Amos 6
Izraildıń jazalanıwı
1Hásiret shegesizler, Sionda biyǵam jasap atırǵanlar,Samariya tawında ózlerin amanlıq ishindemiz, dep esaplaǵanlar!
Milletlerdiń abıraylı adamları bolıp sanalatuǵınlar,
Izrail xalqı sizlerge arqa súyep keledi.
2Kalne qalasına barıń hám kóriń,
Ol jerden ullı Xamatqa ótiń,
Keyin filistlerdiń Gat qalasına qaray túsiń.
Sizlerdiń eki patshalıǵıńızdıń,
Olardikinen artıqmashlıǵı bar ma?
Olardıń jerleri sizlerdikinen úlken be edi?
3Apat kúnin uzaq sanap,
Jawızlıqtı jaqınlastırıp atırǵanlar,
4Pil súyeginen soǵılǵan kátte jatqanlar,
Tóseklerinde sozılıp jambaslaǵanlar,
Súriwlerdiń ishinen qozılardı,
Jaylawdaǵı semiz tanalardı jegenler!
5Ózlerińizshe Dawıtqa uqsap qosıqlar shıǵarıp,
Arfa sazı astında qosıqlar aytqanlar!
6Úlken keseler menen sharap iship,
Maydıń eń jaqsısın ústine súrtkenler,
Yusuptiń xalqınıń qulawına nemquraydı qaraǵanlar!
7Sizler birinshi bolıp súrginge áketilesiz,
Jambaslap ótkizetuǵın zıyapatlarıńız tawısıladı.
8Quday Iye Ózi haqı ant ishedi,
Jaratqan Iye, Álemniń Qudayı bılay deydi:
«Yaqıptıń menmenliginen jerkenemen,
Onıń qorǵan qalaların jek kóremen.
Qalanı hám ishindegilerdiń hámmesin,
Dushpanǵa táslim qılaman».
9Eger bir úyde on adam qalsa, olar da óledi. 10Marhumnıń jaqın aǵayini jerlew ushın ólini alıwǵa kelgende, úydiń ishindegi adamnan: «Qasıńda jáne birew bar ma?» – dep soraydı. Ol: «Hesh kim joq», – dep juwap beredi. Keyin aǵayini: «Tınısh, Jaratqan Iyeniń atın tilge almayıq!» – deydi. 11Mine, Jaratqan Iye buyrıq berip atır,
Úlken úyler buzıp taslanadı,
Kishkene úyler jer menen jeksen boladı.
12Atlar jartas ústinde shaba ala ma?
Kim ógizdi jegip, teńizdi súre aladı?
Biraq sizler ádalattı záhárge,
Haqlıq miywesin ashshı juwsanǵa aylandırdıńız.
13Lo-Debar qalasın qolǵa kirgizdik, dep quwanǵanlar:
«Qarnayım qalasın óz kúshimiz benen basıp aldıq», – deysiz.
14Biraq Jaratqan Iye, Álemniń Qudayı bılay deydi:
«Mine, sonıń ushın, háy Izrail xalqı,
Sizlerge qarsı bir xalıqtı jiberemen,
Olar Lebo-Xamattan Araba sayına deyin sizlerdi ezedi».
Copyright information for
KaaIBT22L