Dan 10 | KaaIBT22L | STEP | Persiya patshası Kirdiń patshalıǵınıń úshinshi jılında, Belteshassar dep atalǵan Danielge bir ayan keldi. Keleshekte júz beretuǵın kúshli sawashqa baylanıslı bolǵan bul xabar haqıyqat. Daniel bul xabardı ayan arqalı túsindi.

‏ Daniel 10

Danieldiń Tigr dáryasınıń boyında kórgen ayanı

1 Persiya patshası Kirdiń patshalıǵınıń úshinshi jılında, Belteshassar dep atalǵan Danielge bir ayan keldi. Keleshekte júz beretuǵın kúshli sawashqa baylanıslı bolǵan bul xabar haqıyqat. Daniel bul xabardı ayan arqalı túsindi.

2 Sol kúnleri men, Daniel úsh hápte aza tutıp júrdim. 3 Úsh hápte dawamında hesh qanday toyımlı awqat jemedim, gósh penen sharaptı awzıma da almadım hám may súrtpedim. 4 Birinshi aydıń jigirma tórtinshi kúni men ullı dáryanıń, yaǵnıy Tigr dáryasınıń boyında turǵan edim. 5 Sonda men ústinde zıǵırdan toqılǵan aq kiyimi, belinde taza altınnan islengen belbewi bar birewdi kórdim. 6 Onıń denesi sarı yaqıt sıyaqlı jarqırap, júzi shaqmaq jalınınday, kózleri shomday bolıp janıp turǵan edi. Onıń ayaq-qolları jıltır qoladay jıltırap, dawısı alaman xalıqtıń dawısınday jańǵırıp turatuǵın edi.

7 Ayandı jalǵız men kórdim. Janımdaǵılar ayandı kórmese de, olardıń zárreleri ushqanı sonshelli, olar qashıp, jasırınıp aldı. 8 Sonda men bir ózim qaldım. Sol ullı ayandı kórip atırǵanımda, hálsizlenip, júzim quwarıp, dińkem de qalmaǵan edi. 9 Sonda perishteniń dawısın esittim. Dawıstı esitkenimde esimnen awıp, et betimnen jerge jıǵıldım. 10 Sonda bir qol maǵan tiyip, meni kóterip, qol hám dizelerime turǵızıp qoydı.

11 Sol perishte maǵan:

– Háy, Daniel, sen Qudaydıń súyikli bendesiseń. Qáne, tur! Saǵan aytatuǵın sózlerime jaqsılap qulaq sal, óytkeni házir men seniń aldıńa jiberilgenmen.

Ol maǵan usı sózlerdi aytıp atırǵanda, men qaltırap ornımnan turdım.

12 Ol sózin dawam etip, bılay dedi:

– Qorqpa, Daniel! Sen bul xabar haqqında túsinik alıwdı niyet etip, Qudayıńnıń aldında ózińdi kishipeyil tutqan kúnińnen-aq seniń duwań qabıl etildi. Duwalarıńa juwap beriw ushın aldıńa keldim. 13 Biraq Persiya patshalıǵınıń húkimdarı jigirma bir kún dawamında maǵan qarsı turdı. Men Persiya patshalarınıń ishinde jalǵız qalǵanımda, bas perishtelerdiń biri Mixail maǵan járdemge keldi. 14 Men saǵan keleshekte xalqıńnıń basına túsetuǵın nárselerdi túsindiriw ushın keldim. Bul ayan sol kúnler haqqında.

15 Ol usı sózlerdi aytıp atırǵanda, men basımdı iyip, únsiz turǵan edim. 16 Sonnan soń adam balasına uqsaǵan birew erinlerime qolın tiygizdi. Sonda men de awzımdı ashıp, aldımda turǵanǵa bılay dedim:

– Mırzam, bul ayan meni qattı qıynap jiberdi, dińkem qurıdı. 17 Mendey bir qulıń qalayınsha mırzam menen sóylese aladı? Halım qalmaǵan, demim tıǵılıp, zorǵa dem alıp atırman.

18 Sonda adam ulına uqsaǵan sol birew jáne bir márte qolın tiygizip, maǵan kúsh baǵıshlap, 19 bılay dedi:

– Háy, Qudaydıń súyikli bendesi, qorqpa! Saǵan tınıshlıq bolsın! Kúshli bol, awa, kúshli bol!

Ol maǵan sóylep atırǵanda, maǵan kúsh-quwat enip:

– Mırzam, siz maǵan kúsh-quwat berdińiz, endi ayta beriń, – dedim.

20 Ol maǵan:

– Seniń aldıńa ne ushın kelgenimdi bileseń be? Endi men Persiya patshalıǵınıń húkimdarı menen urısıwǵa qaytıp baraman. Biraq men ketkennen keyin, Grek patshalıǵınıń húkimdarı keledi. 21 Biraq dáslep Haqıyqat kitabında ne jazılǵanın saǵan aytıp beremen. Olarǵa qarsı gúreste maǵan sizlerdiń húkimdarıńız Mixail perishteden basqa hesh kim járdem bermeydi, – dedi.