Amo 4 | KaaIBT22L | STEP | Háy, Samariya tawındaǵı semiz sıyırlarday bolǵan hayallar, Qulaq salıń mına sózlerge: Kámbaǵallardı ezesiz, Jarlılarǵa jábir beresiz, Kúyewlerińizge: «Ishimlik alıp keliń, ishemiz»,

‏ Amos 4

1 Háy, Samariya tawındaǵı semiz sıyırlarday bolǵan hayallar,
Qulaq salıń mına sózlerge:
Kámbaǵallardı ezesiz,
Jarlılarǵa jábir beresiz,
Kúyewlerińizge: «Ishimlik alıp keliń, ishemiz», – deysiz.
2 Quday Iye Óz muxaddesligi haqı ant iship, bılay deydi:
«Mine, sizlerdi shanıshqı menen ildirip,
Qalǵanlarıńızdı balıqtay qarmaq penen súyrep ketetuǵın kúnler keledi.
3 Hár birińiz buzılǵan diywal jarıqlarınan alıp ótilip,
Harmonǵa ılaqtırılasız», – deydi Jaratqan Iye.

Izrail xalqınıń Qudayǵa qaytıp kelmewi

4 «Beyt-Elge barıp, gúna isley beriń,
Gilgalǵa ketip, gúnańızdı kóbeytiń!
Azanda qurbanlıqlarıńızdı usınıń,
Hár úsh kúnnen onnan birińizdi alıp keliń.
5 Ashıtqı salınǵan shórekti minnetdarshılıq sadaqası etip jandırıń,
Íqtıyarlı sadaqalarıńızdı hámmege járiya qılıń.
Sebebi usınday qılıwdı xosh kóresiz, háy Izrail xalqı», – deydi Quday Iye.

6 «Sonıń ushın, barlıq qalalarıńızǵa ashlıq jiberdim,
Jasap atırǵan hár bir jerińizde nanǵa zar qıldım,
Sonda da, sizler Maǵan qaytıp kelmedińiz», – deydi Jaratqan Iye.

7 «Jıyın-terimge úsh ay qalǵanda,
Men sizlerge jawın jawdırmay qoydım.
Bir qalaǵa jawın jawdırdım,
Ekinshisine jawdırmadım.
Bir atızǵa jawın jawdı,
Basqası jawın jawmaǵanlıqtan quwrap qaldı.
8 Eki-úsh qalanıń xalqı suw ishiw ushın,
Basqa bir qalaǵa súyretilip barsa da,
Olardıń shóli qanbadı.
Sonda da, sizler Maǵan qaytıp kelmedińiz», – deydi Jaratqan Iye.

9 «Qayta-qayta egisliklerińizdi quwratıp, olarǵa kesellik jiberip jazaladım,
Shegirtkeler baǵlarıńızdı, júzimzarlarıńızdı,
Jáne de, ánjir hám záytúnlerińizdi jedi.
Sonda da, sizler Maǵan qaytıp kelmedińiz», – deydi Jaratqan Iye.

10 «Mısırda islegenim sıyaqlı, ^{▼▼ Shıǵ 12:29-30.}
Arańızǵa illet jiberdim,
Jigitlerińizdi qılısh júzinen ótkerdim,
Atlarıńızdı dushpanlarıńızǵa berdim,
Ordańızdaǵı ólilerdiń iyisine murnıńızdı toltırdım.
Sonda da, sizler Maǵan qaytıp kelmedińiz», – deydi Jaratqan Iye.

11 «Qudayıńız bolǵan Men Sodom hám Gomoranı qıyratqanımday, ^{▼▼ Jar 18:16–19:28.}
Sizlerdiń ayırımlarıńızdı qıyrattım,
Sizler ot ishinen shıǵarıp alınǵan shala janǵan aǵashtay boldıńız.
Sonda da, sizler Maǵan qaytıp kelmedińiz», – deydi Jaratqan Iye.

12 «Sonlıqtan Izrail, seni jazalayman,
Shınında, saǵan Men usını isleymen,
Qudayıńnıń húkimine tayarlan, háy Izrail!»

13 Óytkeni tawlardı qáliplestirip, samaldı jaratqan,
Oy-pikirlerin adamzatqa ashıp bergen,
Tań nurın qarańǵılıqqa aylandırǵan Ol,
Dúnyanıń eń biyik jerlerin basıp júr,
Onıń atı Jaratqan Iye, Álemniń Qudayıdur.