Amo 8 | KaaIBT22L | STEP | Quday Iye maǵan mınanı kórsetti: mine, bir sebet pisken miywe tur.

‏ Amos 8

Bir sebet miywe

1 Quday Iye maǵan mınanı kórsetti: mine, bir sebet pisken miywe tur. 2 Ol mennen:

– Neni kórip tursań, Amos? – dep soradı.

– Bir sebet pisken miyweni, – dep juwap berdim.

Sonnan keyin, Jaratqan Iye:

– Xalqım Izraildıń aqırı keldi. Endi olardı artıq keshirmeymen. 3 Sol kúni ibadatxanadaǵı qosıqlar qayǵılı joqlawǵa aylanadı. Hámme jer ólilerge toladı, únsizlik saqlansın, – dedi. Bunı Quday Iye ayttı.

4 Qulaq salıń, jarlını eziwshiler,
Eldegi kámbaǵallardı joq etkenler!

5 Sizler bılay deysiz:
«Jańa ay bayramı ótiwden dánimizdi satamız,
Shabbat kúni ótiwden biydayımızdı bazarǵa shıǵaramız.
Ólshem ıdısın kishireytip, ólshem tasın úlkeytemiz,
Táreziden urıp, alıwshılardı aldaymız.
6 Jarlılardı gúmiske,
Kámbaǵallardı bir jup ayaq kiyimge satıp alamız,
Dánniń ornına qawıq satamız».

7 Yaqıptıń menmenligine qarsı Jaratqan Iye ant iship, bılay deydi:
«Olardıń qılmısların hesh qashan umıtpayman.
8 Sonıń ushın, jer titireydi,
Onda jasaytuǵınlardıń hámmesi qayǵıǵa batadı.
Pútkil jer júzi Nil dáryasınday tasıp, kóteriledi,
Mısırdaǵı Nil dáryası sıyaqlı qaytadan tómenleydi».

9 Quday Iye bılay deydi:
«Sol kúni, túste quyashtı batıraman,
Kúpá-kúndiz jer júzin qarańǵılıq penen qaplayman.
10 Bayramlarıńızdı qayǵıǵa,
Barlıq qosıqlarıńızdı joqlawǵa aylandıraman.
Hár birińizge aza kiyim kiydiremen,
Basıńızdaǵı shashlarıńızdı aldırtaman.
Sol kúni jalǵız uldan ayırılǵanday joqlaw aytılıp,
Shınında, aqırı ashshı qayǵılı kún boladı».

11 Quday Iye bılay deydi:
«Mınaday kúnler keledi,
Jer júzine ashlıq jiberemen.
Nan hám suw qıtkershiliginen emes,
Jaratqan Iyeniń, Meniń sózlerimdi esitpegenlikten, ash qaladı.
12 Jaratqan Iyeniń, Meniń sózlerimdi izlep,
Adamlar teńizden teńizge ótip,
Arqadan shıǵısqa baradı.
Ol jaqtan bul jaqqa barıp, sarsań boladı,
Biraq onı taba almaydı.
13 Sol kúni gózzal qızlar hám jas jigitler,
Shóllep haldan tayadı.
14 Samariyanıń Ashima degen butı haqı ant iship:
„Háy, Dan, seniń qudayıńnıń tiriligi haqı,
Beer-Shebaǵa alıp baratuǵın zıyarat jolı haqı“, – deytuǵınlar,
Jerge qulap, qaytıp tura almaydı».