Colossians 4
1Háy xojayınlar, aspanda sizlerdiń de Iyeńiz bar ekenin bilip, qullarıńızǵa ádillik hám teńlik penen qatnas jasańlar.Aqıl-násiyatlar
2Bárqulla duwa etińler. Duwa etkenińizde shúkirlik bildirip, sergek bolıńlar. 3Bizler ushın da duwa etińler: Masiyxtıń sırı haqqında Óz sózin járiyalay alıwımız ushın, Quday bizlerge jol ashsın. Men usı sır ushın tutqındaman. 4Bul sırdı tiyisli túrde, túsinikli etip ayta alıwım ushın da duwa etińler. 5Waqıttan jaqsı paydalanıp, jámááttiń sırtındaǵı adamlarǵa aqıllılıq penen qatnas jasańlar. 6Sózińiz hámme waqıtta jaǵımlı hám duzlı bolsın. Sonda sizler hár bir adamǵa qalay juwap beriw kerekligin bilip alasızlar.Sońǵı sálemnama
7Iyemizge meniń menen birge xızmet etetuǵın isenimli xızmetshi bolǵan súyikli tuwısqanımız Tixik men tuwralı hámme xabardı sizlerge bildiredi. 8Mine, men usı maqset penen onı sizlerge jiberip atırman. Ol hal-jaǵdayımızdı bildirip, sizlerdiń kewillerińizge jubanısh beredi. 9Tixik penen birge jerlesińiz, isenimli hám súyikli tuwısqanımız bolǵan Onisimdi de jiberip atırman. Olar sizlerge bul jerde bolıp atırǵan barlıq waqıyalar haqqında aytıp beredi. 10Meniń menen birge qamaqta otırǵan joldasım Aristarx hám Barnabanıń atalas inisi Mark sizlerge sálem aytıp atır. Sizler Mark haqqında nusqaw alǵan edińler: eger ol sizlerge barsa, onı qabıl etińler. 11Yustus dep atalatuǵın Eshua da sizlerge sálem aytıp atır. Yahudiyler ishinen tek usılar ǵana meniń menen birge Qudaydıń Patshalıǵı ushın xızmet etpekte. Olar maǵan jubanısh boldı. 12Masiyx Iysanıń xızmetshisi bolǵan jerlesińiz Epafras sizlerge sálem aytıp atır. Sizlerdi Qudaydıń hár bir erkine tolıq isensin hám minsiz adamlar bolsın dep, ol sizler ushın bar kúshi menen úzliksiz duwa etip atır. 13Sizler ushın hám Laodikiya menen Hierapolda bolǵanlar ushın, onıń kóp miynet etkenine men gúwaman. 14Súyikli shıpaker Luka menen Dimas ta sizlerge sálem aytıp atır. 15Laodikiyadaǵı tuwısqanlarǵa, Nimfaǵa hám onıń úyindegi jámáátke sálem aytıńlar. 16Bul xat arańızda oqılǵannan soń, onı Laodikiya jámáátinde de oqıtıń. Sizler de Laodikiyadan kelgen xattı oqıńlar. 17Arxipke mınanı aytıp qoyıńlar: «Iyemizden qabıl etken xızmetińdi orınlawǵa intalı bol!» 18Men, Pavel, bul sálemnamanı óz qolım menen jazıp atırman. Meniń tutqınlıǵımdı umıtpańlar. Qudaydıń miyrimi sizlerge yar bolsın!
Copyright information for
KaaIBT22L