Act 28 | KaaIBT22L | STEP | Aman qalǵanımızdan soń, atawdıń atınıń Malta ekenin bildik.

‏ Acts 28

Maltada

1 Aman qalǵanımızdan soń, atawdıń atınıń Malta ekenin bildik. 2 Jergilikli adamlar bizlerge ádetten tıs adamgershilik kórsetti. Jawın jawıp, kún suwıq bolǵanlıqtan, olar ot jaǵıp, hámmemizdi jaqsı qabıl etti. 3 Pavel bir qushaq otın jıynap, ottıń ústine saldı. Sonda ottıń ıssısınan qashqan bir uwlı jılan onıń qolına jabıstı. 4 Jergilikli adamlar Paveldiń qolına jılannıń asılıp turǵanın kórip, bir-birine:

– Bul adam, sózsiz, adam óltirgen qanxor eken. Teńizden aman qalǵan bolsa da, ádillik qudayı ^{▼▼ Ádillik qudayı – greklerdiń mifologiyası boyınsha, ádillikti saqlaytuǵın hayal quday.} onıń tiri qalıwına jol qoymadı, – desti.

5 Biraq Pavel qolın silkip, jılandı ottıń ishine ılaqtırıp jiberdi hám hesh qanday zıyan kórmedi. 6 Olar Paveldiń denesiniń isip ketiwin yamasa birden ólip qalıp, jerge jıǵılıwın kútip tur edi. Biraq uzaq waqıt kútip, oǵan hesh qanday zıyan kelmegenin kórgende, pikirlerin ózgertip: «Ol bir quday», – desti.

7 Bizler turǵan jerdiń jaqınında atawdıń basshısı bolǵan Publiy atlı adamnıń jer múlki bar edi. Ol bizlerdi úyine qabıl etip, úsh kún miyman qıldı. 8 Sol waqıtta Publiydiń ákesiniń ıssılıǵı kóterilip, ishi ótip awırıp jatırǵan edi. Pavel onıń janına barıp duwa etti de, qolların onıń ústine qoyıp, shıpa berdi. 9 Usı waqıyadan soń, atawdaǵı basqa awırıw adamlar da kelip, shıpa tabatuǵın edi. 10 Olar bizlerge kóp húrmet kórsetti hám jolǵa shıǵıp baratırǵanımızda kerekli nárselerdi kemege júkledi.

Paveldiń Rimge jetip barıwı

11 Úsh aydan soń, Iskenderiyadan kelip sol atawda qıslap qalǵan, Egiz qudaylardıń tulǵası qoyılǵan bir keme menen jolǵa shıqtıq. 12 Sirakuz qalasına barıp, úsh kún qaldıq. 13 Ol jerden jolımızdı dawam etip, Regiumǵa keldik. Erteńine qubladan ese baslaǵan samaldıń járdemi menen eki kúnde Puteoliyge bardıq. 14 Ol jerden tuwısqanlarımızdı taptıq. Olardıń ótinishi boyınsha, bizler olar menen birge bir hápte qaldıq. Aqırında bizler Rimge keldik. 15 Xabarımızdı esitken Rimdegi tuwısqanlarımız bizlerdi kútip alıw ushın Appiy maydanına hám Úsh miymanxana degen orınǵa deyin keldi. Pavel olardı kórgende Qudayǵa shúkirlik etip, jigerlenip qaldı. 16 Rimge kelgenimizde, Pavelge ^{▼▼ Rimge kelgenimizde, Pavelge – Bazı qoljazbalarda «Rimge kelgenimizde, júzbası qamaqtaǵılardı bas saqshıǵa tapsırdı. Biraq Pavelge».} ózin qarawıllaytuǵın ásker menen birge óz aldına jasawǵa ruxsat etildi.

Paveldiń Rimde waz aytıwı

17 Úsh kúnnen soń, Pavel Rimdegi yahudiy jetekshilerin shaqırdı. Olar jıynalǵanda, Pavel bılay dedi:

– Tuwısqanlarım! Men xalqımızǵa yamasa ata-babalarımızdıń úrp-ádetlerine qarsı hesh nárse islemesem de Erusalimde tutqın bolıp, rimlilerdiń qolına tapsırıldım. 18 Olar meni tergep bolǵannan soń, bosatıp jibermekshi boldı. Óytkeni maǵan ólim jazasın beretuǵınday hesh qanday tiykar joq edi. 19 Biraq, yahudiyler buǵan qarsı shıqqanlıqtan, men Rim imperatorınıń húkimin talap etiwge májbúr boldım. Degen menen, bunı men óz xalqımdı ayıplamaqshı bolıp islemedim. 20 Sonlıqtan sizlerdi bul jerge usılar haqqında sóylesip, ushırasıwǵa shaqırdım. Sebebi men Izraildıń úmiti ushın mına shınjırlar menen baylanǵanman.

21 Olar Pavelge:

– Sen tuwralı Yahudiyadan xat almadıq, ol jerden kelgen ózimizdiń adamlardıń hesh biri sen tuwralı jaman xabar da ákelmedi yamasa jaman nárse de aytpadı. 22 Biraq bizler seniń pikirińdi ózińnen esitiwdi qáleymiz. Óytkeni hámme jerde sen tiyisli bolǵan bul toparǵa qarsı shıǵıp atırǵanın bilemiz, – dedi.

23 Olar Pavel menen bir kúndi belgilep, sol kúni kóp adamlar menen birge ol bolıp atırǵan jerge keldi. Pavel azannan keshke deyin olarǵa Qudaydıń Patshalıǵı tuwralı gúwalıq berip, túsindirdi. Muwsanıń Nızamına hám payǵambarlardıń Jazıwlarına tiykarlanıp, olardı Iysa haqqında aytılǵanlarǵa isendiriwge háreket etti. 24 Ayırımları Paveldiń sózlerine isendi, al bazıları isenbey qaldı. 25 Óz ara bir kelisimge kele almay, Pavel mına sońǵı sózlerin aytıp turǵanda olar kete basladı:

– Muxaddes Ruwx Iyshaya payǵambar arqalı ata-babalarıńızǵa bılay sóylep, durıs aytqan:

26 «Bul xalıqqa barıp, mınalardı ayt: Tıńlap turasız, biraq túsinbeysiz,
Qarap turasız, biraq mán bermeysiz.
27 Sebebi bul xalıqtıń júregi sezimsiz bolıp,
Qulaqları pitip qalǵan, kózleri gúńgirtlesken.
Olay bolmaǵanda, olardıń kózleri kórer edi,
Qulaqları esiter edi, júrekleri menen túsiner edi.
Olar Maǵan qaytıp kelse, Men olarǵa shıpa berer edim». ^{▼▼ Iysh 6:9-10.}

28 Mınanı bilip qoyıńlar: Quday Óziniń bul qutqarılıwın basqa milletlerge berdi. Olar bunı qabıl aladı. [ 29 ^{▼▼ Bazı qoljazbalarda 29-ayat ta bar: «Paveldiń bul sózlerinen soń, yahudiyler óz ara qattı tartısıp, sol jerden ketip qaldı».}]

30 Pavel kireyge alǵan jayında tolıq eki jıl bolıp, ózin kóriwge kelgenlerdiń hámmesin qabıl etti. 31 Ol batıllıq penen, hesh bir tosqınlıqsız Qudaydıń Patshalıǵı tuwralı járiyalap, Iyemiz Iysa Masiyx haqqında tálim berdi.