‏ Daniel 6

Danieldiń arıslanlar turǵan shuqırǵa taslanıwı

1Patsha Dariy pútkil patshalıqtaǵı jerlerdi 120 wálayatqa bólip, hár bir wálayat ústinen nayıp tayınlawdı sheshti. 2Patshaǵa qıyın bolmawı ushın, nayıplardan esap alıp otıratuǵın úsh wázir tayınlandı, olardıń ishinde Daniel de bar edi. 3Daniel basqa wázirler hám nayıplarǵa qaraǵanda óz isin joqarı dárejede alıp baratuǵın edi. Sonıń ushın, patsha pútkil patshalıqqa basqarıwshı etip, Danieldi tayınlawdı jobalastırıp qoyǵan edi. 4Sonda bunı kóre almaǵan basqa wázirler hám nayıplar Danieldi ayıplawǵa urınıp, onıń basqarıw islerinen kemshilik tabıwǵa háreket qıldı. Biraq onnan birde bir qáte yaki kemshilik taba almadı. Sebebi Daniel sadıq edi. Onnan hesh qanday gúna da, ayıp ta tabılmadı. 5Aqırında olar bir-birine bılay dedi: «Onıń Qudayınıń nızamına baylanıslı bir nárseler tappasaq, Danielge qarsı basqa ayıp taba almaymız».

6Sonda wázirler hám nayıplar patshanıń aldına barıp bılay dedi:

– Patsha Dariy, ómirińiz uzaq bolsın! 7Patshalıqtaǵı barlıq wázirler, húkimdarlar, nayıplar, keńesgóyler hám hákimler keńesip, patshamız, siziń mınaday qatań párman shıǵarıwıńızdı maqul taptıq: Otız kún ishinde kim de kim sizden basqa adamǵa yamasa qudayǵa sıyınsa, yamasa duwa etse, ol arıslanlar turǵan shuqırǵa taslansın. 8Patsha, párman shıǵarıp, onı tastıyıqlań. Bul párman Midiya hám Persiya nızamlarına muwapıq ózgertilmeytuǵın hám biykar etilmeytuǵın bolsın.

9Solay etip, patsha Dariy pármandı tastıyıqladı.

10Daniel pármannıń tastıyıqlanǵanın bilse de, úyine barıp, terezeleri Erusalim tárepke qarap ashılǵan joqarǵı bólmesine shıqtı da, ádettegidey kúnine úsh márte dizerlep, Qudayǵa duwa etti hám Onı alǵısladı.

11Oǵan qarsı til biriktirgen adamlar bir topar bolıp, úyine bardı hám Danieldiń óz Qudayına duwa etip, miyrim-shápáát sorap atırǵanınıń ústinen shıqtı. 12Sonda olar patshanıń aldına barıp, shıǵarılǵan párman haqqında bılay dep ayta basladı:

– Taqsır! Siz párman shıǵarıp, kim de kim otız kún ishinde sizden basqa bir qudayǵa yamasa adamǵa duwa etse, ol arıslanlar turǵan shuqırǵa taslanadı, dep tastıyıqlaǵan joq pa edińiz?

Patsha:

– Awa, men shıǵarǵan bul párman Midiya hám Persiya patshalıǵınıń nızamlarına muwapıq qatań, ózgermeydi, – dep juwap berdi.

13Olar patshaǵa bılay dedi:

– Taqsır Yahuda tutqınlarınan bolǵan Daniel sizdi de, siz shıǵarǵan pármandı da mensinbey, ol kúnine úsh márte óz Qudayına duwa etip atır, – dedi.

14Patsha bunı esitip, qattı qáweterge tústi. Ol Danieldi qutqarıp qalıwdı júreginde niyet etti. Hátteki, kún batqansha qolınan kelgenshe onı qutqarıwǵa háreket qıldı. 15Degen menen, Danielge qarsı til biriktirgenler patshanıń aldına kelip:

– Taqsır, Midiya hám Persiya nızamlarına muwapıq, patsha shıǵarǵan hár bir buyrıq hám párman ózgertilmeytuǵının bilesiz, – dedi.

16Sonda patsha Danieldi alıp kelip, arıslanlar turǵan shuqırǵa taslawdı buyırdı. Danieldiń ózine bolsa:

– Hámme waqıtta óziń xızmet etip kelgen sol Qudayıń seni qutqarsın! – dedi.

17Bir tas ákelinip shuqırdıń awzı jawıp qoyıldı. Danielge baylanıslı jaǵday ózgertilmesin, dep patsha óziniń hám aqsúyekleriniń mór júzikleri menen tastı mórlep qoydı. 18Keyin patsha óz sarayına qayttı. Oǵan kewil kóteretuǵın hesh nárse ákelinbedi hám túndi hesh nárse jemey ótkerdi. Túni menen uyıqlamay shıqtı.

19Tań atıwdan patsha ornınan turıp, asıǵıp-úsigip, arıslanlar turǵan shuqırǵa qaray júrip ketti. 20Ol shuqırǵa jaqınlap barǵannan, muńlı dawıs penen:

– Háy, tiri Qudaydıń qulı Daniel! Sen hámme waqıtta xızmet etip júrgen Qudayıń seni arıslanlardan qutqara aldı ma? – dedi.

21Daniel:

– Taqsır, ómirińiz uzaq bolsın! 22Meniń Qudayım perishtesin jiberip, arıslanlardıń awzın jawıp qoydı hám arıslanlar maǵan hesh qanday zıyan tiygizbedi. Óytkeni Qudayımnıń aldında gúnasız boldım hám siziń aldıńızda da men hesh qanday ayıp is qılmadım, – dep juwap berdi.

23Sonda patshanıń quwanıshı ishine sıymay, onı shuqırdan shıǵarıwdı buyırdı. Danieldi shuqırdan shıǵarǵan adamlar, oǵan hesh qanday zıyan tiymegenin kórdi, sebebi Daniel óz Qudayına isengen edi. 24Patshanıń buyrıǵı boyınsha, Danieldi nahaq qaralaǵan adamlar alıp kelinip, hayalları hám balaları menen birge arıslanlar turǵan shuqırǵa taslandı. Olar shuqırdıń túbine jetpey atırıp-aq, arıslanlar olarǵa taslanıp, súyeklerin sındırıp, maydalap tasladı.

25Sonnan keyin, patsha Dariy jer júzindegi barlıq xalıqlar, milletler hám hár bir tildegi adamlarǵa bılay dep xat jolladı: «Sizlerge tınıshlıq hám bereket bolsın! 26Men mınaday párman shıǵaraman: patshalıǵımdaǵı barlıq adamlar Danieldiń Qudayınan qorqıp, qaltırasın, óytkeni:

Ol máńgi bar bolǵan tiri Qudaydur,
Onıń patshalıǵı hasla qulamas,
Húkimdarlıǵı hesh qashan tawısılmas.
27Ol azat qıladı hám qutqaradı,
Aspan menen jerde belgi hám káramatlar kórsetedi,
Ol qutqardı Danieldi arıslanlardıń pánjesinen».

28Solay etip, patsha Dariy hám Persiya patshası Kir húkimdarlıq júrgizgen dáwirlerde Daniel tabısqa eristi.