‏ Daniel 4

1Men, Nabuxodonosor óz úyimde – sarayımda tınısh, ráhátlenip jasap atırǵan edim. 2Biraq bir kúni túnde qorqınıshlı tús kórdim. Tósegimde jatqanımda, bul tús hám ayanlar meni qattı qorqınıshqa saldı. 3Túsimdi maǵan jorıp beriwi ushın Babilonnıń barlıq danıshpanların aldıma alıp keliwdi buyırdım. 4Aldıma kelgen palkerlerge, porxanlarǵa, danıshpanlarǵa hám boljawshılarǵa túsimdi aytıp berdim, biraq olar onı jorıy almadı. 5Aqırında atı meniń qudayımnıń atı menen atalǵan Belteshassar degen muxaddes qudaylardıń ruwxı menen tolǵan Daniel aldıma keldi. Men oǵan túsimdi aytıp berip, bılay dedim:

6– Háy, Belteshassar, danıshpanlardıń basshısı, sende muxaddes qudaylardıń ruwxı bar ekenin hám hár bir sırdı asha alatuǵınıńdı bilemen. Kórgen túsimdi tıńlap, maǵan jorıp ber. 7Tósegimde jatıp, kórgen ayanlarda dúnyanıń ortasında ósip turǵan júdá úlken bir terekti kórdim. 8Terek ósip barıp, kúshke toldı hám onıń ushı aspanǵa jetti. Bul terekti dúnyanıń tórt tárepinen kóriwge bolatuǵın edi. 9Onıń japıraqları sulıw hám pútkil dúnyanı támiyinleytuǵın mol miywesi bar edi. Jabayı haywanlar onıń sayasında pana tawıp, kóktegi quslar shaqalarına uya salıp, jer júzindegi barlıq tiri janlar onnan azıqlanatuǵın edi. 10Tósegimde jatıp, kórip atırǵan ayanda, aspannan muxaddes bir gúzetshi túsip keldi. 11Ol bálent dawıs penen bılay dedi: «Terekti kesip, shaqaların shawıp taslańlar, japıraqların úzip, miywelerin shashıp taslańlar. Sayasındaǵı haywanlardı quwıńlar, shaqalarındaǵı quslardı ushırıp jiberińler. 12Biraq terektiń túbiri menen tamırlarına tiymeńler, onı temir hám qola menen shınjırlap, jabayı shóplerdiń arasında qaldırıńlar. Ol aspannan túsken shıqqa shomılsın, jabayı haywanlar menen jasap, nesiybesin dala shóplerinen terip jesin. 13Onnan adamzat júregi alıp taslanıp, haywan júregi berilsin. Ol jeti múddet haywanday bolıp jasasın. 14Bul húkimdi gúzetshiler, qarardı muxaddesler shıǵardı. Solay etip, hár bir tiri jan Quday Taalanıń adamzat patshalıǵınıń Húkimdarı ekenin bilsin. Ol patshalıqtı qálegen adamına berer, hátteki, qarapayım adamdı taxtqa otırǵızar». 15Men, patsha Nabuxodonosor usınday tús kórdim. Endi sen, Belteshassar maǵan onı jorıp ber, sebebi patshalıǵımdaǵı danıshpanlardıń hesh biri túsimdi jorıp bere almadı. Al bul seniń qolıńnan keledi, óytkeni sende muxaddes qudaylardıń ruwxı bar.

Danieldiń tústi jorıwı

16Keyin Daniel, yaǵnıy Belteshassar bir neshe waqıt ózine kele almay turdı, oyları onı qorqınıshqa salǵan edi. Sonda patsha oǵan:

– Belteshassar, túsim de, onıń jorılıwı da seni qorqınıshqa salmasın, – dedi.

Sonda Belteshassar bılay dep juwap berdi:

