Dan 3 | KaaIBT22L | STEP | Patsha Nabuxodonosor úlken bir altın músin isletti. Biyikligi alpıs shıǵanaq, eni altı shıǵanaq bolǵan bul músindi Babilon wálayatındaǵı Dura tegisligine ornattı.

‏ Daniel 3

Nabuxodonosordıń altın músindi ornatıwı

1 Patsha Nabuxodonosor úlken bir altın músin isletti. Biyikligi alpıs shıǵanaq, eni altı shıǵanaq bolǵan bul músindi Babilon wálayatındaǵı Dura tegisligine ornattı. 2 Sonnan soń, ol nayıplardı ^{▼▼ Nayıplar – Persiya imperiyasında joqarı lawazımdı iyelegen basshılar. Olar birikken bir neshe wálayatlardı basqaratuǵın edi.}, húkimdarlardı, hákimlerdi, wázirlerdi, qaznashılardı, qazılardı, hámeldarlardı hám barlıq wálayat xızmetkerlerin shaqırıp, ózi ornatqan músinniń ashılıw máresimine qatnasıwın buyırdı. 3 Olardıń barlıǵı patsha Nabuxodonosor ornatqan músinniń ashılıw máresimine qatnasıw ushın, músinniń aldına jıynalǵanda, 4 jarshı bálent dawıs penen bılay dep jar saldı: «Háy, barlıq xalıqlar, milletler hám hár túrli tildegi adamlar, patshanıń buyrıǵına qulaq salıńlar! 5 Kárnay, nay, lira, citra, arfa, dáp hám basqa da saz ásbaplarınıń shertilgen dawısların esitiwden, jerge jıǵılıp, patsha Nabuxodonosor ornatqan altın músinge tabınıńlar. 6 Kim de kim tájim qılıp, tabınbasa, sol waqıttıń ózinde ot janıp turǵan peshke taslanadı». 7 Sonlıqtan kárnay, nay, lira, citra, arfa hám basqa da saz ásbaplarınıń dawısın esitiwden, barlıq xalıqlar, milletler hám hár túrli tildegi adamlar jerge jıǵılıp, patsha Nabuxodonosor ornatqan músinge tabındı.

Danieldiń doslarınıń ayıplanıwı

8 Sol waqıtta yahudiylerdi qaralaw niyetinde júrgen bazı kaldeyler payıttan paydalanıp, 9 patsha Nabuxodonosorǵa bılay dedi:

– Ullı mártebeli patsha, ómirińiz uzaq bolsın! 10 Taqsır, siziń buyrıǵıńız boyınsha, kárnay, nay, lira, citra, arfa, dáp hám basqa da saz ásbaplarınıń dawısın esitken hár bir adam jerge jıǵılıp, altın músinge tabınıwı kerek emes pe edi? 11 Siz buyrıqqa ámel qılmaǵan hár bir adamnıń ot janıp turǵan peshke taslanatuǵının aytqan edińiz. 12 Biraq bazı yahudiyler, yaǵnıy ózińiz Babilon wálayatına húkimdar etip tayınlaǵan Shadrax, Meshax hám Abed-Nego siziń buyrıǵıńızǵa boysınbadı. Bul adamlar qudaylarıńızǵa tabınbaydı, siz ornatqan músinge de tabınıwdı maqul kórmedi.

13 Bul xabardı esitip, qattı ǵázeplengen Nabuxodonosor Shadrax, Meshax hám Abed-Negonı aldına alıp keliwdi buyırdı. Olar patshanıń aldına alıp kelingende, 14 Nabuxodonosor olarǵa bılay dedi:

– Háy, Shadrax, Meshax hám Abed-Nego, meniń qudaylarıma hám men ornatqan altın músinge tabınbaǵanıńız ıras pa? 15 Degen menen, men sizlerge jáne bir múmkinshilik beremen. Házir kárnay, nay, lira, citra, arfa, dáp hám basqa da saz ásbaplarınıń dawısın esitiwden-aq, jerge jıǵılıp, men ornatqan músinge tabınıńlar. Eger tájim etpeseńler, sol waqıttıń ózinde otlı peshke taslanasızlar. Sonda sizlerdi meniń qolımnan hesh bir quday da qutqara almaydı!

16 Shadrax, Meshax hám Abed-Nego patshaǵa bılay dep juwap berdi:

– Mırzamız, bul máselede ózlerimizdi aqlamaqshı emespiz. 17 Bizler sıyınatuǵın Quday bizlerdi ot janıp turǵan peshten de, siziń qolıńızdan da qutqara aladı. 18 Biraq eger Ol bizlerdi qutqarmaǵan jaǵdayda, taqsır, mınanı bilip qoyıń: bizler hesh qashan qudaylarıńızǵa sıyınbaymız, siz ornatqan altın músinge de tabınbaymız.

