Dan 1 | KaaIBT22L | STEP | Yahuda patshası Ehoyakimniń patshalıǵınıń úshinshi jılında Babiloniya patshası Nabuxodonosor Erusalimge júris qılıp, qalanı qamal qıldı.

‏ Daniel 1

Danieldiń Babilonǵa alıp ketiliwi

1 Yahuda patshası Ehoyakimniń patshalıǵınıń úshinshi jılında Babiloniya patshası Nabuxodonosor Erusalimge júris qılıp, qalanı qamal qıldı. 2 Iye Nabuxodonosordıń Yahuda patshası Ehoyakimdi tutqınǵa alıwına hám Qudaydıń Úyindegi bazı ıdıslardı alıp ketiwine jol qoydı. Nabuxodonosor ıdıslardı Babiloniyaǵa alıp barıp, olardı óz qudayınıń ibadatxanasınıń ǵáziynexanasına jaylastırdı.

3 Babiloniya patshası sarayınıń bas xızmetshisi Ashpenazǵa Izrail xalqınan alıp kelingen tutqınlardıń ishinen patshaǵa hám aqsúyeklerdiń shańaraǵına tiyisli bolǵan jas jigitlerdi alıp keliwdi buyırdı. 4 Bular minsiz, kelbetli, hár tárepleme aqıl-parasatlı, bilimli, jaqsı túsinikke iye hám patsha sarayında xızmet etiwge ılayıqlı bolıwı kerek edi. Jáne de Ashpenaz olarǵa kaldeylerdiń tilin hám ádebiyatın úyretiwi tiyis edi. 5 Patsha olar ushın óz dasturxanınan awqat hám sharap ajıratıp qoydı. Sol jas jigitler úsh jıl dawamında tálim alǵannan keyin, patshanıń aldında xızmetke tayın bolıwı kerek edi.

6 Tańlanǵan jaslardıń arasında Yahuda urıwınan bolǵan Daniel, Xananiya, Mishael hám Azariya bar edi. 7 Saraydıń bas xızmetshisi olardıń atların ózgertip, Danieldi Belteshassar, Xananiyanı Shadrax, Mishaeldi Meshax, Azariyanı bolsa Abed-Nego dep atadı.

8 Daniel ózin haramlamawdı sheshti hám ol saray bas xızmetshisinen patsha dasturxanınan beriletuǵın awqat hám sharaptan ákelmewdi ótinish qıldı. 9 Quday Danieldiń saray bas xızmetshisiniń kewlinen shıǵıwına hám rehimine miyasar bolıwına jol qoydı. 10 Saraydıń bas xızmetshisi Danielge bılay dedi:

– Yaq, sizlerge beriletuǵın awqat penen ishimliklerdi ullı mártebeli patshamızdıń ózi belgilep berdi. Onıń buyrıqlarınan bas tartıwdan qorqaman. Eger ol júzińizdiń kórinisi basqa jas jigitlerdiń júzinen góre solǵın ekenin kórse, onda janımdı qáwip astına qoyǵan bolasız.

11 Daniel usı másele boyınsha saray bas xızmetshisi tayınlaǵan saqshı menen sóylesti, sebebi bul saqshı Daniel, Xananiya, Mishael hám Azariya ushın juwapker adam edi. Ol saqshıǵa bılay dedi:

12 – Iltimas, qullarıńızǵa on kún dawamında jewge palız ónimlerin hám ishiwge suw berip, sınap kóriń. 13 Keyin bizlerdiń kórinisimizdi patsha dasturxanınan awqat jegen jigitlerdiń kórinisi menen salıstırıp kóriń, usıdan keyin óz bilgenińizdi qılıń.

14 Solay etip, saqshı buǵan ırazı bolıp, olardı on kún dawamında sınap kórdi. 15 On kún ótkennen keyin, olardıń qáddi-qáwmetleri tolısıp, patsha dasturxanınan berilgen awqatlardı jegen jigitlerden ádewir kelbetli hám tolıǵıraq bolıp kórindi. 16 Solay etip, sol kúnnen baslap saqshı patsha dasturxanınan olar ushın alıp kelingen awqatlar menen sharaplardı bılay qoyıp, olarǵa tek ǵana palız ónimlerin beretuǵın boldı.

17 Quday bul tórt jigitke hár tárepleme bilim hám ádebiyat penen danalıqtı úyreniwde uqıp bergen edi. Onnan qala berse, Daniel hár túrli ayan hám túslerdi jorıw qábiletine iye edi.

18 Patsha belgilegen múddet tamam bolǵanda, saray bas xızmetshisi barlıq jigitlerdi Nabuxodonosordıń aldına alıp bardı. 19 Patsha olar menen sóylesti hám olardıń arasınan Daniel, Xananiya, Mishael hám Azariyaǵa teń keletuǵını tabılmadı. Sonıń ushın, olar patshanıń xızmetine tayınlandı. 20 Patsha qanday soraw bermesin, olardıń danalıǵı, túsinigi pútkil patshalıqtaǵı palkerlerden hám porxanlardan on ese ústin bolıp shıqtı. 21 Patsha Kirdiń patshalıǵınıń birinshi jılına deyin Daniel sarayda xızmet etti.