Deu 13 | KaaIBT22L | STEP | «Eger sizlerdiń arańızdan bir payǵambar yamasa túsinde ayan kóretuǵın birew payda bolıp, ol: „Bir nıshan yamasa káramat kórsetemen“,

‏ Deuteronomy 13

Jalǵan qudaylarǵa tabınbańlar

1 «Eger sizlerdiń arańızdan bir payǵambar yamasa túsinde ayan kóretuǵın birew payda bolıp, ol: „Bir nıshan yamasa káramat kórsetemen“, – dep aytsa, 2 usı aytqan nıshan hám káramatlardı islep, keyin ol adam: „Kelińler, sizler tanımaǵan basqa qudaylardıń izine erip, olarǵa xızmet qılayıq“, – dese, 3 sizler sol payǵambardıń yamasa túsinde ayan kóriwshiniń sózlerine qulaq salmańlar. Qudayıńız Jaratqan Iye Ózin shın júregińiz hám jan-tánińiz benen sizlerdiń súyetuǵınıńız yamasa súymeytuǵınıńızdı biliw ushın, sınap atırǵan boladı. 4 Sizler tek ǵana Qudayıńız Jaratqan Iyeniń izinen júrip, Onnan qorqıńlar. Onıń buyrıqlarına boysınıp, sózlerine qulaq salıńlar. Jaratqan Iyege xızmet etip, Oǵan sadıq qalıńlar. 5 Al sol payǵambar yamasa túsinde ayan kóretuǵın adam óltiriliwi tiyis. Sebebi ol úgitlep, Mısır elinen alıp shıqqan, Mısırdaǵı qullıqtan azat etken Qudayıńız Jaratqan Iyege sizlerdi qarsı qoymaqshı boldı. Qudayıńız Jaratqan Iyeniń buyırǵan jolınan shıǵarıp, azǵırmaqshı boldı. Solay etip, arańızdaǵı jawızlıqtı joq qılıńlar.

6 Hátteki, bir anadan tuwılǵan tuwısqanıńız yamasa ul-qızıńız, súygen hayalıńız yamasa eń jaqın dostıńız sizlerdi ózińiz de, ata-babalarıńız da tanımaǵan basqa qudaylarǵa tabınıwǵa qupıya túrde úgitlewi múmkin. 7 Olardıń biri sizlerdi átirapıńızdaǵı alıs-jaqın jerde jasap atırǵan, dúnyanıń bir shetinen ekinshi shetine deyin jasaytuǵın xalıqlardıń qudaylarına sıyınıwdı úgitlewi múmkin. 8 Biraq sizler buǵan ırazı bolıp, oǵan qulaq salmańlar. Onday adamǵa rehimlilik kórsetpeńler, onı qorǵamańlar. 9 Onday adamdı sózsiz óltirip taslańlar. Onı óltiriw ushın birinshi bolıp sen qolıńdı kóter, keyin pútkil xalıq qol kótersin. 10 Onı tas boran qılıp óltirińler. Sebebi ol sizlerdi Mısır elindegi qullıqtan alıp shıqqan Qudayıńız Jaratqan Iyeden júz burdırıp, azǵırıwǵa háreket etti. 11 Sonda pútkil Izrail xalqı bul haqqında esitip, qorqadı. Bunnan keyin, arańızda hesh kim usıǵan uqsaǵan jawız is qılmaytuǵın boladı.

12 Eger de Qudayıńız Jaratqan Iyeniń sizlerge jasawıńız ushın berip atırǵan qalalardıń birinde, 13 jaman adamlar shıǵıp: „Júrińler, ózlerińiz tanımaytuǵın basqa qudaylarǵa tabınayıq“, – dep qala turǵınların azǵırǵanın esitseńiz, 14 onda olar haqqında sorastırıp, jaqsılap tekseriń. Eger sol jerkenishli waqıya shınında da júz bergen bolsa, esitkenlerińiz dálillense, 15 sol qalanıń pútkil turǵınlarınan baslap, haywanlarına deyin qılıshtan ótkizińler. Sol qalanı hám ondaǵı barlıq zatlardı pútkilley joq qılıńlar. 16 Qaladan alınǵan oljalardıń barlıǵın qala maydanına jıynańlar. Qalanı hám sol jerdegi barlıq oljanı Qudayıńız Jaratqan Iyege tolıǵı menen jandırılatuǵın qurbanlıq etip jaǵıp jiberińler. Sol qala máńgige qarabaqanaǵa aylanǵan halında qalsın, ol hesh qashan qayta tiklenbesin. 17 Joq qılınatuǵın zatlardan hesh birewin de ózlerińizge almańlar. Sonda Jaratqan Iyeniń lawlaǵan ǵázebi qaytıp, Ol ata-babalarıńızǵa ant ishkenindey, sizlerge miyrim-shápáát, rehim kórsetip, sizlerdi kóbeytedi. 18 Sonıń ushın, sizler Qudayıńız Jaratqan Iyege qulaq salıńlar, búgin men sizlerge jetkerip atırǵan buyrıqlarǵa boysınıp, Onıń názerinde durıs bolǵan islerdi isleńler».