Deu 14 | KaaIBT22L | STEP | «Sizler – Qudayıńız Jaratqan Iyeniń balalarısız. Marhumǵa aza tutqanıńızda, denelerińizdi tilip, shashıńızdıń aldın qıydırmańlar.

‏ Deuteronomy 14

Aza tutıw haqqında

1 «Sizler – Qudayıńız Jaratqan Iyeniń balalarısız. Marhumǵa aza tutqanıńızda, denelerińizdi tilip, shashıńızdıń aldın qıydırmańlar. 2 Sizler Qudayıńız Jaratqan Iyeniń muxaddes xalqısız. Jaratqan Iye jer júzindegi barlıq xalıqlardıń arasınan sizlerdi Óz ǵáziynesi sıpatında tańlap aldı».

Hadal hám haram haywanlar

(Leb 11:1-47)

3 «Sizler jerkenishli sanalatuǵın haywanlardıń góshin jemeńler. 4 Mına haywanlardıń góshin jewińizge boladı: sıyır, qoy, eshki, 5 suwın, jeyran, qızıl antilopa, taw eshkisi, jabayı ógiz, aq antilopa hám taw qoshqarı. 6 Tuyaqları tereń etip ekige ayırılǵan asha tuyaqlı hám gúyis qaytaratuǵın haywanlardıń hámmesin jewińizge boladı. 7 Biraq bul haywanlardan tek mınalardıń góshin jewińizge bolmaydı: túye, qoyan hám daman ^{▼▼ Daman – surokqa uqsaytuǵın haywan.}. Bular gúyis qaytaradı, biraq asha tuyaǵı joq. Sonlıqtan olar sizler ushın haram boladı. 8 Shoshqa asha tuyaqlı bolǵanı menen, ol gúyis qaytarmaydı. Sonlıqtan ol sizler ushın haram boladı. Usı haywanlardıń góshin jemeńler hám olardıń óligine de qol tiygizbeńler.

9 Suwda jasaytuǵın qalashlı hám qabırshaqlı janıwardıń góshin jewińizge boladı. 10 Biraq qalashsız hám qabırshaqsız haywanlardıń hesh birin jemeńler. Bular sizler ushın haram sanaladı.

11 Hadal sanalatuǵın barlıq quslardı jewińizge boladı. 12 Góshin jewge bolmaytuǵın quslar mınalar: búrkit, kúshegen, qara qus, 13 shayqus, lashın hám onıń túrleri, 14 ǵarǵanıń barlıq túrleri, 15 úki, batpaq bayıwlısı, shaǵala hám qarshıǵanıń túrleri, 16 úy bayıwlısı, qulaqlı japalaq, aq quw, 17 uzaqsha, sipa, qarabay, 18 láylek hám qutannıń túrleri, ópepek hám jarǵanat.

19 Qanatlı shıbın-shirkeyler sizler ushın haram sanaladı. Olardıń hesh birin jemeńler. 20 Biraq qanatlı shıbın-shirkeylerdiń bazıları hadal bolıp, olardı jewińizge boladı.

21 Haram ólip qalǵan haywannıń góshin jemeńler. Onday óli haywandı jewi ushın qalańızda jasap atırǵan kelgindi birewge beriwińizge yamasa basqa bir jat jerli adamǵa satıwıńızǵa boladı. Sizler Qudayıńız Jaratqan Iyeniń muxaddes xalqısız.

Ílaqtı óz anasınıń sútine pisirmeńler».

Onnan biri haqqında nızam

22 «Hár jılı atızlarıńızda jetistiriletuǵın barlıq ónimlerdiń onnan birin ayırıp qoyıńlar. 23 Dánińizdiń, taza sharabıńızdıń, záytún mayıńızdıń onnan birin, iri hám mayda mallarıńızdıń birinshi tuwılǵan tóllerin Qudayıńız Jaratqan Iyeniń Óz atın ornalastırıw ushın tańlaytuǵın jerinde, Onıń aldında jeńler. Solay islep, hámme waqıtta Onnan qorqıwdı úyrenesiz. 24 Al eger de, Qudayıńız Jaratqan Iyeniń Óz atın ornatıw ushın tańlaytuǵın jeri uzaq bolıp, Qudayıńız Jaratqan Iye bereketlep bergen óniminen onnan birin sol jerge alıp barıwǵa múmkinshiligińiz bolmasa, 25 onda sol zatlardı gúmiske almastırıńlar. Gúmisti Qudayıńız Jaratqan Iyeniń tańlaytuǵın jerine alıp barıńlar. 26 Sol gúmiske qálegen nárseni: iri yamasa mayda mal, sharap, ótkir ishimlik yamasa kewlińiz kúsegen basqa bir nárse satıp alıp, óz shańaraǵıńız benen birge Qudayıńız Jaratqan Iyeniń aldında iship-jep, shadlanıńlar.

27 Qalalarıńızda jasap atırǵan lebiylilerdi umıtıp qaldırmańlar. Sebebi olardıń ózlerine tiyisli úles jeri joq. 28 Hár úshinshi jıldıń aqırında, sol jılı alǵan ónimińizdiń barlıq onnan bir bólegin alıp, óz qalańızǵa jıynap, saqlap qoyıńlar. 29 Solay etip, úles jeri bolmaǵan lebiyliler, jáne de, qalalarıńızda jasap atırǵan kelgindiler, jetim hám jesirler kelip, sonnan iship-jep toysın. Sonda Qudayıńız Jaratqan Iye sizlerdiń qol urǵan hár bir isińizge bereket beredi».