Deu 16 | KaaIBT22L | STEP | «Abib ayında Qudayıńız Jaratqan Iyege arnalǵan Qutqarılıw bayramın bayramlańlar. Óytkeni Qudayıńız Jaratqan Iye abib ayında, túnde sizlerdi Mısırdan alıp shıqtı.

‏ Deuteronomy 16

Qutqarılıw bayramı hám Ashıtqısız nan bayramı

1 «Abib ayında Qudayıńız Jaratqan Iyege arnalǵan Qutqarılıw bayramın bayramlańlar. Óytkeni Qudayıńız Jaratqan Iye abib ayında, túnde sizlerdi Mısırdan alıp shıqtı. 2 Qudayıńız Jaratqan Iyeniń Óz atın ornalastırıw ushın tańlaytuǵın jerinde mayda hám iri mallarıńızdan Qutqarılıw qurbanlıqların shalıńlar. 3 Qurbanlıqtıń góshi menen birge ashıtqı salınǵan nan jemeńler. Jeti kún dawamında ashıtqısız nan, yaǵnıy qıyın kúnlerde jeytuǵın nan jewińiz kerek. Sebebi sizler Mısırdan asıǵıp shıǵıp ketkenińizde, ashıtqısız nan jegen edińler. Usı nandı jep, ómirińiz dawamında Mısırdan shıqqan kúnińizdi eslep júresizler. 4 Jeti kún dawamında elińizdiń hesh bir jerinde ashıtqı bolmasın. Bayramnıń birinshi kúni keshte qurbanlıq qılǵan mallarıńızdıń góshinen azanǵa deyin qaldırılmasın.

5 Qutqarılıw qurbanlıqların Qudayıńız Jaratqan Iye sizlerge beretuǵın qalalardıń hámmesinde shalmańlar. 6 Al onı tek ǵana Qudayıńız Jaratqan Iye Óz atın ornalastırıw ushın tańlaytuǵın jerinde shalıńlar. Bunı kún batatuǵın waqıtta, Mısırdan shıqqan mezgilde soyıńlar. 7 Onıń góshin Qudayıńız Jaratqan Iyeniń tańlaytuǵın jerinde pisirip jeńler hám tań atqanda óz shatırlarıńızǵa qaytıńlar. 8 Altı kún ashıtqısız nan jeńler. Jetinshi kúni Qudayıńız Jaratqan Iyege arnap, saltanatlı jıynalıs qılıńlar. Sol kúni hesh qanday jumıs islemeńler».

Hápteler bayramı

9 «Egindi orıp baslaǵan waqıttan baslap, jeti hápte sanańlar. 10 Keyin Qudayıńız Jaratqan Iyege arnalǵan Hápteler bayramın bayramlańlar hám sol waqıtta Onıń sizlerge bergen bereketine jarasa, ıqtıyarlı sadaqalarıńızdı berińler. 11 Sizler ul-qızlarıńız, qul hám shorılarıńız, qalalarıńızda jasaytuǵın lebiyliler, arańızda jasaytuǵın kelgindiler hám jetim-jesirler menen birge Óz atın ornalastırıw ushın tańlaytuǵın jerinde, Qudayıńız Jaratqan Iyeniń aldında shadlanıńlar. 12 Mısırda qul bolǵanıńızdı umıtpańlar hám usı qaǵıydalardıń birewin de qaldırmay orınlańlar».

Qos bayramı

13 «Qırmanıńızdan dánińizdi jıynap, júzimińizdi sıǵıp sharabın alǵannan keyin, jeti kún dawamında Qos bayramın bayramlańlar. 14 Sizler ul-qızlarıńız, qul hám shorılarıńız, qalalarıńızda jasaytuǵın lebiyliler, kelgindiler hám jetim-jesirler menen birge usı bayramda shadlanıńlar. 15 Qudayıńız Jaratqan Iyeniń tańlaytuǵın jerinde jeti kún dawamında Oǵan arnap bayram ótkerińler. Qudayıńız Jaratqan Iye zúráátińizdiń barlıǵın hám qol urǵan hár bir isińizdi bereketleydi. Sonlıqtan, úlken quwanıshqa bólenińler.

16 Solay etip, barlıq erkeklerińiz jılına úsh márte: Ashıtqısız nan bayramında, Hápteler bayramında hám Qos bayramında Qudayıńız Jaratqan Iyeniń aldında bolıwı ushın, Onıń tańlaytuǵın jerine kelsin. Hesh kim Jaratqan Iyeniń aldına qurı qol kelmesin. 17 Hár birińiz Qudayıńız Jaratqan Iyeniń ózlerińizdi bereketlegenine jarasa sıylar alıp kelińler».

Ádil húkim haqqında

18 «Qudayıńız Jaratqan Iye sizlerge beretuǵın qalalarda hár bir urıw ushın qazılar hám qadaǵalawshılardı tayınlańlar. Olar xalıqtı ádillik penen húkim etsin. 19 Olar húkim etkende, ádillikti burmalamasın, eki júzlilik qılmasın hám para almasın. Sebebi para dana adamnıń kózin soqır qılıp qoyadı hám haqtı nahaqqa shıǵaradı. 20 Ómir súriwińiz ushın hám Qudayıńız Jaratqan Iye sizlerge berip atırǵan eldi múlik etip alıwıńız ushın ádillikke, tek ǵana ádillikke umtılıńlar.

21 Qudayıńız Jaratqan Iye ushın quratuǵın qurbanlıq orınnıń qasına kiyeli aǵash ornatpańlar! 22 Kiyeli tas ta ornatpańlar! Óytkeni Qudayıńız Jaratqan Iye bulardan jerkenedi».