‏ Amos 1

1Teqoalı sharwashılardıń biri bolǵan Amostıń sózleri. Yahuda patshası Uzziya, Izrail patshası Ehoash ulı Yarobam húkimdarlıq qılǵan waqıtlarda, jer silkiniwden eki jıl aldın, Amos Izrail haqqında ayanlar kórdi.

2Amos bılay dedi:

«Jaratqan Iye Sionnan dawıslap baqıradı,
Erusalimnen gúrkiregen dawıs shıǵaradı.
Shopanlardıń jaylawları qayǵıǵa batadı,
Karmel tawınıń joqarısındaǵı shópler quwrap qaladı».

Izrailǵa qońsılas xalıqlardıń jazalanıwı

Aram

3Jaratqan Iye bılay deydi:
«Damask jınayat ústine jınayat isledi,
Men jazasız qaldırmayman olardı,
Olar temir tisli mala menen Giladtı ezdi.
4Sonıń ushın, Xazaeldiń úyine ot jawdıraman,
Ot jandırıp joq etedi Ben-Hadadtıń qorǵan qalaların.
5Damask dárwazalarınıń támbilerin sındıraman,
Awen oypatlıǵında taxtta otırǵandı joq qılaman,
Beyt-Edende patshalıq hasasın uslaǵandı óltiremen,
Kir jurtına súrgin boladı aram xalqı».
Bular Jaratqan Iyeniń sózleri.

Filist

6Jaratqan Iye bılay deydi:
«Gaza jınayat ústine jınayat isledi,
Men jazasız qaldırmayman olardı.
Olar pútkil jámiyetti súrginge alıp ketip,
Edomlılarǵa satıp jiberdi.
7Sonıń ushın, Gaza diywallarına ot jawdıraman,
Ot jandırıp joq etedi onıń qorǵan qalaların.
8Ashdod qalasında taxtta otırǵandı joq qılaman,
Ashkelonda patshalıq hasasın uslaǵandı óltiremen.
Ekronǵa qarsı qolımdı kóteremen,
Filistlerdiń aman qalǵanları joq boladı».
Bular Quday Iyeniń sózleri.

Tir

9Jaratqan Iye bılay deydi:
«Tir jınayat ústine jınayat isledi,
Men jazasız qaldırmayman olardı.
Olar doslıq kelisimin umıtıp,
Pútkil jámiyetti tutqınǵa alıp,
Edomlılarǵa satıp jiberdi.
10Sonıń ushın, Tir qalasınıń diywallarına ot jawdıraman,
Ot jandırıp joq etedi onıń qorǵan qalaların».

Edom

11Jaratqan Iye bılay deydi:
«Edom jınayat ústine jınayat isledi,
Men jazasız qaldırmayman olardı.
Olar qılısh penen quwdı tuwısqanların,
Rehim qılmay, qáhárin sheksiz shashtı,
Ǵázebinen hesh qaytpadı.
12Sonıń ushın, Temanǵa ot jawdıraman,
Ot jandırıp, joq etedi Bosranıń qorǵanların».

Ammon

13Jaratqan Iye bılay deydi:
«Ammon jınayat ústine jınayat isledi,
Men jazasız qaldırmayman olardı.
Olar jer shegarasın keńeytiw ushın Giladqa hújim qılıp,
Ol jerdegi júkli hayallardıń qarnın jardı.
14Sonıń ushın, Rabba qalasınıń diywallarına ot qoyaman,
Ot jandırıp, joq qıladı onıń qorǵan qalaların.
Sawash kúnindegi qıshqırıqlar astında,
Dawıllı kúnniń dúbeleyi ishinde qaladı.
15Ammon patshası xızmetshileri menen birge súrgin etiledi».
Bular Jaratqan Iyeniń sózleri.