Col 1 | KaaIBT22L | STEP | Qudaydıń qálewi menen Masiyx Iysanıń elshisi bolǵan men, Pavelden hám tuwısqanımız Timofeyden,

‏ Colossians 1

Sálemnama

1 Qudaydıń qálewi menen Masiyx Iysanıń elshisi bolǵan men, Pavelden hám tuwısqanımız Timofeyden, 2 Kolosa qalasındaǵı muxaddeslerge ^{▼▼ Muxaddesler – Iysaǵa iseniwshiler.}, yaǵnıy Masiyxqa sadıq bolǵan tuwısqanlarımızǵa sálem! Ákemiz Quday sizlerge miyrim hám tınıshlıq bersin!

Paveldiń Qudayǵa shúkirlik bildiriwi hám duwa etiwi

3 Sizler ushın duwa etkenimizde, Iyemiz Iysa Masiyxtıń Ákesi – Qudayǵa bárqulla shúkirlik bildiremiz. 4 Sebebi sizlerdiń Masiyx Iysaǵa degen isenimińiz hám pútkil muxaddeslerge degen súyispenshiligińiz haqqında esittik. 5 Sizlerdiń bul isenimińiz hám súyispenshiligińiz aspanda sizler ushın saqlawlı turǵan úmitke negizlengen. Sizler usı úmit haqqında eń dáslep haqıyqat sózlerin, yaǵnıy Xosh Xabardı esitken waqıtta esitkensizler. 6 Sizlerge jetip kelgen bul Xosh Xabar pútkil dúnya boylap adamlardı jaqsılıqqa jetelep, tarqalmaqta. Sol sıyaqlı, sizler Qudaydıń miyrimi haqqında esitip, Onıń haqıyqatın bilip alǵan kúnińizden baslap, Xosh Xabar sizlerdi de jaqsılıqqa jetelep, tarqalmaqta.

7 Sizler Xosh Xabar haqqında bizler menen birge xızmet etetuǵın súyikli Epafrastan tálim aldıńlar. Usı Epafras – sizler ushın miynet etip atırǵan Masiyxtıń sadıq xızmetshisi. 8 Sizlerdiń Muxaddes Ruwxtan alǵan súyispenshiligińiz haqqında da bizlerge ol bildirdi.

Masiyxtıń Ózligi hám Onıń xızmeti

9 Sol sebepten usılar haqqında esitken kúnimizden baslap, bizler de sizler ushın úzliksiz duwa etip, Qudaydıń qálewin pútkil ruwxıy danalıq hám túsinik penen tolıq biliwińiz ushın sorap atırmız. 10 Bizler jáne sizlerdiń Iyemizge ılayıqlı bolıp jasawıńız, Onı hár tárepleme ırza qılıp, hár bir jaqsı iste jemis beriwińiz hám Qudaydı biliwde ósip barıwıńız ushın da duwa etip atırmız. 11 – 12 Onıń ullılıǵınıń qúdiretinen tolıq kúsh-quwat alıp, hámme nársege sabırlılıq penen shıday alıwıńız ushın hám Quday Ákemizge quwanısh penen shúkirlik ete alıwıńız ushın da bizler duwa etip atırmız. Quday Ákemiz bizlerdi nurdaǵı muxaddeslerdiń miyrasına sherik bolıwǵa miyasar qıldı. 13 Quday bizlerdi qarańǵılıqtıń húkimdarlıǵınan qutqarıp, súyikli Ulınıń Patshalıǵına kóshirdi. 14 Bizler Qudaydıń Ulınıń qanı arqalı qutqarıldıq, yaǵnıy gúnalarımızǵa keshirim aldıq.

15 Qudaydıń Ulı bolǵan Masiyx kózge kórinbeytuǵın Qudaydıń qanday ekenin kórsetedi hám Ol jaratılǵan hámme nárseden burın bar bolǵan. 16 Óytkeni aspandaǵı hám jerdegi kózge kórinetuǵın hám kózge kórinbeytuǵın nárselerdiń hámmesi Masiyx tárepinen jaratılǵan: taxtlar, húkimdarlıqlar, hákimshilik hám biylikler, hámme nárse Ol arqalı hám Ol ushın jaratıldı. 17 Masiyx hámme nárseden burın bar bolǵan hám hámme nárse Ol sebepli bar bolıp turıptı. 18 Masiyx – iseniwshiler jámáátiniń, yaǵnıy Óz denesiniń bası hám jámááttiń tiykarı. Ol hámme nárseden joqarı bolıw ushın, óliler ishinen birinshi bolıp tirildi. 19 Sebebi Quday Óziniń pútkil tolılıǵınıń Onda bolıwın maqul kórdi. 20 Masiyxtıń atanaq aǵashtaǵı qanı arqalı tınıshlıq ornatıp, Quday Ol arqalı jer hám aspandaǵılardıń barlıǵın Ózi menen jarastırıwdı qáledi.

21 Sizler bir waqıtları jaman is-háreketlerińiz sebepli, kewillerińiz benen Qudayǵa jat hám dushpan edińler. 22 Endi bolsa, Quday sizlerdi Óziniń aldında muxaddes, minsiz hám ayıpsız qılıp qoyıw ushın, Masiyxtıń denesiniń ólimi arqalı sizlerdi Ózi menen jarastırdı. 23 Tek ǵana isenimde bárqulla turaqlı hám bekkem bolıp, ózlerińiz esitken Xosh Xabardıń úmitinen taymasańız bolǵanı. Men, Pavel, aspan astındaǵı pútkil adamzatqa járiyalanǵan usı Xosh Xabardıń xızmetshisi boldım.

Paveldiń iseniwshiler jámáátine qılǵan xızmeti

24 Házir men sizler ushın azap shegip atırǵanıma quwanıshlıman. Óytkeni Masiyxtıń kórgen qıyınshılıqlarınıń jetpegen mólsherin Onıń denesi bolǵan iseniwshiler jámááti ushın men óz denem menen azap shegip toltırıp atırman. 25 Qudaydıń maǵan bergen tapsırması boyınsha Onıń sózin sizlerge tolıq jetkiziw ushın, men iseniwshiler jámáátiniń xızmetshisi boldım. 26 Qudaydıń Xosh Xabarı ótken ásirler menen áwladlarda jasırın tutıldı. Biraq endi usı sır Onıń muxaddeslerine ayan boldı. 27 Bul sırdıń basqa milletler ushın da qanshelli ullı hám bay ekenin Quday Óz muxaddeslerine bildiriwdi uyǵardı. Usı sır – ullılıqqa erisiwge úmit beretuǵın ishińizde jasawshı Masiyx. 28 Bizler usı Masiyx haqqında hámmege járiyalap atırmız. Masiyx penen qatnasta bolǵan hár bir adamdı Qudayǵa jetilisken qılıp usınıw ushın, bizler hár bir adamdı eskertip, tolıq danalıq penen tálim bermektemiz. 29 Masiyxtıń qúdireti menen mende háreket etiwshi kúsh boyınsha, men de bul maqset ushın bar kúshimdi salıp miynet etpektemen.