Amo 9 | KaaIBT22L | STEP | Men Iyeni kórdim, Ol qurbanlıq orınnıń qasında turıp, bılay dedi: «Tirep turǵan sútinlerdiń tóbesine urıń, Bosaǵaları lárzege kelsin. Olar adamlardıń ústine qulasın, Aman qalǵanların qılısh júzinen ótkeremen, Olardan hesh biri qashıp kete almaydı, Birewi de aman qalmaydı.

‏ Amos 9

Izraildıń húkim etiliwi

1 Men Iyeni kórdim, Ol qurbanlıq orınnıń qasında turıp, bılay dedi:

«Tirep turǵan sútinlerdiń tóbesine urıń,
Bosaǵaları lárzege kelsin.
Olar adamlardıń ústine qulasın,
Aman qalǵanların qılısh júzinen ótkeremen,
Olardan hesh biri qashıp kete almaydı,
Birewi de aman qalmaydı.
2 Hátteki, olar óliler mákanına kirse de,
Qolımdı sozıp, shıǵarıp alaman.
Kóklerge shıǵıp alsa da,
Ol jerden tartıp túsiremen.
3 Karmel tawınıń joqarısına jasırınıp alsa da,
Olardıń izine túsip, tawıp alaman.
Mennen jasırınıw ushın teńiz túbine tússe de,
Teńiz jılanına buyırıp, olardı shaqtıraman.
4 Dushpanlar olardı súrgin qılıp alıp ketse de,
Qılıshqa buyrıq berip, hámmesin qırıp taslataman.
Jaqsılıq ushın emes, al jamanlıq ushın,
Olarǵa Óz názerimdi taslayman».

5 Iye, Álemniń Jaratqan Iyesi,
Jerge qol tiygizgende, jer erip ketedi,
Onda jasaytuǵınlardıń hámmesi qayǵıǵa batadı.
Pútkil jer júzi Nil dáryasınday tasıp, kóteriledi,
Mısırdaǵı Nil dáryası sıyaqlı qaytadan tómenleydi.
6 Ol sarayınıń joqarǵı bólmesin kókke qurdı,
Onıń tiykarın jer júzine ornattı.
Ol teńiz suwların jıynap, jer júzine tógedi,
Onıń atı Jaratqan Iye.

7 Jaratqan Iye bılay deydi:
«Háy, Izrail xalqı,
Meniń ushın xabashstanlılardan qanday ayırmashılıǵıńız bar?
Izrail xalqın Mısırdan,
Filist xalqın Kaftordan,
Aramlılardı Kirden alıp shıqqan Men emespen be?

8 Mine, Quday Iyeniń, Meniń kózlerim,
Gúnakar patshalıqtıń ústinde.
Onı jer júzinen sıpırıp taslayman,
Biraq olardı, Yaqıptıń urpaqların pútkilley joq qılmayman», – deydi Jaratqan Iye.

9 «Mine, Men buyrıq beremen,
Barlıq milletler arasındaǵı Izrail xalqın,
Dándi elekten ótkergendey etip, elekten ótkeremen,
Jaqsı dánniń birewi de jerge túspeydi.
10 Xalqımnıń arasındaǵı barlıq gúnakarlar,
„Apattan uzaqtamız, apatqa duwshar bolmaymız“, – degenler,
Qılısh júzinen ótkeriledi».

Jaratqan Iyeniń Izrailǵa bergen wádesi

11 «Sol kúni Dawıttıń qulaǵan patshalıǵın qaytadan tikleymen,
Diywallarınıń jarıq jerlerin sıbap,
Buzılǵan jerlerin ońlayman.
Onı burınǵı qálpine keltiremen.
12 Solay etip, Izrail xalqı edomlılardıń aman qalǵanlarına,
Maǵan tiyisli bolǵan barlıq milletlerge iyelik etedi».
Bul sózlerdi usılardıń hámmesin iske asırıwshı Jaratqan Iye aytpaqta.

13 Jaratqan Iye bılay deydi:
«Mine, mınaday kúnler keledi,
Diyxan zúráátti jıynap, terip úlgermesten,
Kelesi jer aydaytuǵın waqıt keledi,
Sharap tayarlap úlgermesten,
Júzimniń miywesi jáne pisedi.
Tawlardan mazalı sharap tamadı,
Barlıq tóbeshiklerden jerge aǵıp túsedi.
14 Súrgin bolǵan xalqım Izraildı qaytarıp alıp kelemen,
Olar wayran bolǵan qalaların qayta tiklep, sol jerde jasaydı,
Júzimzarlar egip, sharabın ishedi,
Baǵlar otırǵızıp, miywelerinen jeydi.
15 Men olardı óz jerine egemen,
Men bergen jerden,
Olardı hesh kim suwırıp taslamaydı».
Bunı Qudayıńız Jaratqan Iye aytpaqta.