Danieldiń doslarınıń ólimge húkim etiliwi

19 Shadrax, Meshax hám Abed-Negonıń bul juwabına Nabuxodonosordıń qattı ǵázebi kelgenlikten túri ózgerip ketti. Ol peshtegi ottı aldınǵısınan jeti ese qattı jandırıwdı buyırdı. 20 Keyin áskerleriniń arasınan eń kúshli áskerlerge Shadrax, Meshax hám Abed-Negonı baylap, otlı peshke taslawdı buyırdı. 21 Solay etip, áskerler olardı baylap, ústki kiyimi, ıshtanı, bas kiyimi, qullası barlıq kiyimleri menen birge otlı peshke tasladı. 22 Patshanıń buyrıǵınıń qatań bolǵanlıǵı hám peshtiń sonshelli kúshli janıp turǵanlıǵı sebepli, Shadrax, Meshax hám Abed-Negonı otqa taslaǵan áskerler ottıń háwirine kúyip ózleri ólip qaldı. 23 Shadrax, Meshax hám Abed-Nego bolsa baylanǵan halda otlı peshke qulap tústi.

24 Bunı tamasha qılıp turǵan patsha Nabuxodonosor birden ornınan sekirip turdı da, tań qalıp, keńesgóylerine:

– Peshke baylanǵan halda úsh adamdı taslamadıq pa? – dep baqırıp jiberdi.

– Álbette, sonday, mırzamız patsha, – dep juwap berdi olar.

25 Patsha:

– Qarańlar, al men ot ishinde baylanbaǵan halda júrgen tórt adamdı kórip turman. Olardıń hesh biri de zıyan kórmegen. Tórtinshisi bolsa, kórinisinen iláhiy barlıqqa uqsaydı! – dedi.

26 Nabuxodonosor ot janıp turǵan peshtiń awzına barıp:

– Háy, Quday Taalanıń qulları Shadrax, Meshax hám Abed-Nego, berman shıǵıńlar! Meniń aldıma kelińler! – dep baqırdı.

Sonda Shadrax, Meshax hám Abed-Nego ottıń ishinen shıqtı. 27 Barlıq nayıplar, húkimdarlar, hákimler hám patsha keńesgóyleri Shadrax, Meshax hám Abed-Negonı dógereklep aldı hám ottıń bul adamlarǵa hesh qanday zıyan tiygizbegenin kórdi. Olardıń shashları kúymegen, kiyimlerine zıyan tiymegen, hátteki, olardan ottıń iyisi de shıqpay turǵan edi.

28 Sonda Nabuxodonosor bılay dedi:

– Shadrax, Meshax hám Abed-Negonıń Qudayına alǵıs-maqtawlar bolsın! Ol óz perishtesin jiberip, Ózine isengen qulların qutqardı. Olar óz Qudayınan basqa qudaylarǵa sıyınıwdan góre, janınan keshiwdi abzal kórdi, sonıń ushın, patshanıń, yaǵnıy meniń buyrıǵıma boysınıwdan bas tarttı.

29 Sonıń ushın, mınanı párman qılaman: Shadrax, Meshax hám Abed-Negonıń Qudayına til tiygizgen hár bir adam qaysı xalıq, millet yamasa qaysı tilge tiyisli bolıwına qaramastan, olar shawıp taslanadı, úyleri bolsa wayran qılınadı. Óytkeni bunday qılıp qutqara alatuǵın basqa quday joq.

30 Keyin patsha Shadrax, Meshax hám Abed-Negonıń mártebesin jáne de asırıp, olardı Babilon wálayatındaǵı joqarǵı lawazımǵa kóterdi.

Nabuxodonosordıń ekinshi túsi

31 Patsha Nabuxodonosor jer júzindegi barlıq xalıqlar, milletler hám hár túrli tildegi adamlarǵa mınaday xabar jolladı:

«Sizlerge tınıshlıq hám bereket tileymen! 32 Quday Taalanıń maǵan kórsetken belgi hám káramatları haqqında sizlerdi xabardar qılmaqshıman.

33 Qanday ullı Onıń belgileri!
Qanday qúdiretli káramatları!
Onıń patshalıǵı – máńgi patshalıq bolar,
Onıń húkimdarlıǵı áwladtan-áwladqa dawam eter».