Col 3 | KaaIBT22L | STEP | Solay etip, Masiyx penen birge tirilgen bolsańız, onda aspandaǵı nárselerdi izleńler. Masiyx sol jerde, Qudaydıń oń jaǵında otırıptı .

‏ Colossians 3

1 Solay etip, Masiyx penen birge tirilgen bolsańız, onda aspandaǵı nárselerdi izleńler. Masiyx sol jerde, Qudaydıń oń jaǵında otırıptı ^{▼▼ Zab 109:1.}. 2 Jerdegi emes, al aspandaǵı nárselerdi oylańlar. 3 Sebebi sizler bul dúnya ushın ólgensizler hám jańa ómirińiz Masiyx penen birge Qudayda jasırılǵan. 4 Ómirińiz bolǵan Masiyx kelgende, sizler de Onıń menen birge saltanat penen kórinesiz.

5 Sonlıqtan ózlerińizdegi jerge tiyisli bolǵan jaman ádetlerdi: buzıqshılıqtı, haramılıqtı, nápsiqumarlıqtı, jaman qálewlerdi hám nápsiqawlıq bolǵan butparazlıqtı joq qılıńlar. 6 Bular sebepli, sózge qulaq aspaytuǵınlarǵa Qudaydıń ǵázebi keledi. 7 Burın sizler de usınday adamlardıń arasında jasaǵanıńızda, sonday is-háreketlerdi isledińler. 8 Biraq endi hámmesin: ashıw, ǵázep hám jek kóriwshilikti qoyıńlar. Awzıńızdan hesh qanday ósek hám sógis sóz shıqpasın. 9 Bir-birińizge ótirik sóylemeńler. Óytkeni sizler eski tábiyatıńızdı onıń jaman isleri menen taslap, 10 jańa tábiyatqa bólendińler. Bul jańa tábiyatqa iye adam Qudaydı tolıq biliw ushın, óz Jaratıwshısına uqsap baradı. 11 Solay etip, jańa tábiyatqa iye adamlar arasında grek hám yahudiy, súnnetli hám súnnetsiz, varvar ^{▼▼ Varvar – sol zamanlarda grek tilin bilmeytuǵın adamlar usılay dep atalǵan. Bul sózdiń mánisi «jat adam» degendi ańlatadı.} hám skif ^{▼▼ Skif – áyyemde Qara teńizdiń arqa-shıǵısında jasaǵan kóshpeli xalıq. Bul xalıq sol zamanlarda sawatsız hám jabayı xalıq bolıp sanalǵan.}, qul hám azat adam bolıp bóliniw joq. Al eń áhmiyetlisi, hámme iseniwshilerde jasaytuǵın tek Masiyx ǵana bar.

12 Qudaydıń tańlap alǵan muxaddes hám súyikli adamları sıpatında rehimlilik, jaqsılıq, kishipeyillik, múláyimlilik hám sabırlılıq penen jasańlar. 13 Bir-birińizge shıdamlı hám keshirimli bolıńlar. Eger kim de kim birewden ókpeli bolsa, Iyemizdiń sizlerdi keshirgeni sıyaqlı, sizler de bir-birińizdi keshirińler. 14 Bulardıń hámmesine qosımsha súyispenshilik penen jasańlar. Ol minsiz birlikke eristiredi. 15 Júreklerińizde Masiyxtıń tınıshlıǵı húkimdarlıq etsin. Sizler bir deneniń músheleri bolıp, usı tınıshlıqqa shaqırıldıńız. Jáne de, shúkirlik bildirińler. 16 Masiyxtıń sózi pútkil baylıǵı menen ishińizde jasasın. Bir-birińizge tolıq danalıq penen tálim berip, aqıl-násiyat etińler. Qudayǵa shúkirlik bildirip, Oǵan Zabur jırların, alǵıs-maqtaw qosıqların hám Muxaddes Ruwxtıń ilhamı menen jazılǵan qosıqlardı shın júrekten aytıńlar. 17 Sózińiz yamasa isińiz benen qılǵan hár bir nárseni Iyemiz Iysanıń atı ushın, Ol arqalı Ákemiz Qudayǵa shúkirlik etip isleńler.

Xojalıqtaǵı qatnasıqlar haqqında

18 Háy hayallar, kúyewlerińizge boysınıńlar. Bul Iyemizge tiyisli bolǵan hayallarǵa minásip. 19 Háy kúyewler, hayallarıńızdı súyińler. Olarǵa qopal qatnasta bolmańlar. 20 Háy balalar, hámme nársede ata-anańızǵa boysınıńlar! Sebebi bul Iyemizge unaydı. 21 Háy ákeler, ruwxı túspewi ushın, balalarıńızdıń ashıwın keltirmeńler. 22 Háy qullar, dúnyadaǵı xojayınlarıńızǵa hámme nársede boysınıńlar. Bunı tek olarǵa jaǵınıw ushın kózabaǵa emes, al Iyemizden qorqıp, shın júrekten isleńler. 23 – 24 Iyemizden sıylıq retinde miyras alatuǵınıńızdı bilip, ne isleseńiz de adamlar ushın emes, al Iyemiz ushın islep atırǵanday bolıp, shın júrekten isleńler. Óytkeni sizler Iyemiz Masiyxqa xızmet etip atırsızlar. 25 Nahaq is islegen adamǵa nahaqlıǵına ılayıq qaytarıladı. Quday hesh kimdi ayırmaydı.