Deu 10 | KaaIBT22L | STEP | «Sol waqıtta, Jaratqan Iye maǵan bılay dedi: „Burınǵı tasqa uqsaǵan eki tas jonıp alıp, Meniń aldıma, tawǵa shıq. Jáne, aǵashtan bir sandıq isle.

‏ Deuteronomy 10

Muwsanıń buyrıqlardı qaytadan alıwı

(Shıǵ 34:1-10)

1 «Sol waqıtta, Jaratqan Iye maǵan bılay dedi: „Burınǵı tasqa uqsaǵan eki tas jonıp alıp, Meniń aldıma, tawǵa shıq. Jáne, aǵashtan bir sandıq isle. 2 Men usı taslarǵa aldın óziń sındırıp taslaǵan taslardaǵı buyrıqlardı jazaman. Keyin sen taslardı sandıqqa salıp qoyasań“.

3 Solay etip, men akaciya aǵashınan bir sandıq isledim. Burınǵı taslarday etip, eki tas jonıp aldım. Sonnan keyin, eki tastı alıp, tawǵa shıqtım. 4 Tawda jıynalǵan kúnińizde, Jaratqan Iye ot ishinen sizlerge aytqan on buyrıqtı aldınǵıday etip, sol eki tasqa jáne jazdı da, onı maǵan berdi. 5 Men tawdan tómen túsip, Jaratqan Iye buyırǵanınday, taslardı sandıqtıń ishine salıp qoydım. Taslar házir de sol sandıqtıń ishinde turıptı».

6 Izraillılar Beerot-Bene-Yaaqannan shıǵıp, Moseraǵa júrip ketti. Xaron sol jerde ólip, jerlendi. Onıń ornına balası Elazar bas ruwxaniy boldı. 7 Izraillılar ol jerden Gudgodaǵa, keyin bolsa, aǵın suwlar úlkesi bolǵan Iotbataǵa bardı. 8 Sol waqıtta Jaratqan Iye Kelisim sandıǵın kóterip júrsin hám dárgayımda xızmet etip, Meniń atım menen adamlarǵa aq pátiya bersin, dep Lebiy urıwın tańlap alǵan edi. Olar búgin de usı xızmetti orınlap kiyatır. 9 Sonıń ushın, lebiyliler tuwısqanları bolǵan basqa urıwlar sıyaqlı jerden úles almadı. Óytkeni Qudayıńız Jaratqan Iyeniń olarǵa bergen wádesi boyınsha Jaratqan Iyeniń Ózi olardıń ırısqı-nesiybesin beredi.

10 «Men aldınǵıday, tawda jáne qırıq kún, qırıq tún qaldım. Sonda Jaratqan Iye jáne bir márte meniń jalbarınıwımdı esitip, sizlerdi óltirmeytuǵın boldı. 11 Sonnan keyin, Ol: „Qáne, tur, bul xalıqtı baslap bar. Olardı Men ata-babalarına beremen dep ant ishken jerge alıp bar. Olar sol jerge barıp, onı múlik etip, iyelep alsın“, – dedi».

Qudaydıń talapları

12 «Endi, háy, Izrail xalqı, Qudayıńız Jaratqan Iye sizlerden bir nárseni ǵana talap qıladı: Qudayıńız Jaratqan Iyeden qorqıp, Onıń jolları menen júrińler, Onı súyińler, shın júregińiz hám jan-tánińiz benen Oǵan xızmet etińler. 13 Men búgin sizlerge berip atırǵan Jaratqan Iyeniń buyrıqlarına hám qaǵıydalarına ámel qılıńlar, sonda abadan turmıs keshiresiz. 14 Kókler de, kóklerdiń kókleri de, jer júzi hám onıń ishindegi barlıq ta Qudayıńız Jaratqan Iyege tiyislidur. 15 Degen menen, Jaratqan Iye sizlerdiń ata-babalarıńızdı súydi. Mine, Ol búgin kórip turǵanıńızday, olardıń urpaǵı bolǵan sizlerdi barlıq xalıqlardıń arasınan tańlap aldı. 16 Júreklerińizdi súnnet etińler, bunnan bılay qaysar bolmańlar. 17 Sebebi Qudayıńız Jaratqan Iye, qudaylardıń Qudayı, iyelerdiń Iyesidur. Ol hesh kimge eki júzlilik qılmaytuǵın, hesh qanday para almaytuǵın ullı, qúdiretli hám aybatlı Qudaydur. 18 Ol jetim-jesirlerdiń huqıqın qorǵaydı, kelgindilerdi súyip, olarǵa awqat hám kiyim beredi. 19 Sizler de kelgindilerdi súyiwińiz kerek, óytkeni ózlerińiz de Mısırda kelgindi bolǵan edińiz. 20 Qudayıńız Jaratqan Iyeden qorqıp, tek ǵana Oǵan xızmet etińler. Oǵan sadıq qalıp, Onıń atı menen ant ishińler. 21 Ol sizlerdiń dańqıńızdur. Óz kózińiz benen kórgen sol ullı hám tań qalarlıq islerdi sizler ushın islegen Qudayıńızdur. 22 Sizlerdiń ata-babalarıńız Mısırǵa barǵanda, olar barı-joǵı jetpis adam edi. Al házir bolsa, Qudayıńız Jaratqan Iye sizlerdi aspandaǵı juldızlar sıyaqlı sansız etip kóbeytti».