Pavelge adamgershilik islep, onıń óz mútájliklerine járdem alıwı ushın, doslarına barıp keliwine ruxsat etti. 4 Ol jerden keme menen jáne jolǵa shıqtıq. Samal qarsı aldımızdan esip turǵanlıqtan, Kipr atawınıń ıq jaǵı menen júrdik. 5 Kilikiya hám Pamfiliya úlkeleriniń qarsı aldındaǵı ashıq teńizden ótip, Likiyanıń Mira qalasına keldik. 6 Júzbası sol jerde Italiyaǵa baratuǵın Iskenderiyadan kelgen kemeni tawıp, bizlerdi oǵan mingizdi. 7 Kóp kún boyı áste-aqırın júzip, zorǵa degende Knidosqa jetip bardıq. Samalǵa qarsı júziw qıyın bolǵanlıqtan, Krit atawınıń ıq jaǵı menen Salmon qalasınıń qasınan óttik. 8 Jaǵa boylap zordan júzip, Laseya qalasınıń qasındaǵı «Gózzal jaǵıs» degen jerge keldik.

9 Bizler kóp waqıttı sarp etip aldıq. Hátte, yahudiylerdiń oraza kúni ^{▼▼ Oraza kúni – yaǵnıy Gúnadan pákleniw kúni. Bul kúnler teńizde kúshli dawıllar kóteriletuǵın gúz aylarına tuwra keletuǵın edi.} de ótip ketkenlikten, endi júziw qáwipli edi. Sonlıqtan Pavel olarǵa eskertip:

10 – Adamlar! Bul jolımız tek júk hám keme ushın emes, al janlarımız ushın da júdá qáwipli hám zıyanlı bolatuǵının kórip turman, – dedi.

11 Biraq júzbası Paveldiń sózlerinen góre, keme aydawshısı menen kemeniń xojayınınıń sózine qulaq astı. 12 Jaǵıs qıslawǵa qolaylı bolmaǵanlıqtan, kemedegilerdiń kóbisi jolǵa shıǵıwdı hám ilajı bolsa Fenikske jetip, qıstı sol jerde ótkiziwdi sheshti. Feniks – qubla-batıs hám arqa-batıs táreplerge qaraǵan, Kritte jaylasqan bir jaǵıs edi.

Teńizdegi dawıl

13 Qubladan jumsaq samal ese baslaǵanda, olar óz maqsetimizge jettik dep oylap, kóshkini kóterdi de, Krittiń jaǵası menen júzip ketti. 14 Biraq kóp ótpey, ataw tárepten «Arqa-shıǵıs» dep atalatuǵın dawıl bastırıp keldi. 15 Keme dawıl tárepinen iskenjege alınıp, samalǵa qarsı tura alatuǵın kúshimiz bolmaǵanlıqtan, bizler táslim bolıp kete berdik. 16 Kavda dep atalatuǵın bir kishi atawdıń ıq jaǵına jetkenimizde, kemeniń qayıǵın zorǵa degende saqlap úlgerdik. 17 Kemeshiler qayıqtı joqarıǵa tartıp shıǵarıp, kemeni aylandırıp arqan menen bekkem etip baylap qoydı. Liviya jaǵasınıń qayır jerlerine tiyiwden qorqıp, tezlikti qaytaratuǵın úskeneni túsirdi de, ıǵıp kete berdi. 18 Dawıl bizlerdi qattı qıynaǵanlıqtan, olar erteńine kemeden júk ılaqtıra basladı. 19 Úshinshi kúni kemeniń qural-saymanların da óz qolları menen teńizge ılaqtırdı. 20 Kóp kún boyı quyash ta, juldızlar da kórinbedi. Dawıl ele qáhárli bolǵanlıqtan, aqırında aman qalıwdan úmitimizdi pútkilley úzdik.

