Deu 12 | KaaIBT22L | STEP | «Ata-babalarıńızdıń Qudayı Jaratqan Iye sizlerge múlik etip berip atırǵan elde ómirińiz dawamında usı qaǵıyda hám nızamlardı muqıyatlı túrde orınlańlar.

‏ Deuteronomy 12

Sıyınıw ushın tek ǵana bir orın

1 «Ata-babalarıńızdıń Qudayı Jaratqan Iye sizlerge múlik etip berip atırǵan elde ómirińiz dawamında usı qaǵıyda hám nızamlardı muqıyatlı túrde orınlańlar. 2 Sizler jerlerin iyeleytuǵın xalıqlardıń biyik tawlardaǵı, tóbeshiklerdegi hám qoyıw japıraqlı tereklerdiń astındaǵı óz qudaylarına tabınatuǵın orınların buzıp, pútkilley joq qılıńlar. 3 Olardıń qurbanlıq orınların buzıń, kiyeli tasların sındırıp taslań, kiyeli aǵashların jaǵıp jiberiń hám qudaylarınıń músinlerin maydalap taslań. Solay etip, olardıń qudaylarınıń atların ol jerden joq qılıńlar.

4 Sizler Qudayıńız Jaratqan Iyege sol xalıqlardıń tabınǵanınday etip sıyınbańlar. 5 Qudayıńız Jaratqan Iye Óz atın ornatıw ushın, urıwlarıńız arasında bir jerdi tańlap aladı. Sizler sol jerge barıp, Oǵan sıyınıńlar. 6 Sizler jandırılatuǵın qurbanlıqlarıńızdı, basqa qurbanlıqlarıńızdı, onnan birlerińizdi, baǵıshlaǵan zatlarıńızdı, wáde etip ataǵan hám ıqtıyarlı sadaqalarıńızdı, iri hám mayda mallarıńızdıń birinshi tóllerin sol jerge alıp barıńlar. 7 Ol jerde sizler Qudayıńız Jaratqan Iyeniń aldında óz shańaraǵıńız benen birge iship-jep, Onıń barlıq islerińizge bereket bergeni ushın shadlanıńlar.

8 Búgin bizler usı jerde islep atırǵan islerimizdi sol jerde islemeńler. Bul jerde hár kim ózi qálegenindey sıyınıp atır. 9 Óytkeni sizler Qudayıńız Jaratqan Iyeniń múlik etip berip atırǵan, tınıshlıqqa eristiretuǵın jerine ele kirmedińiz. 10 Degen menen, tez arada sizler Iordan dáryasınan ótip, Qudayıńız Jaratqan Iye múlik etip, sizlerge beretuǵın jerge ornalasıp alasız. Jaratqan Iye sizlerdi dógeregińizdegi barlıq dushpanlarıńızdan qorǵap, tınıshlıqqa bóleydi. Keyin sizler qáwip-qátersiz ómir súresiz. 11 Qudayıńız Jaratqan Iye Óz atın ornalastırıw ushın, bir jerdi tańlaydı. Sonda men sizlerge buyırǵan barlıq jandırılatuǵın qurbanlıqlarıńızdı, basqa qurbanlıqlarıńızdı, onnan birlerińizdi, baǵıshlaǵan zatlarıńızdı hám Jaratqan Iyege wáde etip ataǵan eń jaqsı sadaqalarıńızdı sol jerge alıp barıńlar. 12 Sol jerde ullarıńız, qızlarıńız, qullarıńız hám shorılarıńız, jáne de, qalalarıńızda jasaytuǵın lebiyliler menen Qudayıńız Jaratqan Iyeniń aldında shadlanıńlar. Óytkeni sizler sıyaqlı, lebiylilerdiń ózlerine tiyisli jer úlesi joq. 13 Jandırılatuǵın qurbanlıqlarıńızdı dus kelgen jerde usınıwdan awlaq bolıńlar. 14 Bulardı tek Jaratqan Iye urıwlarıńız arasınan tańlaǵan orında ǵana usınıńlar. Men sizlerge buyırǵanlardıń hámmesin sol jerde orınlańlar.

