Dan 5 | KaaIBT22L | STEP | Patsha Belshassar óziniń mıń aqsúyegi ushın úlken zıyapat berip, olar menen birge sharap ishti.

‏ Daniel 5

Patsha Belshassardıń bergen zıyapatı

1 Patsha Belshassar óziniń mıń aqsúyegi ushın úlken zıyapat berip, olar menen birge sharap ishti. 2 Sharaptan más bolǵan Belshassar Erusalimdegi Ibadatxanadan ákesi Nabuxodonosor alıp kelgen altın hám gúmis keselerdi alıp keliwdi buyırdı. Patsha aqsúyekleri, hayalları hám toqalları menen sol keselerden sharap ishpekshi edi. 3 Solay etip, Erusalimdegi Ibadatxanadan, yaǵnıy Qudaydıń Úyinen alıp kelingen altın ıdıslardı aldırıp, patshanıń ózi, aqsúyekleri, hayalları hám toqalları sol ıdıslardan sharap ishti. 4 Olar sharaptan iship, altın, gúmis, qola, temir, aǵash hám tastan islengen qudaylardı alǵısladı.

5 Kútilmegende, bir insan qolı payda bolıp, shıra qoyǵıshtıń qasındaǵı patsha sarayınıń háklengen diywalına jaza basladı. Patsha jazıp atırǵan qoldı kórdi. 6 Onı qorqınısh biylep alıp, júzi bozarıp ketti hám belinde quwatı qalmay, dizeleri qaltıray basladı. 7 Patsha dawıslap baqırıp, porxan, danıshpanlar hám boljawshılardı alıp keliwdi buyırdı. Patsha Babilon danıshpanlarına:

– Kim bul jazıwdı oqıp, onıń mánisin maǵan túsindirip berse, sol adamnıń ústine patshalıq shapan kiygizemen, moynına altın shınjır taǵıp, patshalıqta úshinshi húkimdar etip tayınlayman, – dedi.

8 Patshanıń barlıq danıshpanları ishke kirip keldi, biraq olar jazıwdı oqıy almadı, onıń mánisin de túsindirip bere almadı. 9 Patsha Belshassar qattı qorqınıshqa túsip, júzi bozarıp ketti, aqsúyekleri bolsa sasqalaqlap qaldı.

10 Sol waqıtta patsha hám aqsúyekleriniń dawısların esitip, zıyapat bolıp atırǵan jerge kelgen patshanıń anası:

– Mırzamız patshanıń ómiri uzaq bolsın! Qorqpa, túrińiz de quwarmasın! 11 Siziń patshalıǵıńızda muxaddes qudaylardıń ruwxına tolǵan bir adam bar. Ákeńniń dáwirinde bul adam aqıllı, zeyinli hám qudaylar sıyaqlı dana dep tán alınǵan edi. Ákeń patsha Nabuxodonosor onı palker, porxan, danıshpan hám boljawshılardıń basshısı etip tayınlaǵan edi. 12 Patsha Nabuxodonosor Belteshassar dep ataǵan sol Daniel túslerdi jorıwda da, jumbaqlardı túsindiriwde de, mashqalalardı sheshiwde de ǵayrı tábiyǵıy ruwxqa, bilim hám aqıl-parasatqa iye. Patsham, Danieldi usı jerge alıp keliwdi buyır, ol sizge mına jazıwdıń mánisin túsindirip bersin, – dedi.

13 Solay etip, Daniel patshanıń aldına alıp kelindi. Patsha Danielge bılay dedi:

– Patsha ákem Yahudadan alıp kelgen tutqınlar arasındaǵı Daniel senbiseń? 14 Seni qudaylar ruwxı menen tolǵan, aqıllı, zeyinli hám dana dep esittim. 15 Men danıshpanlardı hám porxanlardı mına jazıwdı oqıp, mánisin túsindirip bersin, dep shaqırttım. Degen menen, olardıń birewi de mánisin ayta almadı. 16 Seniń jumbaqlardı sheship, olardı túsindire alatuǵınıńdı esittim. Eger sen házir bul jazıwdı oqıp, onıń mánisin túsindire alsań, men seniń ústińe patshalıq shapan kiygizemen, moynıńa altın shınjır taǵıp, patshalıqtaǵı úshinshi húkimdar etip tayınlayman.

17 Daniel patshaǵa bılay dep juwap berdi:

– Sawǵalarıńız ózińizde qala bersin, yaki olardı basqa birewge beriń. Men bul jazıwdı sonda da oqıp, onıń mánisin túsindirip beremen.

18 Taqsır, Quday Taala ákeńiz Nabuxodonosorǵa patshalıq, ullılıq, dańq hám húrmet berdi. 19 Quday oǵan bergen ullılıǵı sebepli hámme xalıqlar, milletler hám hár bir tildegi adamlar ákeńizden qorqıp qaltıraytuǵın edi. Ol qálegenin óltirip, qálegenin tiri qaldıratuǵın, qálegenin mártebege kóterip, qálegenin xor qılatuǵın edi. 20 Degen menen, ol tákabbirlenip, menmen bolıp ketkenlikten, patshalıq taxttan túsirilip, barlıq saltanatınan ayırılǵan edi. 21 Ol adamlar jámiyetinen shıǵarılıp, aqılsız haywanday bolıp qalǵan edi. Ákeńiz adamzat patshalıǵınıń jalǵız húkimdarı Quday Taala ekenin hám Ol taxttı qálegen adamına beretuǵının túsingenshe, jabayı eshekler menen birge jasap, mal sıyaqlı ot penen azıqlandı hám aspannan túsken shıqqa shomıldı.

22 Al onıń zúryadı bolǵan siz, patsha Belshassar, bulardıń hámmesinen xabarıńız bolsa da, kishipeyil bolmadıńız. 23 Bunıń ornına siz aspannıń Iyesine qarsı bas kóterdińiz. Qudaydıń Ibadatxanasındaǵı ıdıslardı aldırıp, aqsúyeklerińiz, hayallarıńız hám toqallarıńız benen sharap ishtińiz. Kórmeytuǵın, esitpeytuǵın, hesh nárseni bilmeytuǵın gúmis, altın, qola, temir, aǵash hám tastan soǵılǵan qudaylardı alǵısladıńız. Biraq ómirińizdi hám barlıq jollarıńızdı qolında uslap turǵan Qudaydı ullılamadıńız. 24 Sonıń ushın, Quday qol jiberip, usı sózlerdi jazdırdı.

25 Bunda bılay dep jazılǵan: «MENE, MENE, TEKEL» hám «PARSIN». 26 Bunıń mánisi mınadan ibarat: MENE – Quday siziń húkimdarlıq kúnińizdi esaplap shıǵıp, onıń sońın belgiledi. 27 TEKEL – siz tárezide tartılıp, jeńil bolıp shıqtıńız. 28 PERES ^{▼▼ PERES – 25-ayattaǵı PARSIN sóziniń birlik sanda jazılıwı.} – patshalıǵıńız bólinip, Midiya hám Persiyaǵa beriledi.

29 Sonda Belshassardıń bergen buyrıǵı boyınsha, Danielge patshalıq shapan kiydirilip, moynına altın shınjır taǵıldı hám ol patshalıqtaǵı úshinshi húkimdar, dep járiyalandı.

30 Sol kúni túnde Babiloniya patshası Belshassar óltirildi. 31 Onıń patshalıǵın alpıs eki jasar midiyalı Dariy iyeledi.