21 Adamlar kóp waqıttan beri hesh nárse jemegen edi. Sonda Pavel ortaǵa shıǵıp bılay dedi:

– Adamlar! Maǵan qulaq asıp, Kritten shıqpaǵanıńızda, bunday qáwip-qáter menen shıǵınǵa ushıramaǵan bolar edik. 22 Biraq endi sizlerdi márt bolıwǵa shaqıraman. Tek keme ǵana apatqa ushırap, arańızda hesh bir jan nabıt bolmaydı. 23 Sebebi men tiyisli bolıp, xızmet etip júrgen Qudaydıń bir perishtesi ótken túni janıma kelip, 24 bılay dedi: «Qorqpa Pavel! Sen Rim imperatorınıń aldına barıwıń tiyis. Jáne Quday seniń menen saparlas bolǵanlardıń hámmesin saǵan baǵıshladı». 25 Sonlıqtan, adamlar, márt bolıńlar! Men Qudayǵa isenemen: maǵan ne aytılsa, sol boladı. 26 Bizler bir atawǵa ıǵızılıp aparılıwımız tiyis.

27 Dawıldıń baslanǵanına on tórt kún bolǵanda, bizler Adriya teńizinde ıǵıp júr edik. Shama menen túnniń yarımında kemeshiler qanday da bir qurǵaqlıqqa jaqınlasqanın shamaladı. 28 Sonda olar teńizdiń tereńligin ólshep, jigirma qulash ekenin bildi. Az-maz waqıttan soń jáne ólshep kórgende, on bes qulash ekenin kórdi. 29 Suwdıń astındaǵı jartasqa urılıwımızdan qorqıp, olar kemeniń art betinen tórt kóshki ılaqtırdı da, tańnıń tezirek atıwın tilep, duwa etti. 30 Kemeshiler kemeden qashpaqshı bolıp, aldınǵı tárepten kóshki taslawdı sıltawladı da, qayıqtı teńizge túsire basladı. 31 Biraq Pavel júzbası menen áskerlerge:

– Bular kemede qalmasa, sizlerge aman qalıw joq, – dedi.

32 Sonda áskerler qayıqtıń arqanların kesip, onı teńizge túsirip jiberdi.

33 Tań atayın dep turǵanda, Pavel hámmeni awqat jewge úgitlep:

– Hesh nárse jemey awqatsız qalıp kútkenińizge búgin on tórt kún boldı. 34 Sonlıqtan awqat jep alıwıńızdı ótinish etemen. Bul aman qalıwıńız ushın zárúr. Hesh qaysısıńızdıń bir tal shashıńız da nabıt bolmaydı, – dedi.

35 Pavel usılardı aytıp bolıp nandı aldı da, hámmeniń aldında Qudayǵa shúkirlik bildirip, nandı bólip jey basladı. 36 Sonda hámme jigerlenip, awqat jedi. 37 Kemede barlıǵımız bolıp eki júz jetpis altı jan edik. 38 Awqatqa toyıp bolǵannan soń, olar biydaydı teńizge tógip, kemeni jeńilletti.

Kemeniń apatqa ushırawı

39 Tań atqanda, kemeshiler ózleri kelgen jerdi tanımadı. Biraq jaǵası qumlıq bolǵan bir qoltıqtı kórip qalıp, múmkin bolsa, kemeni sol jerge aparıp toqtatıwdı uyǵardı. 40 Kóshkilerdiń arqanların kesip, teńizge tasladı da, baǵıtlawshı eki eskekti baylaǵan arqanlardı sheshti. Aldınǵı jelqomdı samal tárepke kóterip, jaǵaǵa qaray júzip ketti. 41 Biraq keme bir qumlı sayız jerge tap bolıp, tumsıǵı qumǵa battı da, qıymıldamay qaldı. Al artqı jaǵı kúshli tolqınlar tárepinen soqqılanıp, sınıp ketti.

42 Tutqınlar júzip qashıp ketedi dep oylap, áskerler olardı óltirmekshi boldı. 43 Biraq júzbası Paveldi qutqarǵısı kelip, áskerlerge bul niyetin iske asırıwǵa tıyım saldı. Sońınan júzip biletuǵınlarǵa birinshi bolıp ózlerin teńizge atıp, jaǵaǵa shıǵıwların buyırdı. 44 Al qalǵanları bolsa, kimisi taxtay, kimisi kemeniń sınıq bóleklerinen uslap, olardıń izlerinen jetip bardı. Solay etip, hámmesi aman-esen jaǵaǵa shıqtı.