– Mırzam, bul tús sizdi jek kóretuǵınlardıń, onıń jorılıwı dushpanlarıńızdıń basına tússin! 17Siz usha bası aspanǵa tiyip turǵan biyik hám kúshli bir terekti kórdińiz. Bul terek sonshelli úlken bolǵanlıqtan, onı dúnyanıń tórt tárepinen kóriwge bolatuǵın edi. 18Onıń japıraqları júdá sulıw, pútkil dúnyanı támiyinleytuǵın mol miyweleri bar edi. Onıń sayasında jabayı haywanlar jasap, kóktegi quslar shaqalarına uya salǵan edi. 19Patsham, bul terek siz bolasız. Siz ullı hám kúshli boldıńız. Ullılıǵıńız kóklerge jetip, húkimdarlıǵıńız pútkil jer júzine jayıldı. 20Siz aspannan túsip kiyatırǵan muxaddes gúzetshini de kórdińiz. Ol: «Terekti kesip, joq qılıńlar. Biraq onıń túbiri hám tamırlarına tiymeńler, olardı temir hám qola menen shınjırlap, jabayı shóplerdiń arasına qaldırıńlar. Jeti múddet dawamında ol aspannan túsken shıqqa shomılıp, jabayı haywanlar menen birge jasasın», – dedi. 21Patshamız, tústiń jorılıwı hám Quday Taalanıń taqsırım bolǵan sizge shıǵarǵan qararı mınaday: 22siz adamlar jámiyetinen shıǵarılıp, jabayı haywanlardıń arasında jasaysız. Quday Taalanıń adamzat patshalıǵınıń jalǵız Húkimdarı ekenin hám Ol taxttı qálegen adamına beretuǵının túsingenińizshe jeti múddet dawamında malǵa uqsap ot jep, aspannan túsken shıqqa shomılasız. 23Degen menen, terektiń túbiri hám tamırları qaldırılsın! – degen buyrıq mınanı ańlatadı: Barlıq húkimdarlıqtıń aspandaǵı Qudayǵa tiyisli ekenin túsingenińizden keyin, patshalıǵıńız qayta tiklenedi. 24Sonlıqtan taqsır, sizden ótinemen, másláhátimdi alıńız: gúnalarıńızdan bas tartıp, tuwrı islerdi isleń, ayıp islerińizden bas keship, jarlılarǵa rehim qılıń. Sonda siziń tabıslı ómirińiz dawam etedi.

Nabuxodonosordıń túsiniń ońınan keliwi

25Bulardıń hámmesi patsha Nabuxodonosordıń basına tústi. 26Aradan on eki ay ótkennen soń, ol Babilondaǵı sarayınıń tam basına shıǵıp júrdi. 27Sonda ol qalaǵa qarap:

– Ózim qurdırǵan patsha qalası bolǵan ullı Babilonǵa qarańlar! Men bunı ullı saltanatım ushın óz qúdiretim menen qurdım, – dedi. 28Ol bul sózlerdi aytıp úlgermesten-aq aspannan bir dawıs keldi:

– Háy, patsha Nabuxodonosor, sózime qulaq sal! Házirden baslap, sen taxtıńnan túsirildiń. 29Sen adamlar jámiyetinen aydalıp, jabayı haywanlar menen jasaysań. Quday Taala – adamzat patshalıǵınıń jalǵız Húkimdarı ekenin hám Ol taxttı qálegen adamına beretuǵının túsinip jetpegenińshe, jeti múddet dawamında malǵa uqsap ot jep júreseń.

30Nabuxodonosorǵa aytılǵan bul sózler sol waqıtta orınlandı. Ol adamlar jámiyetinen aydaldı hám mal sıyaqlı ot jep, aspannan túsken shıqqa shomıldı. Shashları búrkittiń qanatlarınıń uzınlıǵınday, tırnaqları bolsa qustıń tırnaqlarınday bolıp ósip ketti.

31Belgilengen múddet tamamlanǵanda, men, Nabuxodonosor kózlerimdi kókke tiktim hám sol waqıtta ózime keldim. Quday Taalaǵa alǵıs-maqtawlar ayttım, máńgi ómir súriwshini alǵıslap, ullıladım:

Onıń húkimdarlıǵı – máńgi húkimdarlıq,
Onıń patshalıǵı áwladtan-áwladqa dawam eter.
32Dúnyada jasap atırǵanlar Onıń aldında hesh nárse emes,
Ol aspandaǵı kúshlerdiń hám dúnyada jasap atırǵanlardıń ústinen,
Óziniń qálegen húkimin shıǵarar.
Hesh kim Onı toqtata almas,
Oǵan «Ne qılıp atırsań?» – dep hesh kim ayta almas.

33Es-aqılım qaytıp kelgen waqıttıń ózinde, meniń patshalıq mártebem, abırayım hám saltanatım qayta tiklendi. Keńesgóylerim hám aqsúyeklerim meni izlep keldi. Men qaytadan taxtqa otırdım, ullılıǵım bolsa, aldınǵısınan da asıp ketti. 34Endi men, Nabuxodonosor Aspannıń Patshasına alǵıs-maqtaw aytaman, Onı alǵıslap, ullılayman. Óytkeni Onıń barlıq isleri haqıyqat hám jolları ádil. Tákabbirlerdiń kókiregin basıwǵa Onıń kúshi jetedi.