Deu 11 | KaaIBT22L | STEP | «Qudayıńız Jaratqan Iyeni súyińler. Onıń tapsırmalarına, qaǵıydalarına, nızamlarına hám buyrıqlarına hámme waqıtta ámel qılıńlar.

‏ Deuteronomy 11

Jaratqan Iyeniń ullılıǵı

1 «Qudayıńız Jaratqan Iyeni súyińler. Onıń tapsırmalarına, qaǵıydalarına, nızamlarına hám buyrıqlarına hámme waqıtta ámel qılıńlar. 2 Búgin mınanı esińizde tutıńlar: Qudayıńız Jaratqan Iyeniń tárbiyasın alıp jasaǵan balalarıńız emes, al sizler bolasız. Sizler Onıń ullılıǵın, kúshli qolın sozǵanın, qúdiretin, 3 Mısırda faraon hám onıń pútkil eline islegen káramatların hám belgilerin, 4 Mısır láshkerlerine, atlarına, sawash arbalarına neler islegenin, mısırlılar sizlerdiń izińizden quwǵanda, olardı Qızıl teńizdiń astına qalay mantıqtırıp, olardı qalayınsha tolıǵı menen joq qılǵanın kórdińiz ^{▼▼ Shıǵ 14:10-31.}. 5 Usı jerge jetip kelemen degenshe, Jaratqan Iye sizler ushın shólde ne islegenin, 6 Ruben urıwınan Eliabtıń ulları Datan menen Abiramǵa ne islegenin bilesiz. Pútkil Izrail xalqınıń kóz aldında jer ashılıp, olardı, shańaraqların, shatırların hám olarǵa tiyisli bolǵanlar menen barlıq janıwarların jutıp jiberdi. 7 Jaratqan Iyeniń islegen barlıq ullı islerin óz kózińiz benen kórdińiz».

Wáde etilgen eldiń bereketleri

8 «Sonlıqtan búgin men sizlerge jetkerip atırǵan buyrıqlardıń hámmesine ámel qılıńlar. Sonda sizler kúshli bolasız hám Iordan dáryasınan ótip, múlik etip alatuǵın eldi qolǵa kirgizesiz. 9 Jaratqan Iyeniń ata-babalarıńızǵa hám olardıń urpaqları bolǵan sizlerge beremen dep ant ishken sút hám pal aǵıp turǵan jerde uzaq ómir súresiz. 10 Sizler múlik etip, iyelew ushın baratırǵan el, ózlerińiz shıǵıp kelgen Mısır elindey emes. Palız atızın tárbiyalaǵanday, Mısırda tuqım egip, awır miynet penen eginlerińizdi suwǵarar edińler. 11 Biraq sizler múlik etip, iyelew ushın baratırǵan el taw hám oypatlıqlardan ibarat bolıp, onıń jeri jawın menen suwǵarıladı. 12 Bul jerge Qudayıńız Jaratqan Iyeniń Ózi ǵamxorlıq qılıp, jıl basınan aqırına deyin ol jerdi Ózi gúzetip turadı.

13 Qudayıńız Jaratqan Iyeni súyip, shın júregińiz hám jan-tánińiz benen Oǵan xızmet etiw ushın, búgin men sizlerge jetkerip atırǵan buyrıqlarǵa jaqsılap qulaq salsańız, 14 Jaratqan Iye jerińizge gúz hám báhár jawınların óz waqtında jawdıradı. Solay etip, dánińizdi, taza sharabıńızdı hám záytún mayıńızdı jıynap alasız. 15 Jaratqan Iye atızlarıńızda mallarıńız ushın ot-shóp ósiredi, sizlerdiń nanıńız mol boladı. 16 Biraq abaylı bolıńlar! Jáne, azǵırılıp joldan adaspańlar. Basqa qudaylarǵa xızmet etip, olarǵa tabınbańlar. 17 Bolmasa, Jaratqan Iye sizlerge ǵázeplenip, aspandı jawıp taslaydı hám jawın jawmay, jer óz ónimin bermey qaladı. Nátiyjede, Jaratqan Iye sizlerge berip atırǵan jaqsı elde tez qırılıp, joq bolıp ketesiz.

18 Meniń usı sózlerimdi aqıl-oyıńız benen júregińizde saqlańlar hám qolıńızǵa belgi qılıp baylap, mańlayıńızǵa nıshan qılıp taǵıp qoyıńlar. 19 Bulardı balalarıńızǵa úyretiń. Úyde otırǵanda da, jolda júrgende de, jatqanda da, turǵanda da usılar tuwralı aytıp beriń. 20 Úyińizdegi esiktiń jaqlawlarına, qalalarıńızdıń dárwazalarına jazıp qoyıń. 21 Solay etip, Jaratqan Iyeniń ata-babalarıńızǵa beremen, dep ant ishken elde sizlerdiń de, balalarıńızdıń da ómiri uzaq bolsın hám jerdiń ústinde aspan qansha tursa, sol jerde sonsha jasańlar.

22 Men búgin sizlerge jetkerip atırǵan bul buyrıqlardıń hámmesin muqıyatlı túrde orınlasańız, Qudayıńız Jaratqan Iyeni súyip, Onıń jollarınan júrseńiz hám Oǵan sadıq bolsańız, 23 Jaratqan Iye bul xalıqlardıń barlıǵın sizlerdiń aldıńızdan quwıp jiberedi. Sizler ózlerińizden góre, kóbirek hám kúshlirek bolǵan xalıqlardıń jerlerin múlik etip, iyelep alasız. 24 Ayaǵıńız tiygen hár bir jer sizlerdiki boladı. Sizlerdiń jer shegaralarıńız qubladaǵı shólden arqadaǵı Lebanon tawlarına, shıǵıstaǵı Evfrat dáryasınan batıstaǵı teńizge deyin sozıladı. 25 Sizlerge hesh kim qarsı tura almaydı. Sebebi Qudayıńız Jaratqan Iye sizlerge wáde bergenindey, ayaǵıńızdı basqan hár bir jerdegi adamlardı sizlerden qorqıp, titireytuǵın qıladı.

26 Mine, búgin men sizlerge tańlawıńız ushın, jarılqaw menen náletti usınıp atırman. 27 Eger de búgin men sizlerge jetkerip atırǵan Qudayıńız Jaratqan Iyeniń buyrıqlarına boysınsańız, onda jarılqaw alasız. 28 Biraq eger de Qudayıńız Jaratqan Iyeniń buyrıqlarına qulaq salmay, ózlerińiz tanımaytuǵın basqa qudaylardıń izinen ketip, sizlerge búgin buyırǵan joldan azǵırılsańız, onda náletke ushıraysız. 29 Qudayıńız Jaratqan Iye múlik etip berip atırǵan elge sizlerdi alıp kirgennen keyin, Gerizzim tawında jarılqawlardı, Ebal tawında náletlerdi járiyalańlar. 30 Bul eki taw Iordan dáryasınıń batıs tárepinde, usı dáryanıń tegisliginde jasaytuǵın qananlılardıń jerinde jaylasqan. Olar Gilgalǵa jaqın Moreniń terebinf terekligi qasında. 31 Sizler tez arada Qudayıńız Jaratqan Iye sizlerge beretuǵın eldi múlik etip, iyelew ushın, Iordan dáryasınan ótesiz. Ol jerdi qolǵa kirgizip, jaylasıp alǵannan keyin, 32 men búgin sizlerge jetkerip atırǵan qaǵıydalardıń hám nızamlardıń birewin de qaldırmay orınlańlar».