‏ Amos 2

Moab

1Jaratqan Iye bılay deydi:
«Moab jınayat ústine jınayat isledi,
Men jazasız qaldırmayman olardı.
Olar Edom patshasınıń súyeklerin,
Hák kúydirgendey etip jaǵıp jiberdi.
2Sonıń ushın, Moabqa ot jawdıraman,
Ot jandırıp, joq etedi Keriyot qorǵan qalasın.
Shawqım, sawash dabılları hám kárnay sesleri astında,
Moab xalqı qırılıp ketedi.
3Onıń húkimdarın joq qılaman,
Hámeldarı menen birge barlıq xızmetshilerin óltiremen».
Bular Jaratqan Iyeniń sózleri.

Yahudanıń jazalanıwı

4Jaratqan Iye bılay deydi:
«Yahuda jınayat ústine jınayat isledi,
Jazasız qaldırmayman olardı.
Jaratqan Iyeniń, Meniń nızamlarımnan olar bas tarttı,
Qaǵıydalarımdı orınlamadı.
Ata-babaları sıyaqlı jalǵan qudaylarǵa erip,
Tuwrı joldan azǵırıldı.
5Sonıń ushın, Yahudaǵa ot jawdıraman,
Ot jandırıp joq etedi Erusalim qorǵan qalasın».

Izraildıń jazalanıwı

6Jaratqan Iye bılay deydi:
«Izrail jınayat ústine jınayat isledi,
Jazasız qaldırmayman olardı.
Ayıpsız adamdı pulǵa sattı,
Kámbaǵaldı bir jup ayaq kiyimge almastırdı.
7Olar jarlınıń basın topıraqqa bılǵap, ayaq astı qıldı,
Biysharaǵa jol bermey, shetke shıǵarıp tasladı,
Ákesi menen balası bir qız benen jatıp,
Meniń muxaddes atıma til tiygizdi.
8Hár bir qurbanlıq orınnıń qasında,
Girewge alǵan kiyimlerdi jayıp, ústinde jatadı.
Járiyma qılıp tóletken sharaptı,
Ózleriniń Qudayınıń Úyinde ishedi.
9Óz xalqım ushın Men amor xalqın joq qıldım.
Olar kedr aǵashınday uzın,
Emen aǵashınday bekkem bolsa da,
Shaqalarındaǵı miywelerin,
Jerdegi tamırların qurttım.
10Sizlerdi Mısır jerinen Men alıp shıqtım,
Amor xalqınıń jerlerin iyelesin dep,
Shólde qırıq jıl jeteledim.
11Ullarıńızdan payǵambarlar,
Jas jigitlerińizden Maǵan baǵıshlanǵan názirler tayınladım.
Solay emes pe, Izrail xalqı?
– deydi Jaratqan Iye. –
12Sizler názirlerge sharap ishtirdińiz,
„Payǵambarshılıq qılmań!“– dep,
Payǵambarlarǵa buyrıq berdińiz.

13Awır júk tiyelgen arba jerdi ezgenindey etip,
Men sizlerdi ezemen.
14Sonda shaqqanlar qashıp qutıla almaydı,
Kúshlilerdiń kúsh-quwatı qalmaydı,
Jawıngerler óz janın qutqara almaydı.
15Sadaqshı óz ornında tura almaydı,
Tez juwıratuǵınlar qasha almaydı,
Atlı óz janın qutqara almaydı.
16Sol kúni eń dáw júrek jawınger de,
Óz qural-jaraqların taslap qashadı».
Bular Jaratqan Iyeniń sózleri.