15 Qudayıńız Jaratqan Iyeniń sizlerge bergen bereketine jarasa, jasap atırǵan hár bir qalańızda qálegenińizshe mal soyıp, góshin jewińizge boladı. Adam haram bolsın, pák bolsın, jeyran yamasa suwın góshinen jegendey, bul góshten jewine boladı. 16 Biraq sizler maldıń góshin qanı menen birge jemeńler, onıń qanın suwday etip, jerge aǵızıp jiberińler. 17 Jáne de, dánlerińizdiń, taza sharabıńızdıń, záytún mayıńızdıń onnan birlerin, iri hám mayda mallarıńızdıń birinshi tóllerin, wáde etip ataǵan hám ıqtıyarlı sadaqalarıńızdı hám baǵıshlaǵan sadaqalarıńızdı jasap atırǵan qalalarıńızda jemeńler. 18 Al sizler bulardı ul-qızlarıńız, qullarıńız, shorılarıńız hám qalalarıńızda jasap atırǵan lebiyliler menen birge Qudayıńız Jaratqan Iyeniń aldında, Onıń tańlaǵan jerinde jeńler. Qudayıńız Jaratqan Iye sizlerdiń barlıq islerińizge bereket bergenine shadlanıwıńız kerek. 19 Elińizde jasaǵan waqtıńızda, lebiylilerdi umıtıp ketiwden awlaq bolıńlar.

20 Qudayıńız Jaratqan Iye sizlerge bergen wádesi boyınsha shegarańızdı keńeytkende, gósh jewdi qáleseńiz, qálegen waqtıńızda gósh jewińizge boladı. 21 Qudayıńız Jaratqan Iye Óz atın ornatıw ushın tańlaǵan jer sizler turǵan jerden uzaq bolsa, men buyırǵanday, Jaratqan Iye sizlerge bergen iri hám mayda mallarıńızdan soyıp, óz qalalarıńızda qálegenińizshe gósh jewińizge boladı. 22 Haram adam bolsa da, pák adam bolsa da, jeyran yamasa suwın góshindey, sol góshten jewine boladı. 23 – 24 Biraq onıń góshin qanı menen birge jemeńler. Sebebi denege jan beretuǵın qandur. Gósh penen birge jan jemeńler, qandı suwday etip, jerge aǵızıp jiberińler. 25 Usılay isleseńiz ózlerińiz de, áwladlarıńız da abadan turmıs keshiresiz. Solay etip, sizler Jaratqan Iyeniń názerinde durıs bolǵan isti qılǵan bolasız.

26 Al muxaddes qurbanlıqlarıńızdı hám usıǵan kiretuǵın wáde etip ataǵan qurbanlıqlarıńızdı bolsa, Jaratqan Iyeniń tańlaytuǵın jerine alıp barıwıńız tiyis. 27 Jandırılatuǵın qurbanlıqlarıńızdı, olardıń góshin hám qanın Qudayıńız Jaratqan Iyeniń qurbanlıq ornında usınıńlar. Basqa qurbanlıqlarıńızdıń qanı Qudayıńız Jaratqan Iyeniń qurbanlıq ornınıń qasına tógilsin, al olardıń góshinen jewińizge boladı. 28 Men sizlerge berip atırǵan bul buyrıqlardıń birewin de qaldırmay orınlańlar. Sonda ózlerińiz de, áwladlarıńız da hámme waqıtta abadan turmıs keshiresiz. Óytkeni Qudayıńız Jaratqan Iyeniń názerinde jaqsı hám durıs bolǵan isti islegen bolasız».

Basqa diniy dástúrlerden abaylı bolıńlar

29 «Qudayıńız Jaratqan Iye sizler jerlerin iyeleyin dep atırǵan xalıqlardı sizlerdiń aldıńızdan quwıp, qırıp taslaydı. Keyin sizler olardıń jerlerin iyelep, sol jerlerde jaylasıp alasız. 30 Sol xalıqlardı joq qılǵanıńızdan keyin, olardıń diniy dástúrlerin islep, duzaǵına túsiwden abaylı bolıńlar. Sizler: „Bul xalıqlar qudaylarına qalay tabınǵan eken? Bizler de sonday qılayıq“, – dep olardıń qudayları haqqında sorastırmańlar. 31 Sizler Qudayıńız Jaratqan Iyege olardıń tabınǵanınday etip, sıyınbańlar. Sebebi olar Jaratqan Iye jek kóretuǵın hár túrli jerkenishli islerdi isleydi. Hátteki, ol xalıqlar qudaylarına arnap, ul-qızların otta jandıradı.

32 Men sizlerge buyırǵanlarımnıń hámmesin muqıyatlı túrde orınlańlar. Bul buyrıqlarǵa hesh nárse qospań da, alıp taslamań da».